20 വർഷങ്ങൾ, അലെെപായുതേ എന്ന പ്രണയകാവ്യത്തെ ഇന്നും പ്രേക്ഷകർ നെഞ്ചിലേറ്റുന്നുവെങ്കിൽ എന്തായിരിക്കും അതിന് കാരണം? തിരക്കഥയിലെ വ്യത്യസ്തതയായിരുന്നില്ല, പ്രണയത്തെയും വിരഹത്തെയും അത്രയേറെ തീവ്രതയോടെ അവതരിപ്പിക്കാൻ മണിരത്നത്തിന് സാധിച്ചുവെന്നതാണ് ഈ ചിത്രത്തെ വ്യത്യസ്തമാക്കിയത്. മറ്റൊരു കാരണം പ്രേക്ഷകർക്ക് അവരുടെ ജീവിതത്തെ ഈ സിനിമയുമായി റിലേറ്റ് ചെയ്യാൻ സാധിച്ചു എന്നതായിരിക്കാം.

To advertise here,

ട്രെയിനിന്റെയും എ.ആർ റഹ്മാന്റെ പാട്ടുകളുടെയും നിറങ്ങളുടെയും പി.സി ശ്രീറാമിന്റെ മനോഹരമായ ഫ്രെയ്മുകളുടെയും അകമ്പടിയോടെ കഥ പറഞ്ഞു പൂർത്തിയാക്കുമ്പോൾ പ്രേക്ഷകരിൽ ചിലരുടെയെങ്കിലും കണ്ണുകളിൽ നിന്ന് അശ്രു പൊഴിഞ്ഞിരിക്കാം. 

തന്റെ സിനിമയ്ക്ക് വേണ്ടി സൂപ്പർതാരങ്ങൾക്ക് പിറകെ പോകുന്ന സ്വഭാവം മണിരത്നത്തിനില്ല. അതുകൊണ്ടു തന്നെയാണ് മാധവൻ എന്ന പുതുമുഖത്തെയും ബാലതാരത്തിൽ നിന്നും നായികയായി അരങ്ങേറ്റം കുറിച്ചതിന് ശേഷം വളരെ കുറച്ച് സിനിമകൾ മാത്രം ചെയ്ത ശാലിനിയെയും പ്രധാനകഥാപാത്രങ്ങളാക്കി പരീക്ഷണത്തിന് മുതിർന്നത്.

പ്രണയം വിവാഹത്തിന് മുൻപും ശേഷവും വ്യത്യസ്തമായിരിക്കും. ആ വ്യത്യസ്തതയെ മനസ്സിലാക്കാൻ സാധിച്ചില്ലെങ്കിൽ ദാമ്പത്യ ജീവിതത്തിൽ താളപിഴകൾ സംഭവിച്ചേക്കാം. ​ഗൗരവകരമായ ഒരു വിഷയമാണെങ്കിലും വളരെ ലളിതമായാണ് സംവിധായകൻ അലെെപായുതേയിൽ അവതരിപ്പിച്ചത്.

എം.ബി.ബി.എസ് വിദ്യാർഥിനിയായ ശക്തിയും കാർത്തികുമാണ് ചിത്രത്തിലെ കേന്ദ്രകഥാപാത്രങ്ങൾ. അച്ഛനും അമ്മയും സഹോദരിയുമടങ്ങുന്ന ഒരു സന്തുഷ്ട കുടുംബത്തിലെ അം​ഗമാണ് ശക്തി. എഞ്ചിനീയറിങ് ബിരുദധാ​രിയായ കാർത്തിക് അച്ഛനും അമ്മയ്ക്കും സഹോദരനുമൊപ്പമാണ് താമസിക്കുന്നത്. അന്നത്തെ യുവതലമുറയുടെ പ്രതിനിധിയായാണ് കാർത്തിക്, വിട്ടിൽ അയാൾ റിബലാണ്. ​ഗ്രാമത്തിലെ ഒരു വിവാഹ ചടങ്ങിനിടെയാണ് കാർത്തിയും ശക്തിയും പരിചയപ്പെടുന്നത്. കുഞ്ഞു കുഞ്ഞു വാക്ക് തർക്കങ്ങളോടെയാണ് തുടക്കം... 'യാരോ യാരോടി' എന്ന പാട്ടിന്റെ പശ്ചാത്തലത്തിലാണ് ഈ രസകരമായ രം​ഗങ്ങൾ അവതരിപ്പിച്ചത്.

placeholder
​

പിന്നീട് അവരുടെ കൂടികാഴ്ചയ്ക്ക് നിമിത്തമാകുന്നതും ട്രെയിൻ യാത്രയാണ്. ട്രെയിനിന്റെ താളത്തിൽ മൊട്ടിട്ട ശക്തിയുടെയും കാര്‍ത്തിക്കിന്റെയും പ്രണയം ഇടയിലെപ്പോഴോ മുറിഞ്ഞ്പോയതും അവിടെ തന്നെയായിരുന്നു. ഇവരുടെ  പ്രണയത്തിന്റെയും വിരഹത്തിന്റെയും തീവ്രത പ്രേക്ഷകരുമായി സംവദിച്ചത് എ.ആർ റഹ്മാൻ ചിട്ടപ്പെടുത്തിയ 'പച്ചെെ നിറമേ', 'എവനോ ഒരുവൻ', 'സ്നേഹിതനേ'... എന്നീ ​ഗാനങ്ങളിലൂടെയായിരുന്നു.

തങ്ങൾക്ക് ഒരിക്കലും പിരിഞ്ഞിരിക്കാനാകില്ല എന്ന് തിരിച്ചറിയുന്ന കാർത്തികും ശക്തിയും വിട്ടുകാരുടെ എതിർപ്പുകളെ മറികടന്ന് വിവാഹിതരാകുന്നു. പിന്നീട് മധുവിധുവിന്റെ ആഘോഷങ്ങളിലേക്കാണ് സിനിമ കൂട്ടിക്കൊണ്ടു പോകുന്നത്. 'കാതൽ സടു​ഗുടു' എന്ന ​ഗാനം കടന്നുവരുന്നതും ആ പശ്ചാത്തലത്തിലാണ്.

കാർത്തികിന്റെയും ശക്തിയുടെയും വിവാഹജീവിതത്തിൽ താളപ്പിഴകൾ സംഭവിക്കുന്നത് ശക്തിയുടെ പിതാവിന്റെ മരണത്തിന് ശേഷമാണ്. പിതാവ് സുഖമില്ലാതെ ആശുപത്രിയിൽ കിടക്കുന്ന വിവരം അമ്മയിൽ നിന്നാണ് ശക്തി അറിയുന്നത്, അതും ഒരു ട്രെയിൻ യാത്രയ്ക്കിടെ. ഈ വിവരം കാർത്തികിനെ അറിയിക്കുമ്പോൾ അയാളുടെ പ്രതികരണം രൂക്ഷമായിരുന്നു. ശക്തിയുടെ പിതാവ് തന്നെ പരസ്യമായി തല്ലിയതിന്റെ ഓർമകൾ കാർത്തികിന്റെ  ഉള്ളിലെ ഈ​ഗോയെ പുറത്ത് കൊണ്ടുവരുന്നു. ഒടുവിൽ ശക്തിയുടെ സങ്കടത്തിന് മുന്നിൽ അയാൾ കീഴടങ്ങുകയാണ്. എന്നാൽ വിധി ശക്തിക്കെതിരായിരുന്നു. പിതാവിനെ കാണാനുള്ള യാത്രയിൽ ഇവരെ കാത്തിരുന്നത് അദ്ദേഹത്തിന്റെ മരണവാർത്ത പരസ്യം ചെയ്ത ഏതാനും പോസ്റ്ററുകളാണ്. 

മാനസികമായി തളർന്ന ശക്തി പിന്നീട് കാർത്തികിൽ നിന്ന് മനപൂർ‍വ്വം അകലം പാലിക്കുന്നത് പോലെ ഭാവിക്കുന്നു. അവിടെ അവിടെ അവൾ ആ​ഗ്രഹിക്കുന്നത് ഒരു ഭർത്താവിൽ നിന്നുള്ള സാന്ത്വന വാക്കുകളാണ്. എന്നാൽ കാർത്തിക് അത്  തിരിച്ചറിയുന്നില്ലെന്ന് മാത്രമല്ല പിതാവിനെ കാണാൻ സാധിക്കാത്തതിൽ ശക്തിക്ക് തന്നോട് വെറുപ്പാണെന്ന് അയാൾ കരുതുന്നു. അതിനിടെ തന്റെ സഹോദരി പൂർണിയുമായി കാർത്തിക് പ്രണയത്തിലാണെന്ന് കൂടി തെറ്റിദ്ധരിക്കുന്നതോടെ ശക്തി പൂർണമായും തകരുന്നു.

എന്നാൽ ഒരിക്കൽ താൻ കാരണം മുടങ്ങിപ്പോയ ശക്തിയുടെ സഹോദരി പൂർണിയുടെ വിവാഹം ശരിയാക്കുന്നതിനുള്ള നെട്ടോട്ടത്തിലായിരുന്നു കാർത്തിക്. പൂർണിയിൽ നിന്ന് ശക്തി അതറിയുന്നത് വളരെ വെെകിയാണ്. പൂർണിയുടെ വാക്കുകൾ കേട്ട ശക്തി, കുറ്റബോധം കൊണ്ടും സന്തോഷം കൊണ്ടും  മതിമറന്ന് റെയിൽവേ സ്റ്റേഷനിൽ നിന്ന് ഇറങ്ങിയോടുന്നു. കാർത്തികിനെ കാണാനുള്ള തത്രപ്പാടിൽ അശ്രദ്ധമായി റോഡ് മുറിച്ചുകടന്ന അവളെ കാത്തിരുന്നത് ഒരു വലിയ ദുരന്തമായിരുന്നു,  വാഹനാപകടത്തിന്റെ രൂപത്തിൽ. ശക്തിക്ക് അപകടം സംഭവിച്ചതറിയാതെ അവളെ കാണാതെ വിളറിപ്പിടിച്ച് ഓടി നടക്കുന്ന കാർത്തികിന്റെ മാനസികാവസ്ഥയും ഒടുവിലെ കണ്ടുമുട്ടലുമെല്ലാം അത്രയും വെെകാരികമായാണ് സംവിധായകൻ പ്രേക്ഷകരിൽ എത്തിച്ചത്. 

ആമുഖത്തിൽ പറഞ്ഞതുപോലെ തിരക്കഥയിലെ വ്യത്യസ്തതയല്ല അലെെപായുതേ എന്ന ചിത്രത്തെ വേറിട്ടുനിർത്തിയത്, അവതരണ ശെെലിയാണ്. ശക്തിയും കാർത്തികും നമുക്കിടയിൽ തന്നെ ജീവിക്കുന്നു, അവർ പ്രണയിക്കുന്നു, കലഹിക്കുന്നു ഒടുവിൽ പരസ്പരം ചേർന്നു നിൽക്കുന്നു. മണിരത്നത്തിന്റെ സംവിധാനമികവും എ.ആർ റഹ്മാന്റെ ഈണങ്ങളും പി.സി ശ്രീറാമിന്റെ ഫ്രെയ്മുകളും കാർത്തികും ശക്തിയും മാത്രമല്ല, ഈ ചിത്രത്തിലെ ചെറുതും വലുതുമായ എല്ലാ കഥാപാത്രങ്ങൾക്കും കൃത്യമായ സ്വഭാവവിശേഷതയുണ്ട്. സുകുമാരി, കെ.പി.എ.സി ലളിത, ജയസുധ, സ്വർണമല്യ, രവിപ്രകാശ്, വിവേക്, പിരമിഡ് നടരാജൻ, അരവിന്ദ് സ്വാമി, ഖുശ്ബു തുടങ്ങിയവരായിരുന്നു ചിത്രത്തിലെ മറ്റു കഥാപാത്രങ്ങളെ അവതരിപ്പിച്ചത്. 

Content Highlights: Alaipayuthey, 20 years of Maniratnam Movie, R Madhavan, Shalini, AR Rahman, PC Sreeram