വിപണിയിൽ തിരിച്ചുവരവിന്റെ സൂചനകൾ: അത്മവിശ്വാസം വീണ്ടെടുത്ത് നിക്ഷേപകർ

മാസങ്ങളോളം നീണ്ട അനിശ്ചിതത്വങ്ങൾക്കും നിശ്ചലാവസ്ഥയ്ക്കും ശേഷം തിരിച്ചുവരവിന്റെ സൂചന വിപണിയിൽ പ്രകടമായിത്തുടങ്ങി. ഭൗമരാഷ്ട്രീയ സംഘർഷങ്ങളും ക്രൂഡോയിൽ വിലക്കയറ്റവും സൃഷ്ടിച്ച ആഗോള വെല്ലുവിളികളെ അതിജീവിച്ച് വിപണി പുതിയൊരു ദിശാമാറ്റം പ്രകടമാക്കുന്നു. താത്ക്കാലിക മുന്നേറ്റമല്ല, സുസ്ഥിരമായ സാമ്പത്തിക അടിത്തറയിൽ ഊന്നിയുള്ള ശുഭാപ്തിവിശ്വാസമാണ് നിക്ഷേപകർക്കിടയിൽ പ്രകടമാകുന്നത്.

ക്രൂഡോയിൽ വില ഇടിവും ആഗോള നയങ്ങളും

വിപണിയുടെ കുതിപ്പിന് കളമൊരുക്കുന്നതിൽ ആഗോള വിപണിയിലെ ക്രൂഡോയിൽ വിലയിലുണ്ടായ കുറവ് നിർണായക പങ്കുവഹിച്ചു. പശ്ചിമേഷ്യൻ സംഘർഷം മൂലം ബാരലിന് 100 ഡോളറിന് മുകളിൽ പോയ ബ്രെന്റ് ക്രൂഡ് വില നിലവിൽ 80 ഡോളറിനടുത്തേക്ക് താഴ്ന്നിരിക്കുന്നു. വെറുമൊരു വിലക്കുറവായി ഇതിനെ കാണാൻ കഴിയില്ല. സമ്പദ്‌വ്യവസ്ഥയുടെ പ്രവർത്തനക്ഷമതയ്ക്കുള്ള ഉത്തേജകമായി വേണം വിലയിരുത്താൻ.

വിലയിടിവ് കമ്പനികളുടെ പ്രവർത്തന ചെലവ് കുറയ്ക്കുകയും അതിലൂടെ ലാഭത്തിൽ കാര്യമായ വർധനവുണ്ടാകുകയും ചെയ്യും. ഇതിലുപരിയായി, ക്രൂഡ് വിലയിലെ കുറവ് പണപ്പെരുപ്പ നിയന്ത്രണ കാര്യത്തിൽ കർശന നിലപാടിൽനിന്ന് വിട്ടുനിൽക്കാൻ ആർബിഐക്ക് അവസരം നൽകുകയും ചെയ്യുന്നു. ആഗോളതലത്തിൽ, യുഎസ് ഫെഡ്, ബാങ്ക് ഓഫ് ഇംഗ്ലണ്ട്, ബാങ്ക് ഓഫ് ജപ്പാൻ എന്നിവർ പലിശ നിരക്കുകളിൽ സ്ഥിരത പുലർത്തിയത് വിപണിയിൽ 'റിസ്‌ക്' എടുക്കാനുള്ള നിക്ഷേപകരുടെ താത്പര്യം ഉണർത്തി. ആഗോള ഘടകങ്ങൾ ഇത്തരത്തിൽ അനുകൂലമായ പശ്ചാത്തലം ഒരുക്കുമ്പോൾ, വിപണിയുടെ യഥാർത്ഥ 'വളർച്ചാ എഞ്ചിൻ' ആയി പ്രവർത്തിക്കുന്നത് ഇവിടത്തെ ആഭ്യന്തര സൂചകങ്ങളാണ്.

മൺസൂണും കോർപ്പറേറ്റ് വരുമാനവും

മൺസൂൺ മഴയുടെ ഗതിമാറ്റമാണ് ഏറ്റവും വലിയ ശുഭസൂചന. മുൻപ് 40 ശതമാനത്തിലധികമായിരുന്ന മഴക്കുറവ് ഇപ്പോൾ 15 ശതമാനത്തിന് താഴേക്ക് എത്തിയത് ഗ്രാമീണ ഉപഭോഗത്തിന് ലഭിക്കുന്ന ഒരു 'ഘടനാപരമായ ചാലകശക്തിയാണ്' ഇത് ഭക്ഷ്യ പണപ്പെരുപ്പത്തെക്കുറിച്ചുള്ള ആശങ്കകൾ അകറ്റാൻ സഹായിക്കുന്നു.

കോർപ്പറേറ്റ് പ്രകടനത്തിലേക്ക് കടന്നാൽ, ഏറ്റവും പുതിയ പാദഫലങ്ങൾ (Q1FY27) വിപണി പ്രതീക്ഷകളെ മറികടക്കുന്നതായിരുന്നു. കഴിഞ്ഞ കുറച്ചു കാലമായി കണ്ടുവരുന്ന വരുമാന മുരടിപ്പ് ഇല്ലാതാകുന്നു എന്നതിന്റെ വ്യക്തമായ സൂചനയാണിത്. ആഭ്യന്തര വിപണിയിലെ ശക്തമായ പണലഭ്യതയും കൂടി ചേരുമ്പോൾ നിക്ഷേപകർക്ക് ആത്മവിശ്വാസത്തോടെ വിപണിയിൽ ഇടപെടാൻ സാധിക്കുന്നു. സാമ്പത്തിക സൂചകങ്ങൾ മെച്ചപ്പെടുമ്പോൾ വിദേശ നിക്ഷേപകരുടെ മനോഭാവത്തിലും ശ്രദ്ധേയമായ മാറ്റം സംഭവിക്കുന്നുണ്ട്.

വിദേശികളുടെ തിരിച്ചുവരവ്

രണ്ട് വർഷമായി ഇന്ത്യൻ വിപണിയിൽ നിന്ന് പണം പിൻവലിച്ചിരുന്ന വിദേശ നിക്ഷേപകരുടെ മനോഭാവത്തിൽ മാറ്റം പ്രകടമാണ്. തുടർച്ചയായ നാല് മാസങ്ങളിലായി 2.7 ലക്ഷം കോടി രൂപയുടെ ഓഹരികൾ വിറ്റൊഴിഞ്ഞ വിദേശ നിക്ഷേപകർ, ജൂലൈയിൽ 17,000 കോടി രൂപയുടെ അറ്റ നിക്ഷേപം നടത്തി.

മറ്റ് വിപണികളിൽ നിന്നുള്ള തന്ത്രപരമായ പുനഃക്രമീകരണമാണ് ഇവിടെ നടക്കുന്നത്. ആഗോളതലത്തിൽ എഐ ഓഹരികളുടെ ആവേശം കുറയുന്നത് ദക്ഷിണ കൊറിയ, തയ്വാൻ തുടങ്ങിയ വിപണികളിൽ വൻതോതിലുള്ള വിൽപനയ്ക്ക് കാരണമാകുന്നു. ഈ സാഹചര്യത്തിൽ, സുസ്ഥിരമായ സാമ്പത്തിക വളർച്ചയും മികച്ച 'റിസ്‌ക്-റിവാർഡ്' സാധ്യതകളുമുള്ള ഇന്ത്യ വിദേശ നിക്ഷേപകർക്ക് ഏറ്റവും സുരക്ഷിതമായ നിക്ഷേപ കേന്ദ്രമായി മാറുന്നു. നിക്ഷേപ പ്രവണതകൾ ഇത്തരത്തിൽ മാറുമ്പോൾ ഏതൊക്കെ മേഖലകളാണ് മുന്നേറ്റത്തിന് തയ്യാറെടുക്കുന്നത് എന്ന് നോക്കാം.

ബാങ്കിങും റിയൽ എസ്റ്റേറ്റും: ആഗോളതലത്തിൽ കടപ്പത്ര ആദായം സ്ഥിരത കൈവരിച്ചതോടെ, മുൻപ് സമ്മർദത്തിലായിരുന്ന പലിശ നിരക്ക് സെൻസിറ്റീവ് മേഖലകൾ ശക്തമായി തിരിച്ചുവരികയാണ്.

എഫ്എംസിജിയും ഓട്ടോമൊബൈലും: മൺസൂൺ മെച്ചപ്പെടുന്നത് ഗ്രാമീണ മേഖലയിലെ ആവശ്യകത വർധിപ്പിക്കും. ഈ മേഖലകൾക്ക് അതിലൂടെ നേട്ടമുണ്ടാക്കാനുമാകും.

ഐടി: ആഗോള ടെക് ചെലവിടലിലെ വർധനവും നിലവിലെ ആകർഷകമായ ഓഹരി വിലയും ഈ മേഖലയെ ദീർഘകാല നിക്ഷേപകർക്ക് പ്രിയപ്പെട്ടതാക്കുന്നു. ആഭ്യന്തര വിപണിക്ക് പുറമെ അന്താരാഷ്ട്ര വാണിജ്യ സാഹചര്യങ്ങളും ഇന്ത്യയ്ക്ക് അനുകൂലമായി മാറുകയാണ്.

ആഗോള വാണിജ്യ സാഹചര്യം

ആഗോള കയറ്റുമതി വിപണിയിൽ ഇന്ത്യ കൈവരിക്കുന്ന മത്സരക്ഷമത നിസാരമല്ല. യുഎസിന്റെ താരിഫ് നിരക്കുകളിൽ ഇന്ത്യയ്ക്കുള്ള മുൻതൂക്കം ഒരു വലിയ 'മാർക്കറ്റ് ഷെയർ ഓപ്പർച്യൂണിറ്റി' ആണ് നൽകുന്നത്.

രാജ്യം	താരിഫ്
ഇന്ത്യ	10%
ചൈന, ജപ്പാൻ, യൂറോപ്യൻ രാജ്യങ്ങൾ	12.5%

2.5 ശതമാനത്തിന്റെ വ്യത്യാസം ടെക്‌സ്‌റ്റൈൽസ്, കാർഷിക വിഭവങ്ങൾ, സ്‌പെഷ്യലൈസ്ഡ് മെഷിനറി എന്നീ മേഖലകളിലെ ഇന്ത്യൻ കയറ്റുമതിക്കാർക്ക് ആഗോളതലത്തിൽ വലിയൊരു മത്സര മുൻതൂക്കം നൽകുന്നു. രാജ്യത്തിന്റെ വിദേശ നാണ്യ വരുമാനത്തെയും വ്യവസായ വളർച്ചയെയും ദീർഘകാലാടിസ്ഥാനത്തിൽ ഇത് സ്വാധീനിക്കും.

മാസങ്ങളോളം വിപണിയെ വലച്ച പ്രതികൂല ഘടകങ്ങൾ ഇപ്പോൾ അനുകൂലമായി മാറുകയാണ്. ക്രൂഡോയിൽ വിലയിലെ ഇടിവ്, മെച്ചപ്പെട്ട മൺസൂൺ, വിദേശ നിക്ഷേപകരുടെ തിരിച്ചുവരവ്, അനുകൂലമായ അന്താരാഷ്ട്ര വാണിജ്യ നയങ്ങൾ എന്നിവയെല്ലാം വിപണിയുടെ ശക്തമായ അടിത്തറയ്ക്ക് സാക്ഷ്യം വഹിക്കുന്നു. വിപണിയിലെ ഈ 'ഘടനാപരമായ മാറ്റങ്ങൾ' തിരിച്ചറിഞ്ഞ്, കൃത്യമായ നിക്ഷേപ തന്ത്രങ്ങളിലൂടെ സുസ്ഥിരമായ വളർച്ച ലക്ഷ്യമിടാൻ നിക്ഷേപകർക്ക് ലഭിച്ചിരിക്കുന്ന മികച്ച അവസരമാണിത്. വിപണിയിൽ ഇപ്പോൾ പ്രകടമാകുന്ന ഈ ആത്മവിശ്വാസം വരും പാദങ്ങളിലും തുടരാനാണ് സാധ്യത.