കൊച്ചി/തിരുവനന്തപുരം: സി.എം.ആർ.എൽ. - എക്സാലോജിക് സാമ്പത്തിക ഇടപാടിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി.) സമർപ്പിച്ച റിപ്പോർട്ടിന്റെ അടിസ്ഥാനത്തിൽ മുഖ്യമന്ത്രി പിണറായി വിജയനൊപ്പം മകൾ വീണ ടി., ഭർത്താവും മുൻ പൊതുമരാമത്ത് വകുപ്പ് മന്ത്രിയുമായ മുഹമ്മദ് റിയാസ് എന്നിവർക്കെതിരേ അന്വേഷണം നടത്താൻ തീരുമാനമായി. എക്സാലോജിക് ഇടപാടിന് പുറമേ മറ്റ് കോടിക്കണക്കിന് രൂപയുടെ സാമ്പത്തിക ഇടപാടുകളെക്കുറിച്ചുള്ള വിവരങ്ങളും ഇ.ഡി. നൽകിയ റിപ്പോർട്ടിലുണ്ട്. കേസിൽ എഫ്.ഐ.ആർ. രജിസ്റ്റർ ചെയ്തായിരിക്കും അന്വേഷണം മുന്നോട്ട് കൊണ്ടുപോകുക.

To advertise here,

കേസിലെ അന്വേഷണ ചുമതല വിജിലൻസിന് കൈമാറുന്നതിന് പകരം സംസ്ഥാന പോലീസിന് നൽകാനാണ് നീക്കം നടക്കുന്നത്. പ്രധാനമായും ഹവാല പണമിടപാടുകൾ അന്വേഷിക്കാനാണ് സർക്കാർ ഉദ്ദേശിക്കുന്നത്. ഇതിനായി ക്രൈം ബ്രാഞ്ചിന്റെയും ഇക്കണോമിക് ഒഫൻസ് വിങ്ങിന്റെയും ചുമതലയുള്ള ഉദ്യോഗസ്ഥരെ ഉൾപ്പെടുത്തി പ്രത്യേക അന്വേഷണ സംഘം (എസ്.ഐ.ടി.) രൂപീകരിച്ചേക്കും.

എച്ച്. വെങ്കടേഷ് ഈ അന്വേഷണ സംഘത്തിന് നേതൃത്വം നൽകാനാണ് സാധ്യത. പി.എസ്.സി. തട്ടിപ്പ് അന്വേഷണത്തിന് നേതൃത്വം നൽകുന്നതിനൊപ്പം ഇക്കണോമിക് ഒഫൻസ് വിങ്, ക്രൈം ബ്രാഞ്ച് നോർത്ത് സോൺ എന്നിവയുടെ ചുമതല വഹിക്കുന്ന അജിത ബീഗം ഉൾപ്പെടെയുള്ള ഉദ്യോഗസ്ഥരും ഈ പ്രത്യേക സംഘത്തിലുണ്ടായേക്കുമെന്നാണ് കരുതുന്നത്.

നേരത്തെ ഇ.ഡി. റിപ്പോർട്ടിന്മേൽ അന്വേഷണം നടത്തുന്നതിൽ തെറ്റില്ലെന്നാണ് അഡ്വക്കേറ്റ് ജനറൽ (എ.ജി.) ആഭ്യന്തര വകുപ്പിന് കൈമാറിയ നിയമോപദേശത്തിലുണ്ടായിരുന്നു. എന്നാൽ, ഏതു തരത്തിലുള്ള അന്വേഷണം വേണമെന്ന കാര്യത്തിൽ തീരുമാനമെടുക്കേണ്ടത് സർക്കാരാണെന്ന് ചൂണ്ടിക്കാട്ടിയിരുന്നു.