തിരുവനന്തപുരം: യൂണിവേഴ്‌സിറ്റി ഹോസ്റ്റലിലുണ്ടായ സംഘർഷത്തിലും തുടർന്നുണ്ടായ പോലീസ് അതിക്രമത്തിലും നിയമസഭയിൽ അടിയന്തര പ്രമേയത്തിന് നോട്ടീസ് നൽകി പ്രതിപക്ഷം. വി. ജോയി എം.എൽ.എയാണ് വിഷയത്തിൽ പ്രമേയാവതരണത്തിന് നോട്ടീസ് നൽകിയത്. സഭയിൽ പ്രമേയാവതരണ വേളയിൽ, പോലീസിന്റെ മർദ്ദനത്തിൽ പൊട്ടിയ ലാത്തിയുടെ ഭാഗം പ്രതിപക്ഷം സഭയിൽ പ്രദർശിപ്പിച്ചു. പിന്നാലെ ഭരണ-പ്രതിപക്ഷാംഗങ്ങൾ തമ്മിൽ വലിയ വാഗ്വാദമാണ് ഉണ്ടായത്. അടിയന്തര പ്രമേയത്തിന് അനുമതി നിഷേധിച്ചതിൽ പ്രതിഷേധിച്ച് പ്രതിപക്ഷം സഭയിൽ നിന്ന് ഇറങ്ങിപ്പോയി.

To advertise here,

തിരുവനന്തപുരത്ത് നടന്നത് 'സർക്കാർ സ്‌പോൺസേർഡ് നരനായാട്ടാ'ണെന്ന് വി. ജോയ് എം.എൽ.എ കുറ്റപ്പെടുത്തി. കന്റോൺമെന്റ് എസ്.ഐ ഗോകുൽ 34 സെക്കൻഡ് കൊണ്ട് 26 തവണയാണ് വിദ്യാർഥികളെ അടിച്ചത്. മർദ്ദിക്കാൻ പോലീസ് ഉപയോഗിച്ച ലാത്തിയുടെ കഷണം സഭയിൽ ഉയർത്തിയാണ് വി. ജോയ് ഇക്കാര്യം ചൂണ്ടിക്കാട്ടിയത്.

സഭയിൽ എം.എൽ.എ ലാത്തിയുടെ ഭാഗം പ്രദർശിപ്പിച്ചതിന് പിന്നാലെ സ്പീക്കർ ഇടപെട്ടു. ലാത്തിയുടെ ഭാഗം വാങ്ങാൻ അദ്ദേഹം വാച്ച് ആൻഡ് വാർഡിനോട് നിർദേശിച്ചു. ലാത്തിയുടെ ഭാഗം പരിശോധിക്കുമെന്നും സ്പീക്കർ സഭയെ അറിയിച്ചു.

അടിയന്തര പ്രമേയത്തോട് പ്രതികരിച്ച ആഭ്യന്തരമന്ത്രി സഭയിൽ കേസിന്റെ വിവരങ്ങൾ വിശദീകരിച്ചു. യൂത്ത് കോൺഗ്രസ്, എസ്.എഫ്.ഐ പ്രവർത്തകർക്കെതിരെ മ്യൂസിയം പോലീസ് സ്റ്റേഷനിൽ കേസുകൾ രജിസ്റ്റർ ചെയ്തതായി രമേശ് ചെന്നിത്തല അറിയിച്ചു. ഇതുകൂടാതെ കന്റോൺമെന്റ്, മെഡിക്കൽ കോളേജ്, പേട്ട തുടങ്ങിയ വിവിധ സ്റ്റേഷനുകളിലായി എട്ട് കേസുകൾ കൂടി ഇതിനോടനുബന്ധിച്ച് പോലീസ് രജിസ്റ്റർ ചെയ്തിട്ടുണ്ടെന്നും ആഭ്യന്തരമന്ത്രി വ്യക്തമാക്കി.

പ്രതിപക്ഷ നേതാക്കൾ പോലീസ് ഉദ്യോഗസ്ഥരെയും അവരുടെ കുടുംബങ്ങളെയും വധിക്കുമെന്ന് ഭീഷണിപ്പെടുത്തിയതായി ആരോപിച്ച മന്ത്രി, കന്റോൺമെന്റ് സി.ഐയും എസ്.ഐയും ജോലി കഴിഞ്ഞ് വീട്ടിൽ പോകുമ്പോൾ കുഞ്ഞുങ്ങളെ താലോലിക്കാൻ കഴിയാതെ ഇല്ലാതാക്കിക്കളയുമെന്ന് കടകംപള്ളി സുരേന്ദ്രൻ പരസ്യമായി ഭീഷണിപ്പെടുത്തിയ കാര്യവും സഭയിൽ ചൂണ്ടിക്കാട്ടി. താൻ മുമ്പ് രണ്ടര വർഷക്കാലം ആഭ്യന്തര മന്ത്രിയായിരുന്ന കാലയളവിൽ കേരള പോലീസ് ആക്ട് അനുസരിച്ച് ആരുടെയും തലയ്ക്കടിക്കരുതെന്ന് വ്യക്തമായ നിർദ്ദേശമുണ്ടായിരുന്ന കാര്യവും ചെന്നിത്തല ഓർമ്മിപ്പിച്ചു.

പോലീസുകാരെ കൊല്ലുമെന്ന് താൻ പറഞ്ഞിട്ടില്ലെന്നും, ലാത്തികൊണ്ട് തലയ്ക്കടിച്ചാൽ അത് കൊലപാതകത്തിൽ കലാശിക്കുമെന്നാണ് താൻ ചൂണ്ടിക്കാണിച്ചതെന്നും വി. ജോയ് സഭയിൽ വിശദീകരിച്ചു. ഏതെങ്കിലും ഒരു സാഹചര്യത്തിൽ ഏതെങ്കിലും പോലീസ് ഉദ്യോഗസ്ഥന്റെ പേരെടുത്തു പറഞ്ഞ് കൊല്ലുമെന്ന് താൻ പറഞ്ഞിട്ടുണ്ടെന്ന് തെളിയിച്ചാൽ എം.എൽ.എ സ്ഥാനം രാജിവെക്കാൻ തയ്യാറാണെന്നും ജോയ് വെല്ലുവിളിച്ചു.