
കൊല്ലം: വരുമാനച്ചോർച്ച തടയുന്നതിന് ടിക്കറ്റ് പരിശോധന കർശനമാക്കാൻ റെയിൽവേ. ഇളവുകൾ ഉപയോഗിച്ച് ബുക്കുചെയ്ത ടിക്കറ്റുകൾ, പ്രത്യേക റിസർവേഷൻ ക്വാട്ടകളിൽ ബുക്കുചെയ്ത ടിക്കറ്റുകൾ എന്നിവയെല്ലാം കൃത്യമായി പരിശോധിക്കാൻ നിർദേശം നൽകി. ഗ്രൂപ്പായി ബുക്ക് ചെയ്യുന്ന ടിക്കറ്റുകളിൽ എല്ലാ യാത്രക്കാരുടെയും തിരിച്ചറിയൽ രേഖ പരിശോധിക്കും.
വരുമാനച്ചോർച്ച തടയുന്നതിനും ക്വാട്ട, ഇളവ്, പാസ് എന്നിവയുടെ ദുരുപയോഗം ഒഴിവാക്കുന്നതിനുമാണ് നടപടി. ഏജന്റുമാരുടെ അതിപ്രസരംമൂലം ക്രമക്കേടുകൾ വ്യാപകമായതായി വിലയിരുത്തലുമുണ്ട്.
ഒക്ടോബർ ഒന്നുമുതൽ 31 വരെ പ്രത്യേക ടിക്കറ്റ് പരിശോധനാ ഡ്രൈവ് നടത്താനാണ് ദക്ഷിണ റെയിൽവേയും റെയിൽവേ ബോർഡും നിർദേശം നൽകിയിരിക്കുന്നത്. ടിക്കറ്റിൽ ഉൾപ്പെട്ട യാത്രക്കാരിൽ കുറഞ്ഞത് ഒരാളെങ്കിലും നിർദേശിച്ചിട്ടുള്ള യഥാർഥ തിരിച്ചറിയൽ രേഖ കൈവശംെവച്ചിട്ടില്ലെങ്കിൽ, ആ ടിക്കറ്റിലെ എല്ലാ യാത്രക്കാരും ടിക്കറ്റില്ലാതെ യാത്രചെയ്യുന്നവരായി കണക്കാക്കും.
ഇവരിൽനിന്ന് പിഴയീടാക്കും. ഇളവ് അല്ലെങ്കിൽ പ്രത്യേക റിസർവേഷൻ ക്വാട്ടയിൽ ബുക്ക് ചെയ്ത യാത്രക്കാരൻ, അർഹത തെളിയിക്കുന്ന യഥാർഥ രേഖ കൈവശംവയ്ക്കണം. ടിക്കറ്റ് പരിശോധകർ ഇക്കാര്യങ്ങൾ കണ്ട് ഉറപ്പുവരുത്തണമെന്നാണ് നിർദേശം.
റെയിൽവേ ജീവനക്കാർക്കും പെൻഷൻകാർക്കും വേണ്ടിയുള്ള ഡിജിറ്റൽ പാസ് ഉപയോഗിച്ച് യാത്രചെയ്യുന്നവരിൽ ഒരാളുടെ കൈവശമെങ്കിലും നിർദേശിച്ചിട്ടുള്ള യഥാർഥ തിരിച്ചറിയൽ രേഖ ഉണ്ടായിരിക്കണം. റിസർവേഷൻ ഇല്ലാത്ത ടിക്കറ്റുകൾ യഥാർഥമാണെന്ന് ടി.ടി.ഇ. ആപ്പ് ഉപയോഗിച്ച് ഉറപ്പാക്കണം.
പരിശോധനാ ഡ്രൈവിന്റെ വിവരങ്ങൾ ദിവസേന നിശ്ചിത ഗൂഗിൾ ഷീറ്റിൽ അപ്ഡേറ്റ് ചെയ്യണമെന്ന് പറഞ്ഞിട്ടുണ്ട്. പ്രത്യേക ഡ്രൈവിനിടെ കണ്ടെത്തുന്ന എല്ലാ കേസുകളും സംഭവങ്ങളും ദിവസവും ബന്ധപ്പെട്ട ഓഫീസിനെ അറിയിക്കണം. ഡ്രൈവ് അവസാനിച്ചതിനുശേഷം 10 ദിവസത്തിനുള്ളിൽ സംക്ഷിപ്ത റിപ്പോർട്ട് സമർപ്പിക്കണമെന്നും നിർദേശിച്ചിട്ടുണ്ട്.
Published: 02 Oct 2026, 07:59 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..


Most Commented