ആന്ധ്രപ്രദേശിലെ അനന്തപുർ ജില്ലയിലുള്ള രാപ്താട് ജില്ലാ പരിഷത്ത് ഹൈസ്കൂളിൽ നടന്ന ഞെട്ടിക്കുന്ന ആക്രമണത്തെത്തുടർന്ന് സിനിമയിലെ ഹിംസയെക്കുറിച്ചുള്ള ചർച്ചകൾ വീണ്ടും സജീവമായി. സിനിമകളിലെ അക്രമ രംഗങ്ങളാണോ യഥാർഥ ജീവിതത്തിലെ കുറ്റകൃത്യങ്ങൾക്ക് കാരണം എന്ന വിഷയത്തിലുള്ള ചർച്ചയിൽ തന്റെ നിലപാട് വ്യക്തമാക്കിയിരിക്കുകയാണ് സംവിധായകൻ രാംഗോപാൽ വർമ. യഥാർഥ ജീവിതത്തിലെ കുറ്റകൃത്യങ്ങൾക്ക് സിനിമകളെ കുറ്റപ്പെടുത്തുന്നതിനെ അദ്ദേഹം പൂർണ്ണമായും തള്ളിക്കളഞ്ഞു.

To advertise here,

"കുറ്റകൃത്യങ്ങൾ വർധിക്കുന്നതിന് സിനിമകളെ കുറ്റപ്പെടുത്തുന്നത് തട്ടിക്കൊണ്ടുപോകലുകൾ വർധിക്കുന്നതിന് രാമായണത്തെ കുറ്റപ്പെടുത്തുന്നത് പോലെയാണ്" എന്ന് അദ്ദേഹം സോഷ്യൽ മീഡിയ പ്ലാറ്റ്‌ഫോമായ X-ൽ കുറിച്ചു. ചലച്ചിത്ര മേഖലയിലെ അക്രമ ചിത്രീകരണങ്ങളും യഥാർത്ഥ കുറ്റകൃത്യങ്ങളും തമ്മിൽ നേരിട്ട് ബന്ധിപ്പിക്കുന്നതിനോട് അദ്ദേഹം പൂർണമായി വിയോജിച്ചു.

എന്നാൽ രാം ഗോപാൽ വർമ്മയുടെ ഈ ഉപമ സോഷ്യൽ മീഡിയയിൽ വലിയ വിമർശനങ്ങൾക്കും പ്രതിഷേധങ്ങൾക്കും കാരണമായി. പുസ്തകങ്ങൾക്ക് മനുഷ്യന്റെ ചിന്തകളെ മാറ്റാൻ കഴിയുമെങ്കിൽ എന്തുകൊണ്ട് സിനിമകൾക്ക് കഴിയില്ലെന്ന് വിമർശകർ ചോദ്യം ചെയ്തു. രാമായണത്തിൽ തട്ടിക്കൊണ്ടുപോകലിനെ മഹത്വവത്കരിക്കുന്നില്ലെന്നും അത്തരം കഥാപാത്രങ്ങളെ മോശമായി തന്നെയാണ് കാണിക്കുന്നതെന്നും ഉപയോക്താക്കൾ ചൂണ്ടിക്കാട്ടി. നേരെമറിച്ച്, ചലച്ചിത്ര രംഗം അക്രമങ്ങളെയും ക്രൂരന്മാരായ കഥാപാത്രങ്ങളെയും ഹീറോകളായി മഹത്വവത്കരിക്കുകയാണ് ചെയ്യുന്നതെന്ന് അവർ ആരോപിച്ചു.

കൊലപാതകങ്ങളും ക്രൂരമായ അക്രമങ്ങളും സിനിമകളിൽ 'കൂൾ' ആയും ഹീറോയിക് ആയും ചിത്രീകരിക്കുന്നത് കുട്ടികളുടെ വളർച്ചയെ ദോഷകരമായി ബാധിക്കുന്നുണ്ടെന്ന് സോഷ്യൽ മീഡിയ ഉപയോക്താക്കൾ അഭിപ്രായപ്പെട്ടു. സിനിമകൾ നേരിട്ട് കുറ്റകൃത്യങ്ങൾക്ക് കാരണമാകുന്നുവെന്ന് ആരും പറയുന്നില്ല, എന്നാൽ സിനിമയ്ക്ക് സമൂഹത്തിൽ യാതൊരു സ്വാധീനവുമില്ലെന്ന് നടിക്കുന്നത് അതിലും വലിയ മണ്ടത്തരമാണ്. സിനിമകൾക്ക് സമൂഹത്തിന്റെ കാഴ്ചപ്പാടുകളെ രൂപപ്പെടുത്താനും, അക്രമപരമായ പെരുമാറ്റങ്ങളെ സ്വാഭാവികമാക്കാനും, പ്രേക്ഷകർ ആഘോഷിക്കുന്ന കാര്യങ്ങളെ സ്വാധീനിക്കാനും സാധിക്കുമെന്നും അവർ വ്യക്തമാക്കി. സിനിമകൾ നേരിട്ട് കുറ്റകൃത്യങ്ങൾക്ക് കാരണമാകുന്നില്ലെങ്കിലും, അവ സമൂഹത്തിൽ ചെലുത്തുന്ന വലിയ സ്വാധീനത്തെ പൂർണ്ണമായി തള്ളിക്കളയാൻ കഴിയില്ലെന്നാണ് ഉയർന്നുവന്ന പ്രധാന വാദം.

അനന്തപുർ ജില്ലയിലെ റാപ്താഡു ജില്ലാ പരിഷത്ത് ഹൈസ്കൂളിൽ നടന്ന ഞെട്ടിക്കുന്ന ആക്രമണത്തെത്തുടർന്നാണ് ഈ വിവാദങ്ങൾ ഉണ്ടായത്. 21-കാരനായ ഹേമന്ത് എന്നയാൾ ക്ലാസ് മുറിയിൽ അതിക്രമിച്ചുകയറി പത്താം ക്ലാസ് വിദ്യാർത്ഥിനിയെ ചെയിൻസോ (Chainsaw) ഉപയോഗിച്ച് ആക്രമിക്കുകയും മുഖത്തും തലയിലും കഴുത്തിലും ഗുരുതരമായി പരിക്കേൽപ്പിക്കുകയും ചെയ്യുകയായിരുന്നു. ശനിയാഴ്ച രാവിലെ 10 മണിയോടെയാണ് വിദ്യാർത്ഥിനിക്ക് നേരെ ആക്രമണമുണ്ടായത്. മുഖത്തും തലയിലും കഴുത്തിലും സാരമായ പരിക്കേറ്റ പെൺകുട്ടിയെ രക്ഷിക്കാൻ ശ്രമിക്കുന്നതിനിടെ മറ്റൊരു വിദ്യാർത്ഥിക്കും പരിക്കേറ്റിട്ടുണ്ട്.

പരിക്കേറ്റ വിദ്യാർത്ഥിനിയെ

ആദ്യം അനന്തപൂർ സർക്കാർ ജനറൽ ആശുപത്രിയിലും പിന്നീട് കൂടുതൽ വിദഗ്ധ ചികിത്സയ്ക്കായി ബംഗളൂരുവിലെ മണിപ്പാൽ ആശുപത്രിയിലേക്കും മാറ്റി. ഈ ക്രൂരമായ ആക്രമണത്തെ ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു അപലപിക്കുകയും കുട്ടിയുടെ ചികിത്സാ പുരോഗതി നേരിട്ട് വിലയിരുത്തുന്നുണ്ടെന്ന് വ്യക്തമാക്കുകയും ചെയ്തു.