ബെംഗളൂരു : ഗോവയെയും ബെംഗളൂരുവിനെയും ബന്ധിപ്പിക്കുന്ന വന്ദേഭാരത് തീവണ്ടിക്ക് യാത്രക്കാരിൽനിന്ന് തണുപ്പൻ പ്രതികരണം. സാധാരണ പുതിയ വന്ദേഭാരത് തീവണ്ടികളിൽ ടിക്കറ്റുകൾ അതിവേഗം വിറ്റുതീരുകയാണ് പതിവെങ്കിൽ ബെംഗളൂരു-മഡ്ഗാവ് വന്ദേഭാരത് (26655/26656) കാലിയായി സർവീസ് നടത്തേണ്ട സ്ഥിതിയാണ്. ബെംഗളൂരുവിൽനിന്നുള്ള സർവീസിൽ അടുത്ത രണ്ടുമാസത്തിൽ രണ്ടുദിവസം മാത്രമാണ് മുഴുവൻ ടിക്കറ്റുകളും വിറ്റുപോയിരിക്കുന്നത്.

To advertise here,

 

ക്രിസ്മസ് ദിനങ്ങളിൽമാത്രമാണ് ഈ തീവണ്ടിയിൽ ചെയർകാറിൽ മുഴുവൻ ടിക്കറ്റും വിറ്റിരിക്കുന്നത്-ഡിസംബർ 24-നും 25-നും. ബാക്കി മിക്കദിവസങ്ങളിലും 700-ൽപ്പരം ടിക്കറ്റുകൾ ബാക്കിയാണ്. വേഗക്കുറവും സർവീസിന്റെ ദൈർഘ്യവുമായിരിക്കാം യാത്രക്കാരെ അകറ്റിനിർത്തുന്നതെന്നാണ് കരുതുന്നത്. രാജ്യത്ത് നിലവിലുള്ള വന്ദേഭാരത് തീവണ്ടികളിൽ ഏറ്റവും കൂടുതൽ ദൈർഘ്യം ഓടുന്ന തീവണ്ടികളിലൊന്നാണ് ഈ സർവീസ്.

സ്ലീപ്പർ ക്ലാസ് അല്ലാത്ത, ഇരുന്നുമാത്രം യാത്രചെയ്യാൻ സാധിക്കുന്ന സാധാരണ വന്ദേഭാരത് തീവണ്ടികളിൽ ഏറ്റവും കൂടുതൽ യാത്രാസമയമെടുക്കുന്നതും ബെംഗളൂരു-മഡ്ഗാവ് തീവണ്ടിയാണ്. ബെംഗളൂരുവിൽനിന്ന് മഡ്ഗാവ് എത്താൻ 13.20 മണിക്കൂറാണ് വേണ്ടിവരുന്നത്. രാജ്യത്ത് നിലവിലുള്ള സമാനതീവണ്ടികളിൽ ഒട്ടുമിക്കതും ഒൻപതുമണിക്കൂറിൽ താഴെ യാത്രാസമയമുള്ളതാണ്. വേഗത്തിന്റെ കാര്യത്തിലും പിന്നിലാണ്.

ചുരം പാതയുള്ള ഈ റൂട്ടിൽ വന്ദേഭാരതിന്റെ ശരാശരി വേഗം 50 കിലോ മീറ്ററാണ്.

ബെംഗളൂരുവിൽനിന്ന് ഗോവയിലേക്ക് പോകാൻ കൂടുതൽ പേരും ആശ്രയിക്കുന്ന യശ്വന്ത്പുര-വാസ്കോഡ ഗാമ എക്സ്പ്രസിന്റെ (17309) യാത്രാസമയം 11.55 മണിക്കൂറാണ്. എന്നാൽ, വന്ദേഭാരത്തിൽ ബെംഗളൂരുവിൽനിന്ന് ഗോവയിൽ എത്താൻ ഒന്നരമണിക്കൂറിലധികം വേണം. മംഗളൂരു വഴി പോകുന്നതിനാലാണിത്. ബെംഗളൂരുവിൽനിന്ന് മംഗളൂരുവിലേക്ക് യാത്രക്കാരുണ്ടാകുമെന്നായിരുന്നു കണക്കുകൂട്ടൽ. എന്നാൽ, ഈ റൂട്ടിലും യാത്രക്കാരുടെ പ്രതികരണം മോശമാണ്.

മുൻപ്‌ മംഗളൂരു-മഡ്ഗാവ് റൂട്ടിൽ നടത്തിയിരുന്ന സർവീസാണ് ഇപ്പോൾ ബെംഗളൂരു-മഡ്ഗാവ് വന്ദേഭാരത് സർവീസാക്കി മാറ്റിയത്. പഴയ സർവീസിനും യാത്രക്കാരുടെ എണ്ണം കുറവായിരുന്നു.

പകുതിയോളം സീറ്റിലും കാലിയായി യാത്ര പതിവായതോടെയാണ് ബെംഗളൂവിലേക്ക് നീട്ടി പരീക്ഷണത്തിന് തയ്യാറായത്.

എന്നാൽ, നീക്കം കാര്യമായ മാറ്റമുണ്ടാക്കിയിട്ടില്ലെന്നാണ് റിസർവേഷൻ നിലയിൽനിന്ന് വ്യക്തമാകുന്നത്.