മലയാള സിനിമയുടെ സുവർണകാലഘട്ടത്തെക്കുറിച്ച് ഓർക്കുമ്പോൾ ഹൃദയത്തിൽ പ്രകാശിക്കുന്നത് വെറും സിനിമാ വിശേഷങ്ങൾ മാത്രമല്ല; കുടുംബസമാനമായ സ്നേഹബന്ധങ്ങളുടെയും ഗൃഹാതുരതയുടെയും മായാത്ത ചിത്രങ്ങൾ കൂടിയാണ്. എന്റെ അച്ഛൻ പ്രൊഫസർ ചിറയിൻകീഴ് രാമകൃഷ്ണൻ നായരുടെ പാട്ടുകളും സംഭാഷണങ്ങളും പ്രേംനസീർ അങ്കിളിന്റെ വശ്യമായ സാന്നിധ്യവും എ.ടി. ഉമ്മറിന്റെ ഇമ്പമാർന്ന ഈണങ്ങളും ചേർന്നുതീർത്ത ആ സൗഹൃദക്കൂട്ടായ്മ മലയാള സിനിമയിലെ അവിസ്മരണീയമായ ഒരു അധ്യായമാണ്. 1970-കളുടെ മധ്യത്തിൽ വെള്ളിത്തിരയിൽ തരംഗം സൃഷ്ടിച്ച 'വിജയനും വീരനും', 'പമ്പരം' എന്നീ ചിത്രങ്ങളുടെ ഓർമച്ചെപ്പ് തുറക്കുമ്പോൾ മനസ്സിലേക്ക് ഓടിയെത്തുന്നത് ലൊക്കേഷനുകൾക്കപ്പുറമുള്ള ചില അപൂർവസൗഹൃദക്കാഴ്ചകളാണ്.

To advertise here,

അച്ഛൻ ഗാനങ്ങളെഴുതിയ മിക്ക സിനിമകളിലും നസീർ അങ്കിൾ തന്നെയായിരുന്നു നായകൻ എന്നത് എക്കാലത്തെയും വലിയൊരു സന്തോഷവും കൗതുകവുമാണ്. 1976-ൽ പുറത്തിറങ്ങിയ 'വിജയനും വീരനും' എന്ന ചിത്രത്തിനുവേണ്ടി അച്ഛൻ ഗാനങ്ങൾ എഴുതുക മാത്രമല്ല, ചിത്രത്തിന്റെ സംഭാഷണവും രചിച്ചിരുന്നു. സി.എൻ. പരമശിവൻ നിർമിച്ച്, കെ.പി. പത്മനാഭൻ നായരുടെ കഥയ്ക്ക് സി.എ. വെങ്കിട്ടസ്വാമി തിരക്കഥയെഴുതി സംവിധാനം ചെയ്ത ചിത്രമായിരുന്നു ഇത്. അന്ന് ചിത്രത്തിന്റെ ചർച്ചകൾക്കും എഴുത്തുകൾക്കുമായി സി.എൻ. വെങ്കിട്ടസ്വാമി സാറിന്റെ വീട്ടിൽ അച്ഛനോടൊപ്പം പോയത് ഇന്നലെ കഴിഞ്ഞതുപോലെ മനസ്സിന്റെ ഏടുകളിൽ തെളിഞ്ഞുനിൽക്കുന്നു. സിനിമയുടെ അണിയറപ്രവർത്തകരും കുടുംബാംഗങ്ങളും ഒരു വ്യത്യാസവുമില്ലാതെ ഒരുമിച്ചിരുന്ന് ഭക്ഷണം കഴിച്ചതും, കഥയും പാട്ടുകളും ചർച്ച ചെയ്തതുമായ ആ നിമിഷങ്ങൾ അന്നത്തെ സിനിമക്കാരുടെ ഇടയിലുണ്ടായിരുന്ന ആത്മബന്ധത്തിന്റെ വലിയൊരു തെളിവാണ്. ഇന്നത്തെ യാന്ത്രികമായ ലൊക്കേഷൻ അന്തരീക്ഷത്തിൽ നിന്ന് എത്രയോ വേറിട്ടതായിരുന്നു അന്നത്തെ ആ ഊഷ്മളത!

ത്രില്ലറും തമാശയും സസ്പെൻസും ഒത്തുചേർന്ന 'വിജയനും വീരനും' എന്ന ചിത്രത്തിൽ പ്രേംനസീർ അങ്കിൾ ഇരട്ടവേഷത്തിലാണ് തിളങ്ങിയത്. വിജയൻ, വീരൻ എന്നീ കഥാപാത്രങ്ങളായി നസീർ അങ്കിൾ നിറഞ്ഞാടിയ ചിത്രത്തിലെ കഥാസന്ദർഭങ്ങൾ വളരെ രസകരമായിരുന്നു. ഒരു രഹസ്യ ഡയറി തേടി നടക്കുന്ന രണ്ടു നസീറുമാർ; അതിനൊപ്പം ദുരൂഹതകൾ ഒളിപ്പിച്ച ഒരു കുതിരപ്രതിമ; കേസന്വേഷണത്തിൽ നായകന്മാർക്കൊപ്പം കഥാപാത്രമായി മാറുന്ന സമർഥനായ ഒരു നായ... പ്രേക്ഷകരെ ആകാംക്ഷയുടെ കൊടുമുടിയിലെത്തിച്ച ചേരുവകൾ അനവധിയായിരുന്നു. സീമയും ശുഭയുമായിരുന്നു ചിത്രത്തിലെ നായികമാർ. ഇതിൽ നസീർ അങ്കിൾ സൈക്കിളിൽ ശുഭയുടെ പിറകെ പോകുന്ന ആ പ്രണയരംഗം ഏറെ കൗതുകമുള്ളതായിരുന്നു.

ശുഭയുടെ കൈവശമുള്ള ആ രഹസ്യപ്പുസ്തകം കൈക്കലാക്കാൻ വേണ്ടിയുള്ള നായകന്റെ അടവുകളും കൊഞ്ചലുകളുമെല്ലാം ക്യാമറക്കണ്ണുകൾ തികച്ചും ആകർഷകമായി പകർത്തിവച്ചു. മദ്രാസിലെ നസീർ അങ്കിളിന്റെ വീടിന്റെ പരിസര പ്രദേശങ്ങളിലൊക്കെയായി ചിത്രത്തിന്റെ പ്രധാന ഭാഗങ്ങൾ ചിത്രീകരിച്ചത് അന്നത്തെ ലൊക്കേഷൻ ഓർമകളിലെ സുവർണ ഏടാണ്.

ചിത്രത്തിനുവേണ്ടി

അച്ഛനെഴുതി എ.ടി. ഉമ്മർ ഈണം പകർന്ന് യേശുദാസ് പാടിയ മനോഹരമായ ഗാനം ഇന്നും പഴയതലമുറയുടെ ചുണ്ടുകളിലുണ്ട്:

'മിണ്ടാപ്പെണ്ണേ മിടുക്കിപ്പെണ്ണേ...

കണ്ടു ഞാൻ തൂമുല്ല പോൽ നിൻ

പുഞ്ചിരി മലരും പൂഞ്ചിറകൊളിയും...'

 

ചിത്രത്തിൽ കേസ് അന്വേഷണത്തിന്റെ ഭാഗമായി നസീർ അങ്കിളും ആലുമൂടനും കഞ്ചാവ് ഉപയോഗിക്കുന്നവരുടെ സംഘത്തിലേക്ക് ചെന്നെത്തുന്ന ഒരു രസകരമായ സന്ദർഭമുണ്ട്. അവിടെവച്ച് കഞ്ചാവ് ലഹരിയിലാണെന്ന് ഭാവിച്ചുകൊണ്ട് പാടുന്ന വേറിട്ടൊരു ഗാനമുണ്ട്. ഹിന്ദി പാട്ടുകളുടെ ശൈലിയിലുള്ള മനോഹര ഗാനം കംപോസ് ചെയ്തപ്പോൾ തന്നെ 'ഇതൊരു നല്ല പാട്ടാകും' എന്ന് എ.ടി. ഉമ്മർ അച്ഛനോട് എടുത്തുപറഞ്ഞിരുന്നുവത്രേ! എലിസബത്ത് എന്ന ഇംഗ്ലീഷുകാരി അവിസ്മരണീയമാക്കിയ ആ ഗാനരംഗത്തിലെ വരികൾ ഇന്നും ലഹരിയായി മനസ്സിലുണ്ട്:

'മരിജുവാന വിരിഞ്ഞു വന്നാൽ

മനസ്സൊരു മായാപുഷ്പവനം

അകലെയോ അരികിലോ തിരയൂ തിരയൂ പൂക്കാലം

ഹൊയ് ഹൊയ് ഹൊയ് ഹൊയ് ഹോയ്...

അകലെയോ അരികിലോ തിരയൂ തിരയൂ തിരയൂ പൂക്കാലം...'

'വിജയനും വീരനും' നൽകിയ ആവേശത്തിന് പിന്നാലെ എത്തിയ മറ്റൊരു മനോഹര ചിത്രമായിരുന്നു 'പമ്പരം'. ഈ ചിത്രത്തിൽ നസീർ അങ്കിളിന്റെ നായികയായി വേഷമിട്ടത് അക്കാലത്തെ സുന്ദരിയായ നടി ഭവാനിയാണ്. എ.ടി. ഉമ്മറിന്റെ വശ്യമായ സംഗീതത്തിൽ അച്ഛൻ ചിറയിൻകീഴ് രാമകൃഷ്ണൻ നായർ സർവകലാശാലാ നിലവാരമുള്ള അതിമനോഹരമായ ഗാനങ്ങളാണ് ഈ ചിത്രത്തിനുവേണ്ടി രചിച്ചത്. ഓരോ പാട്ടും കേൾക്കുമ്പോൾ മനസ്സിൽ കുളിർമഴ പെയ്യുന്ന അനുഭൂതിയാണ്. അന്നത്തെ ആ ചിത്രീകരണവേളകളും സെറ്റിലെ തിരക്കുകളും കൊച്ചുകുഞ്ഞായിരുന്ന ഓർമകളിൽ ഇല്ലെങ്കിലും, അച്ഛന്റെ എഴുത്തുമേശയിൽ നിന്നും റേഡിയോയിലൂടെയും കാതുകളിൽ പതിഞ്ഞ ആ വരികൾ ഇന്നും ജീവനുള്ളതായി തോന്നുന്നു. ചിത്രത്തിലെ വസന്തത്തെക്കുറിച്ചുള്ള പ്രശസ്തമായ ഗാനം മലയാളികൾ എക്കാലത്തും നെഞ്ചിലേറ്റിയതാണ്:

'വരിക നീ വസന്തമേ വളർമതി കിരണമേ...'

'പമ്പരം' സിനിമയിലെ എടുത്തുപറയേണ്ട മറ്റൊരു മാസ്മരിക ഗാനമാണ് പ്രകൃതിയുടെയും പ്രണയത്തിന്റെയും ലാളിത്യം തുളുമ്പുന്ന ആ വരികൾ. സായാഹ്നത്തിന്റെ മനോഹാരിതയും പ്രണയത്തിന്റെ ആർദ്രതയും ഒരേപോലെ ഒരേ ഇഴയിൽ കോർത്തിണക്കിയ അച്ഛന്റെ തൂലികയിൽ പിറന്ന ആ ഗാനം മലയാള സംഗീതശാഖയിലെ ഒരു അമൂല്യ രത്നമാണ്:

'ഹേമന്ത യാമിനി ചൂടും

പ്രേമാനുഭൂതികൾ തേടും

ഹിമ ബിന്ദുവണിയുന്ന സുമകന്യകേ നീ...

ഹിമ ബിന്ദുവണിയുന്ന സുമകന്യകേ...'

ഈ വരികൾ കേൾക്കുമ്പോൾ, തണുത്ത ഒരു സായാഹ്നത്തിൽ വെള്ളിത്തിരയിൽ പ്രേംനസീറും ഭവാനിയും അഭിനയിച്ച ആ രംഗങ്ങൾ നമ്മുടെ കൺമുന്നിൽ തെളിഞ്ഞുവരും. എ.ടി. ഉമ്മറിന്റെ മാന്ത്രിക സംഗീതം ആ വരികൾക്ക് നൽകിയ ജീവൻ മലയാളിയുടെ ഗൃഹാതുരതകളിൽ പ്രതിഷ്ഠ നേടിയിരിക്കുന്നു.

ഇന്ന് സാങ്കേതികവിദ്യ വിരൽത്തുമ്പിൽ നിൽക്കുന്ന കാലമാണ്. സിനിമയുടെ രൂപവും ഭാവവും ഏറെ മാറിപ്പോയി. എങ്കിലും, അന്നത്തെ ആ ലളിതമായ ലൊക്കേഷനുകളും, അച്ഛൻ എഴുതിത്തീർത്ത വരികൾ എ.ടി. ഉമ്മറിന്റെ ഈണത്തിൽ പിറവിയെടുത്ത അസുലഭ നിമിഷങ്ങളും, സി.എൻ. വെങ്കിട്ടസ്വാമി സാറിന്റെ വീട്ടിലെ സൗഹൃദ സദ്യകളുമെല്ലാം മലയാള സിനിമയുടെ തങ്കലിപികളാൽ എഴുതപ്പെട്ട ചരിത്രമാണ്. അച്ഛന്റെയും നസീർ അങ്കിളിന്റെയും ആ സിനിമാകാലം ഇന്നും നമ്മുടെ സാംസ്‌കാരിക ചരിത്രത്തിലെ തിളങ്ങുന്ന ഏടുകളാണ്. വരുംതലമുറകൾക്കും കേട്ട് ആസ്വദിക്കാൻ പാകത്തിൽ അച്ഛൻ എഴുതിവെച്ച ആ വരികളും, നസീർ അങ്കിളിന്റെ നായകത്വവും മലയാള സിനിമയുള്ളിടത്തോളം കാലം ഓർമകളിൽ നിറഞ്ഞുനിൽക്കും. ആ മായാത്ത ഓർമകൾക്ക് മുന്നിൽ പ്രണാമം...