കാഠ്മണ്ഡു: നേപ്പാളില്‍ വീണ്ടും വന്‍ഹിമപാതം. മൗണ്ട് മനാസ്‌ലുവിന്റെ ബേസ് ക്യാമ്പിലേക്കാണ് ഹിമപാതമുണ്ടായത്. ഇതിന്റെ വീഡിയോ ദൃശ്യങ്ങള്‍ പുറത്തെത്തി. ഇന്ന് (ഞായറാഴ്ച) ഉണ്ടായ ഹിമപാതത്തില്‍ കുറച്ച് ടെന്റുകള്‍ നശിച്ചിട്ടുണ്ട്. വേറെ അപകടങ്ങളൊന്നും റിപ്പോര്‍ട്ട് ചെയ്തിട്ടില്ലെന്നാണ് വിവരം.

To advertise here,

മനാസ്‌ലൂ കയറാന്‍ നാനൂറില്‍ അധികം പേര്‍ക്കാണ് ഇക്കൊല്ലം നേപ്പാള്‍ സര്‍ക്കാര്‍ അനുമതി നല്‍കിയിട്ടുള്ളത്. രക്ഷാപ്രവര്‍ത്തനങ്ങള്‍ ആരംഭിച്ചിട്ടുണ്ട്. ആകാശമാര്‍ഗത്തിലുള്ള തിരച്ചിലിന് ഹെലികോപ്ടറുകളെയും നിയോഗിച്ചിട്ടുണ്ട്. മുന്‍പ്‌ സെപ്റ്റംബര്‍ 26-നുണ്ടായ ഹിമപാതത്തില്‍ ഒരു ഇന്ത്യന്‍ പര്‍വതാരോഹകന്‍ ഉള്‍പ്പെടെ രണ്ടുപേര്‍ മരിച്ചിരുന്നു. 11 പേര്‍ക്ക് പരിക്കേല്‍ക്കുകയും ചെയ്തിരുന്നു. 

ലോകത്തിലെ എട്ടാമത്തെ വലിയ പര്‍വതമാണ് മൗണ്ട് മനാസ്‌ലൂ. മാത്രമല്ല, ഏറ്റവും അപകടകരമായ അഞ്ചാമത്തെ പര്‍വതം എന്നൊരു വിശേഷണവും ഇതിനുണ്ട്. ഇതിനകം 53 പര്‍വതാരോഹകര്‍ക്കാണ് ഇവിടെ ജീവന്‍ നഷ്ടപ്പെട്ടിട്ടുള്ളത്

അതേസമയം, ശനിയാഴ്ച കേദാര്‍നാഥ് ക്ഷേത്രത്തിനു സമീപം ഹിമപാതമുണ്ടായിരുന്നു. രാവിലെ ആറരയോടെയായിരുന്നു സംഭവം. കേദാര്‍ ഡോമിനും സ്വര്‍ഗാരോഹിണിയ്ക്കും ഇടയിലുള്ള ഹിമാനിയില്‍നിന്ന് അടര്‍ന്ന ഭാഗമാണ് ഇവിടേക്ക് വീണത്. ക്ഷേത്രത്തിന് പിറകിലുള്ള ചോരാബാരി തടാകത്തിലേക്കായിരുന്നു ഇതുവന്നു വീണത്.