സാമന്തയുടെയും രാജിന്റെയും സമ്പത്ത് എത്ര: വരുമാനം എവിടെനിന്നെല്ലാം?

നടി സാമന്ത റൂത്ത് പ്രഭുവും ചലച്ചിത്ര നിര്‍മാതാവ് രാജ് നിദിമോറുവുമാണ് ഇപ്പോള്‍ സോഷ്യല്‍ മീഡിയയിലെ താരങ്ങള്‍. ഇരുവരുടെയും സമ്പത്തിനെക്കുറിച്ചാണ് ഇപ്പോള്‍ ചര്‍ച്ച. തമിഴ്, തെലുങ്ക് സിനിമകളിലെ പ്രമുഖ താരമാണ് സാമന്ത. 'രാജ് & ഡികെ' എന്ന ക്രിയേറ്റര്‍ ജോഡിയുടെ ഭാഗമായി സ്ട്രീമിങ് പ്ലാറ്റ്‌ഫോമുകളില്‍ തരംഗമായ രാജും ഏറെ ശ്രദ്ധിക്കപ്പെട്ടു. സിനിമ, ഒടിടി, ബ്രാന്‍ഡ് അംബാസഡര്‍, നിക്ഷേപങ്ങള്‍ എന്നിവയില്‍നിന്നാണ് സാമന്ത നേട്ടമുണ്ടാക്കുന്നതെങ്കില്‍ രചന, സംവിധാനം, നിര്‍മാണം, ലാഭവീതം എന്നിവയില്‍നിന്നാണ് രാജ് സമ്പത്തുണ്ടാക്കുന്നത്.

2025-ലെ കണക്ക് പ്രകാരം സാമന്തയുടെ സമ്പത്ത് ഏകദേശം 100 കോടി മുതല്‍ 110 കോടി രൂപ വരെയാണ്.

തമിഴ്, തെലുങ്ക് സിനിമാ വ്യവസായങ്ങളില്‍ ഉയര്‍ന്ന പ്രതിഫലം വാങ്ങുന്ന താരമാണ് സാമന്ത. അവരുടെ വരുമാനത്തിന്റെ ഒരു പ്രധാന ഭാഗം സിനിമയില്‍ നിന്നാണ്. സ്ട്രീമിംഗ് പ്ലാറ്റ്ഫോമുകളുടെ വളര്‍ച്ചയെ സാമന്ത സമര്‍ഥമായി ഉപയോഗപ്പെടുത്തി. 'സിറ്റാഡല്‍: ഹണി ബണ്ണി' പോലുള്ള ഡിജിറ്റല്‍ സംരംഭങ്ങളില്‍ നിന്ന് മികച്ച പ്രതിഫലവും പ്രകടനവുമായി ബന്ധപ്പെട്ട ബോണസുകളും അവര്‍ക്ക് ലഭിക്കുന്നു.

ഫാഷന്‍, സൗന്ദര്യവര്‍ദ്ധക വസ്തുക്കള്‍, ഭക്ഷണം, ജീവിതശൈലി ഉല്‍പ്പന്നങ്ങള്‍ എന്നീ മേഖലകളിലെ ബ്രാന്‍ഡുകളുടെ അംബാസിഡര്‍ എന്നനിലയില്‍ വന്‍തുക അവര്‍ നേടുന്നുണ്ട്. ടെലിവിഷന്‍ പരസ്യങ്ങള്‍, ഡിജിറ്റല്‍ കാമ്പെയ്നുകള്‍, ദീര്‍ഘകാല ബ്രാന്‍ഡ് അംബാസഡര്‍ കരാറുകള്‍ എന്നിവയിലൂടെ ഓരോ വര്‍ഷവും കോടിക്കണക്കിന് രൂപ അവര്‍ സമ്പാദിക്കുന്നു.

ഹൈദരാബാദ്, ചെന്നൈ തുടങ്ങിയ നഗരങ്ങളില്‍ ബിസിനസ്, റിയല്‍ എസ്റ്റേറ്റ് മേഖലകളിലും സാമന്ത നിക്ഷേപം നടത്തിയിട്ടുണ്ട്. അഭിനയരംഗത്ത് സജീവമല്ലാത്തപ്പോഴും ആസ്തി വര്‍ധിക്കാന്‍ സഹായകരമാകുന്നു.

2025-ലെ കണക്കനുസരിച്ച് രാജ് നിദിമോറുവിന്റെ വ്യക്തിഗത ആസ്തി ഏകദേശം 83 കോടി മുതല്‍ 85 കോടി രൂപ വരെയാണ്.

വരും വര്‍ഷങ്ങളില്‍ ആഗോള പ്രോജക്ടുകളും സഹനിര്‍മ്മാണ സംരംഭങ്ങളും വരുന്നതോടെ അദ്ദേഹത്തിന്റെ ആസ്തി 100 കോടി രൂപയിലേക്ക് എത്തുമെന്ന് പ്രതീക്ഷിക്കുന്നു.

എഴുത്ത്, സംവിധാനം, നിര്‍മ്മാണം എന്നിവയില്‍ നിന്നാണ് രാജിന് പ്രധാനമായും വരുമാനം ലഭിക്കുന്നത്. 'ദി ഫാമിലി മാന്‍', 'ഫര്‍സി' തുടങ്ങിയ പ്രശസ്തമായ ഷോകളും സിനിമകളും മികച്ച വിജയമായി.

നിര്‍മാതാവും രചയിതാവും സംവിധായകനും എന്ന നിലയിലും ലാഭവീതം, ബാക്ക്-എന്‍ഡ് ഡീലുകള്‍ എന്നിവ വഴിയും പ്രോജക്റ്റ് റിലീസ് ചെയ്ത് ഏറെക്കാലം കഴിഞ്ഞും വരുമാനം ലഭിക്കുന്നു. അന്താരാഷ്ട്ര സഹകരണങ്ങളിലൂടെയും അദ്ദേഹം സമ്പത്ത് സൃഷ്ടിക്കുന്നു.