കന്നഡ ബോക്സോഫീസിൽ ചരിത്രമെഴുതി ഒരു കുഞ്ഞുചിത്രം. ഈ വർഷം റിലീസ് ചെയ്ത 'പ്രേമദ ഊരലി' (Premada Oorali) എന്ന കന്നഡ ചിത്രം അപൂർവനേട്ടം കൈവരിച്ചിരിക്കുകയാണ് ബോക്സ് ഓഫീസിൽ. വെറും മൂന്ന് കോടി രൂപ ബജറ്റിൽ നിർമിച്ച ഈ ചിത്രം 107 കോടിയിലധികം രൂപയുടെ കളക്ഷൻ നേടി വൻ വിജയമായി മാറിയിരിക്കുകയാണ്. 3466 ശതമാനത്തോളം ലാഭം നേടിയ ഈ ചിത്രം കന്നഡ ചലച്ചിത്ര ചരിത്രത്തിൽ ഏറ്റവും കൂടുതൽ ലാഭം ഉണ്ടാക്കിയ ചിത്രങ്ങളിലൊന്നായി മാറിയിരിക്കുകയാണ്. യഷിന്റെ 'കെ.ജി.എഫ്', ഋഷഭ് ഷെട്ടിയുടെ 'കാന്താര' തുടങ്ങിയ വൻകിട ചിത്രങ്ങളുടെ ലാഭശതമാനത്തെപ്പോലും മറികടന്ന്, കന്നഡ സിനിമയിലെ എക്കാലത്തെയും വലിയ ആറാമത്തെ ഉയർന്ന കളക്ഷൻ നേടിയ ചിത്രമായി ഇത് മാറി.ദേശീയ അവാർഡ് ജേതാവായ ചലച്ചിത്രകാരൻ മനോജ് കുമാർ (അക്ഷി) ആണ് ചിത്രം സംവിധാനം ചെയ്തത്. 2021-ൽ അക്ഷി എന്ന ചിത്രമാണ് അദ്ദേഹം ഇതിനുമുൻപ് ചെയ്തത്. ഈ ചിത്രത്തിലൂടെ മികച്ച കന്നഡ ഫീച്ചർ ഫിലിമിനുള്ള പുരസ്കാരമാണ് അദ്ദേഹത്തെ തേടിയെത്തിയത്. സിനിമാ സംവിധായകനാകുന്നതിനുമുൻപ് സിനിമാ തിയേറ്ററുകളിൽ കാണികൾക്ക് സീറ്റ് കാണിച്ചുകൊടുക്കുന്ന ടോർച്ച് ബോയ് ആയാണ് ഇദ്ദേഹം പ്രവർത്തിച്ചിരുന്നത്.

To advertise here,

പ്രതിസന്ധികൾ നിറഞ്ഞ യാത്ര

ഈ വലിയ വിജയത്തിലേക്കുള്ള യാത്ര ഏറെ പ്രതിസന്ധികൾ നിറഞ്ഞതായിരുന്നു. തുടക്കത്തിൽ ഒരു കോടി രൂപ ബജറ്റിൽ ആരംഭിച്ച ചിത്രം പൂർത്തിയാക്കാൻ സംവിധായകൻ മനോജ് കുമാറിന്റെ സഹോദരൻ, മമത ദേവേന്ദ്ര എന്നിവരുൾപ്പെടെ ഏകദേശം 15 ചെറുകിട നിക്ഷേപകരിൽ നിന്നാണ് തുക കണ്ടെത്തിയത്. 100-ലധികം വരുന്ന അണിയറപ്രവർത്തകർക്കായി വലിയ ലോഡ്ജുകൾക്ക് പകരം കല്യാണമണ്ഡപങ്ങൾ വാടകയ്‌ക്കെടുത്ത് പണം ലാഭിച്ചാണ് ഷൂട്ടിങ് പൂർത്തിയാക്കിയത്. ചിത്രത്തിന്റെ ഛായാഗ്രഹണം നിർവഹിച്ച രാജ്കാന്ത് എസ്.കെ ഔപചാരികമായി ക്യാമറ പഠനം നടത്തിയ ആളല്ല; പബ്ബിൽ ജോലി ചെയ്തിരുന്ന അദ്ദേഹം പിന്നീട് നിരീക്ഷണത്തിലൂടെയും ഡ്രോൺ ഓപ്പറേഷൻ പഠിച്ചുമാണ് സിനിമാ രംഗത്തേക്ക് എത്തിയത്.

ചിത്രം പൂർത്തിയായ ശേഷവും റിലീസ് സംബന്ധിച്ച വെല്ലുവിളികൾ അവസാനിച്ചില്ല. സിനിമ റിലീസ് ചെയ്യുന്നതിനും പ്രചാരണത്തിനുമായി 10-15 ലക്ഷം രൂപ നിക്ഷേപിക്കാൻ പല പ്രമുഖ നിർമാതാക്കളോടും അഭ്യർത്ഥിച്ചെങ്കിലും ആരും തയ്യാറായില്ല. സിനിമ ഇഷ്ടപ്പെട്ടെങ്കിലും നിക്ഷേപം നടത്താൻ നിർമാതാക്കൾ വിസമ്മതിക്കുകയായിരുന്നു. റിലീസ് ദിനത്തിൽ പല തിയേറ്ററുകളും അവസാന നിമിഷം ഷോകൾ റദ്ദാക്കുകയും വലിയ ചിത്രങ്ങൾക്ക് മുൻഗണന നൽകിക്കൊണ്ട് പോസ്റ്ററുകൾ ഒട്ടിക്കാൻ പോലും വിസമ്മതിക്കുകയും ചെയ്തു.

ക്ലിക്കായ പ്രചാരണതന്ത്രം

സെപ്റ്റംബർ

അവസാനം വളരെ കുറച്ച് ഷോകളാണ് ചിത്രത്തിന് ലഭിച്ചത്. ആദ്യ ദിവസത്തെ വരുമാനം 10 ലക്ഷം രൂപയിൽ താഴെമാത്രം. ഈ ഘട്ടത്തിലാണ് സംവിധായകൻ മനോജ് കുമാർ വേറിട്ട ഒരു 'പ്രചാരണ തന്ത്രം' പരീക്ഷിച്ചത്. കർണാടകത്തിലുടനീളമുള്ള 10,000-ത്തിലധികം ഓട്ടോറിക്ഷകളുടെ പുറകിൽ ചിത്രത്തിന്റെ റേഡിയം സ്റ്റിക്കറുകൾ പതിപ്പിച്ചു. കൂടാതെ, വിവാഹത്തിന് ക്ഷണിക്കുന്നതുപോലെ ആളുകളെ നേരിട്ടു കണ്ട് ക്ഷണക്കത്തുകൾ നൽകി തിയേറ്ററിലേക്ക് ക്ഷണിക്കുകയും ചെയ്തു. യാത്രക്കാരുമായി നേരിട്ട് സംവദിക്കാനും ചെറിയതും ഉള്ളടക്കമുള്ളതുമായ സിനിമകളെ പിന്തുണയ്ക്കാൻ അവരോട് അഭ്യർഥിക്കാനും പൊതുബസുകളിൽ അണിയറപ്രവർത്തകരും താരങ്ങളും യാത്ര ചെയ്തു.

ഈ തെരുവ് പ്രചാരണം ഫലം കാണുകയും രണ്ടാം ദിവസം മുതൽ തിയേറ്ററുകളിൽ വൻ ജനത്തിരക്ക് അനുഭവപ്പെടുകയും ചെയ്തു. ആദ്യ ആഴ്ചയിലെ 6.2 കോടി രൂപയിൽ നിന്ന് രണ്ടാം ആഴ്ചയിൽ കളക്ഷൻ 48 കോടി രൂപയായി ഉയർന്നു. ചിത്രം മികച്ച പ്രകടനം തുടരുകയും തിയേറ്ററുകളുടെ എണ്ണത്തിൽ വർധനവുണ്ടാവുകയും ചെയ്തു. റിലീസ് ചെയ്ത ആഴ്ചയിൽ വെറും 60 ഷോമാത്രം പ്രദർശിപ്പിച്ചിരുന്ന ചിത്രം, മൂന്നും നാലും ആഴ്ചകളിൽ എത്തിയപ്പോൾ കർണാടകയിലുടനീളം 1,100-ലധികം സ്ക്രീനുകളിലേക്ക് വ്യാപിച്ചു. ഗ്രാമീണ തിയേറ്ററുകളിൽ കൂടുതൽ കസേരകളും പായകളും ഇട്ടും നിലത്തുപോലും ആളുകൾ ഇരുന്നുമാണ് ചിത്രം കണ്ടത്.

അഭിനന്ദനവുമായി പ്രമുഖർ

ചിത്രത്തിന്റെ അമ്പരപ്പിക്കുന്ന വിജയം കെ.ജി.എഫ് താരം യാഷ്, കാന്താരയുടെ താരവും സംവിധായകനുമായ റിഷഭ് ഷെട്ടി എന്നിവരുൾപ്പെടെ ഇന്ത്യൻ ചലച്ചിത്രമേഖലയിലെ പ്രമുഖരുടെ പ്രശംസ പിടിച്ചുപറ്റി. യാഥാർഥ്യബോധമുള്ളതും ആത്മാവിനെ സ്പർശിക്കുന്നതുമായ കഥപറച്ചിലിനെ പിന്തുണച്ച പ്രേക്ഷകരെ അവർ അഭിനന്ദിച്ചു.

അണിയറയിൽ ഇവർ

ശ്രീ റാം, രംഗായണ രഘു, തപസ്വിനി പൂനച്ച, രമിക ശിവു തുടങ്ങിയവർ പ്രധാന വേഷങ്ങളിലെത്തിയ ഈ ചിത്രം ബോക്സ് ഓഫീസിൽ വൻ ചരിത്രമാണ് സൃഷ്ടിച്ചത്. റിലീസിന് മുൻപ് ചിത്രം നിരസിച്ച നിർമാതാക്കൾ ഇപ്പോൾ സംവിധായകനുമായി കൂടിക്കാഴ്ചയ്ക്ക് സമയം ചോദിച്ചു വരിനിൽക്കുന്ന അവസ്ഥയാണെന്ന് ഛായാഗ്രാഹകൻ രാജ്കാന്ത് വ്യക്തമാക്കുന്നു. വൻകിട നിർമാതാക്കൾ കൈവിട്ട സിനിമയെ ജനങ്ങൾ ഏറ്റെടുത്തതോടെ 'പ്രേമദ ഊരലി' ഇന്ത്യൻ സിനിമയിൽ തന്നെ വലിയൊരു അത്ഭുത വിജയമായി മാറിയിരിക്കുകയാണ്.