ന്യൂഡല്‍ഹി: ഇന്ത്യക്കുമേല്‍ യുഎസ് ചുമത്തിയ അധികത്തീരുവയെത്തുടര്‍ന്ന് തിരുപ്പൂര്‍ ഉള്‍പ്പെടെയുള്ള മേഖലകളിലെ തുണിത്തര നിര്‍മാതാക്കള്‍ ഉത്പാദനം നിര്‍ത്തിവെച്ചതായി ഫെഡറേഷന്‍ ഓഫ് ഇന്ത്യന്‍ എക്‌സ്‌പോര്‍ട്ട് ഓര്‍ഗനൈസേഷന്‍സ് (എഫ്‌ഐഇഒ). പുറംരാജ്യങ്ങളിലെ എതിരാളികള്‍ക്കു മുന്നില്‍ പിടിച്ചുനില്‍ക്കാനാവാതെവന്നതോടെയാണ് നടപടി.
തിരുപ്പൂര്‍, നോയിഡ, സൂറത്ത് എന്നിവിടങ്ങളിലെ വസ്ത്ര, തുണിത്തര നിര്‍മാതാക്കളാണ് ഉത്പാദനം നിര്‍ത്തിവെച്ചത്. വിയറ്റ്‌നാം, ബംഗ്ലാദേശ് തുടങ്ങിയ രാജ്യങ്ങളില്‍നിന്നുള്ള കുറഞ്ഞ ചെലവില്‍ തുണിത്തരങ്ങള്‍ നിര്‍മിക്കുന്ന എതിരാളികള്‍ക്ക് മുന്നില്‍ ഈ സ്ഥാപനങ്ങള്‍ക്ക് പിടിച്ചുനില്‍ക്കാനാവാത്തതാണ് കാരണം.
ഇന്ത്യന്‍ സമുദ്രോത്പന്ന കയറ്റുമതിയുടെ ഏതാണ്ട് 40 ശതമാനവും യുഎസ് വിപണിയിലായതിനാല്‍ തീരുവ വര്‍ധന സ്റ്റോക്കുകളില്‍ നഷ്ടത്തിനും വിതരണ ശൃംഖലയിലെ തടസ്സങ്ങൾക്കും കര്‍ഷകരുടെ ദുരിതത്തിനും കാരണമാകുമെന്നും എഫ്‌ഐഇഒ പ്രസിഡന്റ് എസ്.സി. റല്‍ഹാന്‍ അറിയിച്ചു.
അതേസമയം, യുഎസ് തീരുവ ഉയർത്തുന്ന വലിയ വെല്ലുവിളി മറികടക്കാൻ സർക്കാരിൽനിന്ന് അടിയന്തര സഹായം വേണമെന്ന് കോൺഫെഡറേഷൻ ഓഫ് ഇന്ത്യൻ ടെക്സ്റ്റൈൽ ഇൻഡസ്ട്രി (സിഐടിഐ) അറിയിച്ചു. ഇന്ത്യയിലെ വസ്ത്ര, തുണിത്തര കയറ്റുമതിക്കാരുടെ ഭാവിയും രാജ്യത്തിനുണ്ടാകുന്ന വിദേശനാണ്യ നഷ്ടവും മാത്രമല്ല, ഈ മേഖലയിലെ എണ്ണമറ്റ തൊഴിലവസരങ്ങളും 2030-ഓടെ 100 ബില്യൺ ഡോളറിന്റെ വസ്ത്ര, തുണിത്തര കയറ്റുമതി എന്ന ദേശീയ ലക്ഷ്യം കൈവരിക്കാനുള്ള സാധ്യതകളുമാണ് പ്രതിസന്ധിയിലാകുന്നതെന്നും സിഐടിഐ അറിയിച്ചു.
Content Highlights: Indian Textile Production Halted as US Tariffs Reach 50%
Published: 27 Aug 2025, 12:32 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented