ടൈം ട്രാവൽ പ്രമേയമാക്കി ഒരുങ്ങുന്ന മലയാള ചിത്രം 'ഒറിജിനൽ' തിയേറ്റർ റിലീസിന് ഒരുങ്ങുന്നു. ചിത്രത്തിന്റെ ട്രെയ്‌ലർ ലോഞ്ച് കാക്കനാട് രാജഗിരി കോളേജിൽ നടന്നു. സിനിമയുടെ റിലീസിന് മുന്നോടിയായി നടന്ന ട്രെയ്‌ലർ ലോഞ്ചിൽ പതിവ് കാഴ്ചകൾക്ക് പകരം താരങ്ങൾക്കൊപ്പം വിദ്യാർഥികളും അണിനിരന്നു. കോളേജ് വിദ്യാർഥികൾക്കൊപ്പം താരങ്ങളും അണിയറപ്രവർത്തകരും ചേർന്നാണ് ട്രെയ്‌ലർ ലോഞ്ച് ചെയ്തത്. സിനിമയെ നേരിട്ട് യുവപ്രേക്ഷകരിലേക്ക് എത്തിക്കുന്ന വേറിട്ട ആശയം ക്യാമ്പസിലും സാമൂഹ്യമാധ്യമങ്ങളിലും വലിയ ആവേശമാണ് സൃഷ്ടിച്ചത്.

To advertise here,

മറ്റ് ട്രെയ്‌ലർ ലോഞ്ചുകളിൽനിന്ന് വ്യത്യസ്തമായി കോളേജ് ക്യാമ്പസിനെ വേദിയാക്കിയായിരുന്നു 'ഒറിജിനൽ' ട്രെയ്‌ലർ ലോഞ്ച്. 'നമ്മൾ സമയവുമായി കളിച്ചാൽ, സമയം എന്തായാലും തിരിച്ച് കളിക്കും', എന്ന ആശയത്തെ ആസ്പദമാക്കിയാണ് ചിത്രത്തിന്റെ ട്രെയ്‌ലർ പുറത്തിറക്കിയിരിക്കുന്നത്. 'If you mess with time, it tends to mess back' എന്ന ഡയലോഗിനോടൊപ്പം ഉദ്വേഗം നിറഞ്ഞ മുഹൂർത്തങ്ങളും കൗതുകമുണർത്തുന്ന രംഗങ്ങളുമാണ് ട്രെയ്‌ലറിൽ ഉൾപ്പെടുത്തിയിരിക്കുന്നത്. അടുത്തതായി എന്താണ് സംഭവിക്കാൻ പോകുന്നത് എന്ന ആകാംക്ഷ പ്രേക്ഷകരിൽ സൃഷ്ടിക്കുന്ന തരത്തിലാണ് ട്രെയ്‌ലർ പ്രേക്ഷകരിലെത്തുന്നത്.

യുവാവായ റിജിന്റെ സിനിമാമോഹവും അയാളുടെ ജീവിതത്തിൽ സംഭവിക്കുന്ന വ്യത്യസ്തമായ സംഭവവികാസങ്ങളുമാണ് ചിത്രത്തിന്റെ പ്രമേയം. ടൈം ട്രാവൽ, ഫാന്റസി, ഹാസ്യം, ത്രില്ലർ, വൈകാരിക മുഹൂർത്തങ്ങൾ എന്നിവ സമന്വയിപ്പിക്കുന്ന ചിത്രത്തിന്റെ ലോകത്തെ കൂടുതൽ പരിചയപ്പെടുത്തുന്നതാണ് ട്രെയ്‌ലർ. നേരത്തെ പുറത്തിറങ്ങിയ ടീസറിനും ഗാനങ്ങൾക്കും പിന്നാലെയാണ് ചിത്രത്തിന്റെ കഥയിലേക്കുള്ള കൂടുതൽ സൂചനകൾ നൽകിക്കൊണ്ട് ട്രെയിലർ എത്തിയിരിക്കുന്നത്.

റമീസ് എഴുതി സംവിധാനം ചെയ്യുന്ന ചിത്രത്തിൽ ശ്രീനാഥ് ഭാസി നായകനാകുന്നു. അഭിരാം രാധാകൃഷ്ണൻ, രാജേഷ് മാധവൻ, സാഫ് ബോയ്, ബിനു പപ്പു, ഫെമിന ജോർജ്, ശ്രീകാന്ത് വെട്ടിയാർ, ഗോകുലൻ, അനീഷ് ജി, സലീം ഹസൻ, ദിനേശ് പ്രഭാകർ, രാജേഷ് പറവൂർ, ഷമീർ (ചൂരൽ), സുബിൻ ടാർസൻ, അരുൺ പ്രദീപ്, ലാല മലപ്പുറം, സ്റ്റിനി ഫ്രാൻസിസ്, ഹാരിസ് സലീം, വിരു വിവേക് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.

മാസ് മീഡിയ, സിക്കു ഫിലിംസ് എന്നീ ബാനറുകളിൽ ഒരുങ്ങുന്ന ചിത്രത്തിന്റെ സഹനിർമാണം ഹർഷദ് നിർവഹിക്കുന്നു. ഷഫീഖ് മുഹമ്മദ് അലിയാണ് എഡിറ്റർ. ഫഹദ് ഫത്ലി ഛായാഗ്രഹണം നിർവഹിക്കുന്നു. അർഷാദ് നാക്കോത്ത്, രജീഷ് കെ. സൂര്യ എന്നിവർ ചേർന്നാണ് കലാസംവിധാനം. മൈൻഡ്‌സ്‌റ്റൈൻ സ്റ്റുഡിയോസാണ് വിഷ്വൽ എഫക്റ്റ്‌സ് ഒരുക്കുന്നത്. അഷ്‌റ മുഹമ്മദ് എക്‌സിക്യൂട്ടീവ് പ്രൊഡ്യൂസറായും കാസ്റ്റിങ് ചുമതലയും നിർവഹിക്കുന്നു.

സച്ചിൻ സുധാകരൻ, ഹരിഹരൻ എം. (സിങ്ക് സിനിമ) എന്നിവർ ചേർന്നാണ് സൗണ്ട് ഡിസൈൻ നിർവഹിക്കുന്നത്. റൊണെക്‌സ് സേവ്യർ മേക്കപ്പും സമീറ സനീഷ് വസ്ത്രാലങ്കാരവും നിർവഹിക്കുന്നു. പി.സി. സ്റ്റണ്ട്‌സ് ആണ് ആക്ഷൻ കൊറിയോഗ്രഫി. ചിത്രത്തിന്റെ കോൺസെപ്റ്റ് വികസിപ്പിച്ചിരിക്കുന്നത് ജിപിൻ ഗോപിയാണ്. ജാവേദ് ചെമ്പു ചിത്രത്തിന്റെ പ്രൊഡക്ഷൻ കൺട്രോളറായി പ്രവർത്തിക്കുന്നു. ഡി.ഐ. നിർവഹിച്ചിരിക്കുന്നത് കളർ പ്ലാനറ്റാണ്.

സ്റ്റോറീസ് സോഷ്യലിന്റ ബാനറിൽ ഡോ. സംഗീത ജനചന്ദ്രൻ ചിത്രത്തിന്റെ മാർക്കറ്റിങ് ആൻഡ് കമ്മ്യൂണിക്കേഷൻസ് കൈകാര്യം ചെയ്യുന്നു. പ്രദീപ് മേനോൻ ഡിസ്ട്രിബ്യൂഷൻ ഹെഡാണ്.

ചിത്രത്തിന്റെ സംഗീതാവകാശം തിങ്ക് മ്യൂസിക് സ്വന്തമാക്കിയിട്ടുണ്ട്. ഹോം സ്‌ക്രീൻ എന്റർടെയ്ൻമെന്റ്‌സാണ് ചിത്രത്തിന്റെ ജി.സി.സി. വിതരണ പങ്കാളി. 'ഒറിജിനൽ' ഒക്ടോബർ 23-ന് തിയേറ്ററുകളിലെത്തും.