തൃശ്ശൂർ: രാജ്യത്ത് ഏറ്റവും കൂടുതൽ സൗരോർജം ഉപയോഗിക്കുന്ന ഗ്രാമപ്പഞ്ചായത്തായ പെരിഞ്ഞനം പുതിയൊരു കാൽവെപ്പിനൊരുങ്ങുകയാണ്. ഇവിടെ വീടുകളിലും കെട്ടിടങ്ങളിലും പ്രതിമാസം ഉത്പാദിപ്പിക്കുന്ന 3.16 മെഗാവാട്ട് സൗരോർജം സ്വന്തം നിലയിൽ സംഭരിച്ച് വില കൂടുതലുള്ള രാത്രിസമയത്ത് വൈദ്യുതിവകുപ്പിന് വിൽക്കാനുള്ള പൈലറ്റ് പദ്ധതിയാണ് നടപ്പാക്കുന്നത്. ബാറ്ററി എനർജി സ്റ്റോറേജ് സിസ്റ്റം (ബെസ്സ്) എന്നാണ് പേര്. ഇതിനായി ഒരു വമ്പൻ ലിഥിയം ബാറ്ററിയിൽ പകൽ ഉത്പാദിപ്പിക്കുന്ന സൗരോർജം സംഭരിക്കും. പദ്ധതിക്കായി കേരള സർക്കാർ രണ്ടു കോടി രൂപ അനുവദിച്ചു. രാജ്യത്തെ ഇത്തരത്തിലുള്ള ആദ്യ പദ്ധതിയാണിത്.

To advertise here,

ഇപ്പോൾ നേരിട്ടുള്ള സൗരോർജ വിതരണത്തിൽ വൈദ്യുതിവകുപ്പ് ഒരു യൂണിറ്റിന് ശരാശരി 3.04 രൂപയാണ് നൽകുന്നത്. ഏറ്റവും ചെലവേറിയ സമയത്ത് സൗരോർജം നൽകിയാൽ യൂണിറ്റിന് ഏഴു രൂപ കിട്ടും.

പെരിഞ്ഞനം ഗ്രാമപ്പഞ്ചായത്ത് സൗരോർജ വിപ്ലവത്തിന് തുടക്കമിട്ടത് 2018-ലാണ്. സി.പി.എം. നേതാവും അന്ന് പഞ്ചായത്ത് പ്രസിഡന്റുമായിരുന്ന കെ.കെ. സച്ചിത് ആണ് പദ്ധതിയുടെ ശിൽപി. വീടുകളുടെയും കെട്ടിടങ്ങളുടെയും മേൽക്കൂരകളിൽ സൗരോർജ പാനലുകൾ സ്ഥാപിച്ച് ഊർജ സ്വയംപര്യാപ്തത സൃഷ്ടിച്ചു. 500 കിലോവാട്ടിന്റെ പദ്ധതി എത്തിനിൽക്കുന്നത് പ്രതിമാസം 3.16 മെഗാവാട്ട് സൗരോർജോത്പാദനത്തിൽ. പഞ്ചായത്തിലെ 860 വീടുകളും നൂറിലേറെ സ്ഥാപനങ്ങളും പങ്കാളികളായി. ഇവർക്ക് പെരിഞ്ഞനം സഹകരണ ബാങ്ക് ഈടില്ലാ വായ്പ നൽകി. നാലു വർഷംകൊണ്ട് എല്ലാവരും വായ്പ അടച്ചുതീർത്തു. ഇപ്പോൾ വരുമാനം കിട്ടുന്നുണ്ട്. സർക്കാർ സ്‌കൂളിന് മുകളിലെ പാനലിൽനിന്ന് ഉത്പാദിപ്പിക്കുന്ന 9.5 കിലോവാട്ട് വൈദ്യുതിയിലാണ് പഞ്ചായത്തിലെ 800 വഴിയോര വൈദ്യുത വിളക്കുകൾ പ്രകാശിക്കുന്നത്. ഇതുവഴി വഴിയോര വിളക്കിനായി ചെലവഴിച്ചിരുന്ന വൈദ്യുതിപ്പണം 90,000-ത്തിൽനിന്ന് 32,000 ആയി.