To advertise here,

ആറ്റുനോറ്റിരുന്ന് 36-ാം വയസിൽ ഒരു കല്യാണം ശരിയാകുന്നു. ഏറെക്കാലമായി കാത്തിരുന്ന ആ ദിവസം എത്തുമ്പോൾ സന്തോഷിക്കാനാണ് ലതിൻകുമാർ ആഗ്രഹിക്കുക. പക്ഷേ, കല്യാണദിവസം രാവിലെ മുതൽ കാര്യങ്ങൾ അങ്ങനെയല്ല. ഒന്നിന് പിന്നാലെ ഒന്നായി ദുശ്ശകുനങ്ങൾ.

കെട്ടുകഴിഞ്ഞ് ഏറെ പ്രതീക്ഷയോടെ കാത്തിരുന്ന ആദ്യരാത്രിയിലും കാര്യങ്ങൾ കൂടുതൽ വഷളാകുന്നു. ഒടുവിൽ സംഭവിച്ചതെല്ലാം ഒരു സ്വപ്നമായിരുന്നെന്ന് കരുതി ഉറങ്ങിയെഴുന്നേൽക്കുമ്പോൾ ആശ്വസിക്കാം. പക്ഷേ...

അതേ കാര്യങ്ങൾ വീണ്ടും സംഭവിച്ചാലോ?

ഒരു തവണയല്ല. വീണ്ടും വീണ്ടും.
ലതിൻകുമാറിന്റെ ചിരകാല സ്വപ്നമായിരുന്ന വിവാഹം അങ്ങനെ ഒരു വിചിത്രമായ ചക്രത്തിൽ കുടുങ്ങുന്നിടത്താണ് സുധി മാഡിസൺ സംവിധാനം ചെയ്ത ‘ധൂമകേതു’ കൗതുകമാകുന്നത്.

മലയാള സിനിമയിൽ അത്ര പരിചിതമല്ലാത്ത ടൈം ലൂപ്പ് പ്രമേയത്തിലേക്ക് കോമഡിയെ ചേർക്കുക എന്നത് എളുപ്പമുള്ള കാര്യമല്ല. പ്രമേയം കൈവിട്ടുപോയാൽ പ്രേക്ഷകനുമായുള്ള ബന്ധവും നഷ്ടപ്പെടാം. എന്നാൽ, ആവർത്തിക്കുന്ന സംഭവങ്ങളിലൂടെ കഥയെ മുന്നോട്ടുകൊണ്ടുപോകാനുള്ള ശ്രമമാണ് ചിത്രത്തിന്റെ പ്രത്യേകത.

ഒരു വിവാഹം... ഒരു ദിവസം... അതേ ദുരന്തങ്ങൾ...

ഇതിൽനിന്ന് ലതിൻകുമാർ എങ്ങനെ പുറത്തുകടക്കും?

കേൾക്കാം ‘ധൂമകേതു’വിനെക്കുറിച്ചുള്ള ഫസ്റ്റ് ഷോ. അവതരണം: ശ്രീലക്ഷ്മി മേനോൻ, ശബ്ദമിശ്രണം: പ്രണവ് പി.എസ്., നിർമ്മാണം: ആർജെ അച്ചൂ.