കോഴിക്കോട്: കോൺഗ്രസ് നേതാക്കൾക്കെതിരെ യുവമോർച്ച പ്രവർത്തകരുടെ കരിങ്കൊടി പ്രതിഷേധം. ആഭ്യന്തരമന്ത്രി രമേശ് ചെന്നിത്തലയേയും വയനാട് എംപി പ്രിയങ്കാ ഗാന്ധിയിയേയുമാണ് പ്രവർത്തകർ കരിങ്കൊടി കാണിച്ചത്. കഴിഞ്ഞ ദിവസം കേന്ദ്ര ആഭ്യന്തരമന്ത്രി അമിത് ഷായ്‌ക്കെതിരെ കൊല്ലത്ത് യൂത്ത് കോൺഗ്രസ് പ്രവർത്തകരുടെ കരിങ്കൊടി പ്രതിഷേധം നടന്നിരുന്നു. ഇതിൽ സുരക്ഷാവീഴ്ചയുണ്ടെന്ന് ബിജെപി ആരോപിച്ചിരുന്നു. പിന്നാലെയാണ് യുവമോർച്ചയുടെ കരിങ്കൊടി പ്രതിഷേധം. 

To advertise here,

കുറ്റ്യാടിക്കടുത്ത് ജാനകിക്കാട്ടിൽ വെച്ചാണ് രമേശ് ചെന്നിത്തലയ്ക്കുനേരെ കരിങ്കൊടി പ്രതിഷേധമുണ്ടായത്. കോഴിക്കോട് ജില്ലയിലെ വിവിധ പരിപാടികളിൽ പങ്കെടുക്കാനായി പോകുന്നതിനിടെ ഇടുങ്ങിയ റോഡിൽ വെച്ചാണ് പ്രതിഷേധക്കാർ ആഭ്യന്തരമന്ത്രിയുടെ വാഹനവ്യൂഹത്തിന് നേരെ പാഞ്ഞടുത്ത് കരിങ്കൊടി വീശിയത്. യുവമോർച്ച പ്രവർത്തകരെ പൊലീസ് അറസ്റ്റ് ചെയ്തു നീക്കി.

തിരുവമ്പാടിയിൽ വെച്ചാണ് പ്രിയങ്കാ ഗാന്ധി എംപിക്കുനേരെ യുവമോർച്ച പ്രവർത്തകരുടെ കരിങ്കൊടി പ്രതിഷേധമുണ്ടായത്. തമ്പലമണ്ണയ്ക്ക് സമീപത്തു വെച്ചായിരുന്നു പ്രതിഷേധം. സിആർപിഎഫിന്റെയും കേരള പോലീസിന്റെയും കനത്ത സുരക്ഷാ അകമ്പടിയോടെ പ്രിയങ്കാ ഗാന്ധിയുടെ വാഹനവ്യൂഹം കടന്നുപോകുന്നതിനിടെയാണ് സംഭവം. റോഡരികിൽ നിലയുറപ്പിച്ചിരുന്ന പ്രവർത്തകർ കരിങ്കൊടിയുമായി വാഹനവ്യൂഹത്തിന് മുന്നിലേക്ക് ചാടിവീഴുകയായിരുന്നു.

യുവമോർച്ച ജില്ലാ പ്രസിഡന്റ് വി.വി. ശ്രീഹരി, ജനറൽ സെക്രട്ടറി നിതിൻ മധുസൂദനൻ എന്നിവരുടെ നേതൃത്വത്തിലാണ് പ്രിയങ്കാ ഗാന്ധിക്കെതിരായ കരിങ്കൊടി പ്രതിഷേധം അരങ്ങേറിയത്. തിരുവമ്പാടി പോലീസ് ഇവരെ അറസ്റ്റ് ചെയ്തു.

സംസ്ഥാന വ്യാപകമായി പ്രതിഷേധം ശക്തമാക്കാനാണ് യുവമോർച്ചയുടെ തീരുമാനം. നേരത്തേ കൊല്ലത്ത് വെച്ച് കെ. മുരളീധരന്റെ വാഹനവ്യൂഹത്തിന് നേരെയും യുവമോർച്ച കരിങ്കൊടി പ്രതിഷേധം നടത്തിയിരുന്നു.