ടെലിവിഷൻ പരിപാടിയിലൂടെയാണ് ആയുഷ്മാൻ തന്റെ കരിയർ ആരംഭിക്കുന്നത്. 2004-ൽ പ്രശസ്ത റിയാലിറ്റി ഷോയായ 'എംടിവി റോഡീസ്' (സീസൺ 2) വിജയിയായതോടെയാണ് അദ്ദേഹം ശ്രദ്ധിക്കപ്പെടുന്നത്. പിന്നീട് റേഡിയോ ജോക്കിയായും ടെലിവിഷൻ അവതാരകനായും തിളങ്ങി. 2012-ൽ പുറത്തിറക്കിയ വിക്കി ഡോണർ എന്ന ചിത്രത്തിലൂടെ സിനിമാ അഭിനയത്തിലേക്കും അദ്ദേഹം കടന്നുവന്നു. അടുത്തിടെ ഇന്ത്യൻ ഐഡൽ എന്ന റിയാലിറ്റി ഷോ വേദിയിൽ ആയുഷ്മാൻ എത്തിയിരുന്നു. ഗായകൻ കൂടിയായ ആയുഷ്മാൻ വേദിയിൽ പതി പത്നി ഓർ വോ ദോ എന്ന ചിത്രത്തിലെ ദിൽവാലെ ചോർ എന്ന തന്റെ ഗാനവും ആലപിച്ചു. ഗായിക ശ്രേയ ഘോഷാലും വിഷാൽ ദാദ്ലാനിയും അദ്ദേഹത്തെ പ്രശംസിക്കുകയും ചെയ്തു.

To advertise here,

വ്യാഴാഴ്ചയാണ് ആയുഷ്മാൻ പരിപാടിയിൽ നിന്നുള്ള ചില രംഗങ്ങൾ സാമൂഹിക മാധ്യമങ്ങളിൽ പങ്കുവെച്ചത്. സ്റ്റേജിൽ ഗിറ്റാർ വായിച്ച് ഗാനം ആലപിക്കുന്ന രംഗമായിരുന്നു അത്.

താൻ ഏറെ കഷ്ടത അനുഭവിച്ചിരുന്ന കാലത്ത് ഈ വേദിയിൽ താൻ ഒരിക്കൽ തഴയപ്പെട്ടിട്ടുണ്ടെന്നും ഇപ്പോൾ അത്ഭുതം തോന്നുന്നുവെന്നും വീഡിയോയ്ക്കൊപ്പം പങ്കുവെച്ച കുറിപ്പിൽ ആയുഷ്മാൻ ഖുരാന പറഞ്ഞു. അദ്ദേഹത്തിന്റെ പുതിയ ചിത്രമാണ് പതി പത്നി ഓർ വോ ദോ. ചിത്രത്തിലെ സഹതാരങ്ങളായ വാമിഖ ഖബ്ബി, സാറ അലി ഖാൻ, രാകുൽ പ്രീത് സിങ് എന്നിവരും ഇന്ത്യൻ ഐഡലിൽ ആയുഷ്മാന്റെ ഗാനം കേൾക്കാനുണ്ടായിരുന്നു. ആരാധകരും ആയുഷ്മാന്റെ പ്രകടനത്തെ പ്രശംസിച്ചു.

ആയുഷ്മാൻ ഖുരാനയുടെ സമീപകാല ചിത്രങ്ങളും വരാനിരിക്കുന്ന ചിത്രങ്ങളും

മേയ് 15-ന് തിയേറ്ററുകളിൽ റിലീസ് ചെയ്ത 'പതി പത്നി ഓർ വോ 2' എന്ന ചിത്രത്തിലാണ് ആയുഷ്മാൻ ഏറ്റവും ഒടുവിൽ വേഷമിട്ടത്. സാറാ അലി ഖാൻ, രാകുൽ പ്രീത് സിങ്, വാമിഖ ഗബ്ബി എന്നിവരും പ്രധാന വേഷങ്ങളിൽ എത്തിയ ഈ ചിത്രത്തിന് സമ്മിശ്ര പ്രതികരണങ്ങളാണ് ലഭിച്ചത്. ഇതുവരെ ആഗോളതലത്തിൽ 32 കോടി രൂപയും ഇന്ത്യയിൽനിന്ന് അറ്റാദായമായി 27.14 കോടി രൂപയും ചിത്രം നേടിയിട്ടുണ്ട്. സൂരജ് ബർജാത്യയുടെ വരാനിരിക്കുന്ന 'യേ പ്രേം മോൽ ലിയാ' എന്ന ചിത്രമാണ് അദ്ദേഹത്തിന്റെ അടുത്ത ചിത്രം. രാജ്ശ്രീ പ്രൊഡക്ഷൻസ് നിർമിക്കുന്ന 'യേ പ്രേം മോൽ ലിയാ' 2026 നവംബർ 27-ന് തിയേറ്ററുകളിൽ റിലീസ് ചെയ്യാനാണ് ലക്ഷ്യമിടുന്നത്.