പാലക്കാട്: ഒറ്റപ്പാലം അനങ്ങനടിയിൽ അധ്യാപികയ്ക്കെതിരേ പരാതി നൽകിയ പത്താം ക്ലാസ് വിദ്യാർഥിനിക്ക് നേരെ ഭീഷണി. പി.ടി.എ. ഫണ്ട് അടയ്ക്കാത്തതിന് അധ്യാപിക അപമാനിച്ചുവെന്ന പരാതി നൽകിയ വിദ്യാർഥിനിയെ കോൺഗ്രസ് നേതാവ് ഭീഷണിപ്പെടുത്തിയതായി രക്ഷിതാക്കൾ ആരോപിച്ചു. പരാതി പിൻവലിച്ചില്ലെങ്കിൽ കുട്ടിക്കെതിരേ കേസ് വരുമെന്ന് പറഞ്ഞായിരുന്നു ഭീഷണിയെന്ന് രക്ഷിതാക്കൾ പറഞ്ഞു.

To advertise here,

ഒറ്റപ്പാലം സ്റ്റേഷനിലാണ് അധ്യാപികയ്ക്കെതിരേ വിദ്യാർഥിനി പരാതി നൽകിയത്. തുടർന്ന് രക്ഷിതാക്കൾ ഇല്ലാത്ത സമയത്ത് കോൺഗ്രസ് നേതാവ് കുട്ടിയുടെ വീട്ടിൽ എത്തി ഭീഷണിപ്പെടുത്തുകയായിരുന്നുവെന്ന് രക്ഷിതാക്കൾ പറഞ്ഞു. അധ്യാപികയോട് മാപ്പ് പറയണമെന്നും കേസ് പിൻവലിക്കണമെന്നുമാണ് കോൺഗ്രസ് നേതാവ് ആവശ്യപ്പെടുന്നതെന്ന് രക്ഷിതാക്കൾ പറഞ്ഞു.

കോൺഗ്രസ് മണ്ഡലം വൈസ് പ്രസിഡന്റിനെതിരേയാണ് പരാതി. പി.ടി.എ. ഫണ്ട് അടയ്ക്കാത്തതിന്റെ പേരിൽ മറ്റു വിദ്യാർഥികൾക്ക് മുമ്പിൽ വെച്ച് പത്താം ക്ലാസ് വിദ്യാർഥിനിയെ അപമാനിച്ചെന്നും ദേഹോപദ്രവമേൽപ്പിച്ചുവെന്നും അധ്യാപികയ്ക്കെതിരേ പരാതി. ഇതേത്തുടർന്ന് കുട്ടി ക്ലാസിൽ ബോധരഹിതയായി വീണുവെന്നും കുട്ടിയെ ആശുപത്രിയിൽ കൊണ്ടുപോകാൻ തയ്യാറായില്ലെന്നും പരാതിയിൽ പറയുന്നു. സംഭവത്തിൽ പൊതുവിദ്യാഭ്യാസ വകുപ്പ് അന്വേഷണം ആരംഭിച്ചിരുന്നു.