ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെയും ബി.ജെ.പിയെയും രൂക്ഷമായി വിമർശിച്ച് ഐസ നേതാവ് നേഹ ബോറ. രാജ്യത്തെ പൗരന്മാരുടെ ജനാധിപത്യ അവകാശങ്ങൾ ഹനിക്കാൻ അനുവദിക്കില്ലെന്നും ഇലക്ഷൻ കമ്മീഷന്റെ നടപടികൾ ജനാധിപത്യത്തെ തകർക്കുന്നതാണെന്നും അവർ ആരോപിച്ചു. ചീഫ് ഇലക്ഷൻ കമ്മീഷണർ എന്ന പദവി ഉപേക്ഷിച്ച് ബി.ജെ.പിയുടെ 'ഇലക്ഷൻ മാനേജർ' എന്ന് സ്വയം പ്രഖ്യാപിക്കുകയാണ് ഗ്യാനേഷ് കുമാർ ചെയ്യേണ്ടതെന്നും നേഹ വിമർശിച്ചു.

To advertise here,

ഇന്ത്യൻ സ്വാതന്ത്ര്യസമര കാലഘട്ടത്തിൽ ബ്രിട്ടീഷുകാർ അവലംബിച്ച അതേ അടിച്ചമർത്തൽ തന്ത്രങ്ങളാണ് ഇന്നത്തെ ഭരണകൂടവും സ്വീകരിക്കുന്നതെന്ന് നേഹ കുറ്റപ്പെടുത്തി. സ്വാതന്ത്ര്യസമര സേനാനികളെക്കൊണ്ട് 'പീസ് ബോണ്ട്' ഒപ്പുവെപ്പിച്ച് ജയിലിലടച്ച ബ്രിട്ടീഷുകാരുടെ അതേ പാത പിന്തുടർന്ന്, ഇന്ന് ജനാധിപത്യത്തിനായി പോരാടുന്ന സാധാരണക്കാരെ ഭരണകൂടം വേട്ടയാടുകയാണ്. ദേശീയ പതാകയേന്തി തെരുവിലിറങ്ങിയ ജനങ്ങൾക്ക് നേരെ ലാത്തിച്ചാർജ് നടത്തുകയും സ്ത്രീകളെ ലൈംഗികമായി അതിക്രമിക്കുകയും ചെയ്ത സംഭവം ആർ.എസ്.എസിന്റെയും ബി.ജെ.പിയുടെയും ചരിത്രമാണ് കാണിക്കുന്നതെന്നും അവർ ആരോപിച്ചു.

വോട്ടർ പട്ടികയിൽ നടത്തുന്ന ക്രമക്കേടുകളെയും അട്ടിമറികളെയും പറ്റി വളരെ ഗുരുതരമായ ആരോപണങ്ങളാണ് പ്രസംഗത്തിൽ ഉയർന്നുവന്നത്. പുതിയ വോട്ടർമാർക്ക് മാത്രം ബാധകമായ 'ഫോം 6' നിലവിലുള്ള വോട്ടർമാരെക്കൊണ്ട് നിർബന്ധപൂർവ്വം പൂരിപ്പിക്കുന്ന നിയമവിരുദ്ധ നടപടികൾ നടക്കുന്നുണ്ട്. ഇതിനുപുറമെ, വോട്ടർമാരുടെ പേരുകൾ ഒഴിവാക്കാനായി 'ഫോം 7' ഉപയോഗിക്കുന്നതും വോട്ടർമാരുടെ വിവരങ്ങൾ തിരുത്താനായി 'ഫോം 8' ദുരുപയോഗം ചെയ്യുന്നതും വോട്ടർമാരുടെ അവകാശങ്ങൾക്ക്മേലുള്ള കടന്നുകയറ്റമാണെന്ന് അവർ പറഞ്ഞു.