ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരെ ലോക്‌സഭാ പ്രതിപക്ഷ നേതാവ് രാഹുൽ ഗാന്ധി നടത്തിയ 'മൊഗാംബോ മോദി' പരാമർശത്തിനെതിരെ കടുത്ത വിമർശനവുമായി കേന്ദ്ര വിദ്യാഭ്യാസ മന്ത്രി പ്രൽഹാദ് ജോഷി. ഒരു ജനാധിപത്യ വ്യവസ്ഥ എങ്ങനെയാണ് പ്രവർത്തിക്കുന്നതെന്ന് മനസ്സിലാക്കാൻ രാഹുൽ ഗാന്ധിക്ക് ഇതുവരെ സാധിച്ചിട്ടില്ലെന്ന് മന്ത്രി കുറ്റപ്പെടുത്തി. തിരഞ്ഞെടുപ്പുകളിൽ വിജയിക്കുമ്പോൾ ഭരണഘടനാ സ്ഥാപനങ്ങളെ പുകഴ്ത്തുകയും, ജനങ്ങൾ തള്ളിക്കളയുമ്പോൾ 'മൊഗാംബോ' എന്നും 'വോട്ട് ചോരി' എന്നും വിളിച്ച് അപലപിക്കുന്നത് രാഹുലിന്റെ പതിവാണെന്ന് അദ്ദേഹം പരിഹസിച്ചു.

To advertise here,

ഇത്തരം കുട്ടിത്തം നിറഞ്ഞ നിലപാടുകളും ബോളിവുഡ് സങ്കൽപ്പങ്ങളിലുള്ള അധിക്ഷേപങ്ങളും രാഹുൽ ഗാന്ധിയെ ബുദ്ധിമാനാക്കില്ലെന്നും പകരം പ്രതിപക്ഷത്തിന് വ്യക്തമായ നയപരമായ ബദലുകളില്ലെന്ന് തുറന്നുകാട്ടുക മാത്രമാണ് ചെയ്യുന്നതെന്നും അദ്ദേഹം പറഞ്ഞു. നരേന്ദ്ര മോദിക്കും സർക്കാരിനും വോട്ട് നൽകി വിജയിപ്പിച്ച കോടിക്കണക്കിന് വോട്ടർമാരുടെ ബുദ്ധിയെയും വിവേകത്തെയുമാണ് രാഹുൽ ഗാന്ധി അധിക്ഷേപിക്കുന്നത്. സ്വന്തം രാഷ്ട്രീയ പരാജയങ്ങൾ മറച്ചുവെക്കാൻ ഇത്തരം വിലകുറഞ്ഞ ക്ലിക്ക്ബൈറ്റ് തന്ത്രങ്ങളെ ആശ്രയിക്കുന്നത് അവസാനിപ്പിച്ച് വളരാൻ രാഹുൽ തയ്യാറാകണം. നിരന്തരമായ മീം പ്രകടനങ്ങൾക്ക് പകരം ഗൗരവമുള്ള ഒരു പ്രതിപക്ഷത്തെയാണ് ഇന്ത്യ അർഹിക്കുന്നതെന്നും അദ്ദേഹം എക്സിൽ പങ്കുവെച്ച കുറിപ്പിൽ വ്യക്തമാക്കി.

സി.ജെ.പി പ്രവർത്തകർക്കുനേരെ നടന്ന പോലീസ് നടപടിയെയും ആയിരക്കണക്കിന് ആളുകളെ കസ്റ്റഡിയിലെടുത്തതിനെയും ഇന്റർനെറ്റ് വിച്ഛേദിച്ചതിനെയും ചോദ്യം ചെയ്ത രാഹുൽ ഗാന്ധി, 'മൊഗാംബോ മോദി ജനാധിപത്യത്തെ തകർക്കുകയാണെന്ന്' ആരോപിച്ചിരുന്നു. 1987-ൽ പുറത്തിറങ്ങിയ 'മിസ്റ്റർ ഇന്ത്യ' എന്ന പ്രശസ്ത ഹിന്ദി ചലച്ചിത്രത്തിൽ നടൻ അമരീഷ് പുരി അവതരിപ്പിച്ച ഐക്കണിക് വില്ലൻ കഥാപാത്രമാണ് മൊഗാംബോ. സൈനിക മാതൃകയിലുള്ള യൂണിഫോമും, ഭയം ജനിപ്പിക്കുന്ന വ്യക്തിത്വവും, 'മൊഗാംബോ ഖുശ് ഹുവാ' എന്ന പ്രശസ്തമായ സംഭാഷണവും കൊണ്ട് ശ്രദ്ധേയനായ ഈ കഥാപാത്രം ക്രൂരത, അഹങ്കാരം, അധികാരത്തോടുള്ള അമിത ആസക്തി, ഏകാധിപത്യ മനോഭാവം എന്നിവയുടെ പ്രതീകമായാണ് അറിയപ്പെടുന്നത്.