ഗൂഗിൾ ഉൾപ്പെടെയുള്ള മറ്റ് ആഗോള കമ്പനികളുടെ നിക്ഷേപത്തിനൊപ്പം റിലയൻസിന്റെ 1.5 ജിഗാവാട്ട് പദ്ധതി കൂടി വരുന്നതോടെ ആന്ധ്രാപ്രദേശ് ഇന്ത്യയുടെ ഡിജിറ്റൽ സാമ്പത്തിക മേഖലയുടെ പ്രധാന കേന്ദ്രമായി മാറും.
ആന്ധ്രയിലെ വിശാഖപട്ടണത്ത് രാജ്യത്തെ ഏറ്റവും വലിയ ഡാറ്റാ സെന്റർ സ്ഥാപിക്കാൻ റിലയൻസ്. പദ്ധതിക്ക് 1.6 ലക്ഷം കോടി(17 ബില്യൺ ഡോളർ)യാകും നിക്ഷേപം നടത്തുക. ഡാറ്റാ സെന്ററിന് പുറമെ, കമ്പനിയുടെ ആവശ്യത്തിനുള്ള സൗരോർജ പദ്ധതിയും ബാറ്ററി സ്റ്റോറേജ് സംവിധാനവും ഉണ്ടാകും. ആന്ധ്രയിൽതന്നെ ഗൂഗിൾ സ്ഥാപിക്കുന്ന ഒരു ജിഗാവാട്ട് ഡാറ്റ സെന്ററിനേക്കാൾ വലുതാണ് റിലയൻസ് സ്ഥാപിക്കുന്നത്.
പദ്ധതിയെക്കുറിച്ച് വിശദമായി
- നിക്ഷേപം 1.6 ലക്ഷം കോടി രൂപ.
- ഡാറ്റാ സെന്റർ ക്ലസ്റ്ററിനായി ഏകദേശം 1.08 ലക്ഷം കോടി രൂപ.
- പുനരുപയോഗ ഊർജ പദ്ധതിക്കായി 51,300 കോടി.
- ശേഷി: 1.5 ജിഗാവാട്ട്.
വിസ്തീർണം: 1,016 ഏക്കർ.
- ഡാറ്റാ സെന്റർ ക്ലസ്റ്ററിനായി 935 ഏക്കർ.
- കേബിൾ ലാൻഡിംഗ് സ്റ്റേഷനായി ഒരു ഏക്കർ.
- ഡീസാലിനേഷൻ പ്ലാന്റിനായി (ഉപ്പുവെള്ളം ശുദ്ധീകരിക്കുന്ന പ്ലാന്റ്) 80 ഏക്കർ.
പദ്ധതി ഘട്ടംഘട്ടമായി
ഒന്നാം ഘട്ടം: വിശാഖപട്ടണത്തെ പൊളിപ്പള്ളി (Polipalli) ഗ്രാമത്തിൽ 500 മെഗാവാട്ട് ശേഷിയുള്ള ഡാറ്റാ സെന്റർ സ്ഥാപിക്കും. 2028 ഒക്ടോബറോടെ പ്രവർത്തനം ആരംഭിക്കുമെന്ന് പ്രതീക്ഷിക്കുന്നു. ഇതിനായി 300 ഏക്കർ ഭൂമി വേണ്ടിവരും.
രണ്ടാം ഘട്ടം: ഭോഗാപുരം ഈസ്റ്റ്, വെസ്റ്റ് മേഖലകളിലായി ഒരു ജിഗാവാട്ട് ശേഷി കൂട്ടും. 2030-ഓടെ ഈ ഘട്ടം പൂർത്തിയാക്കാനാണ് ലക്ഷ്യം. ഇതിനായി 635 ഏക്കർ ഭൂമി ആവശ്യമായി വരും.
ഊർജ പദ്ധതി
ഡാറ്റാ സെന്ററുകളുടെ വൻതോതിലുള്ള ഊർജ ആവശ്യം നിറവേറ്റുന്നതിനായി വൻ സൗരോർജ പദ്ധതിയാണ് റിലയൻസ് വിഭാവനം ചെയ്യുന്നത്.
9,000 മെഗാവാട്ട്-പീക്ക് (MW-peak) ഡിസി പാനൽ ശേഷിയുള്ള സോളാർ പ്രോജക്റ്റിന് സംസ്ഥാന ഇൻവെസ്റ്റ്മെന്റ് പ്രൊമോഷൻ കമ്മിറ്റി അനുമതി നൽകിയിട്ടുണ്ട്. പരമാവധി 6,600 മെഗാവാട്ട് ആൾട്ടർനേറ്റിംഗ് കറന്റ് (AC) ഉത്പാദിപ്പിക്കും.
സ്റ്റോറേജ്: തടസ്സമില്ലാത്ത പ്രവർത്തനത്തിനായി ക്യാപ്റ്റീവ് സോളാർ ബാറ്ററി സ്റ്റോറേജ് സംവിധാനവും ഇതിന്റെ ഭാഗമായി സ്ഥാപിക്കും.
വിശാഖപട്ടണം: ഡാറ്റാ ഹബ്
വിശാഖപട്ടണം വൻതോതിലുള്ള ഡാറ്റാ സെന്റർ നിക്ഷേപങ്ങൾക്ക് സാക്ഷ്യം വഹിച്ചുകൊണ്ടിരിക്കുകയാണ്.
പ്രധാന നിക്ഷേപകർ:
| കമ്പനി | ശേഷി | നിക്ഷേപം / നില |
|---|---|---|
| റിലയൻസ് ഇൻഡസ്ട്രീസ് | 1.5 GW | ₹1.6 ലക്ഷം കോടി |
| ഗൂഗിൾ | 1 GW | $15 ബില്യൺ |
| ഡിജിറ്റൽ കണക്ഷൻ | 1 GW | ആസൂത്രണ ഘട്ടം |
| RMZ | 1 GW | ധാരണാപത്രം ഒപ്പിട്ടു |
| സിഫി | 500 MW | നിർദ്ദിഷ്ട പദ്ധതി |
| അനന്ത് രാജ് ക്ലൗഡ് | 300 MW | ആസൂത്രണ ഘട്ടം |
| ടിൽമാൻ ഗ്ലോബൽ ഹോൾഡിംഗ്സ് | 300 MW | ധാരണാപത്രം ഒപ്പിട്ടു |
ആന്ധ്രാപ്രദേശ് ഐടി മന്ത്രി നര ലോകേഷിന്റെ കണക്കനുസരിച്ച് സംസ്ഥാനം മൊത്തം ആറ് ജിഗാവാട്ട് ഹോസ്റ്റിംഗ് ശേഷിയാണ് ലക്ഷ്യമിടുന്നത്. റിലയൻസിന്റെ പദ്ധതിയോടെ സംസ്ഥാനത്ത് ഒപ്പിട്ട ധാരണാപത്രങ്ങളുടെ ആകെ ശേഷി 5.6 ജിഗാവാട്ടിലെത്തും.
സർക്കാർ ആനുകൂല്യങ്ങൾ
ആന്ധ്രാപ്രദേശ് സർക്കാരിന്റെ 'ഡാറ്റാ സെന്റർ പോളിസി 4.0' പ്രകാരം വൻകിട പദ്ധതികൾക്ക് നിരവധി ആനുകൂല്യങ്ങൾ നൽകുന്നുണ്ട്. റിലയൻസിന്റെ പദ്ധതിക്കും അത് ഗുണകരമാകും:
ജിഎസ്ടി റീഇംബേഴ്സ്മെന്റ്: മൂലധന സാമഗ്രികൾക്ക് (Capital goods) 100% സംസ്ഥാന ജിഎസ്ടി റീഇംബേഴ്സ്മെന്റ്.
മൂലധന സബ്സിഡി: മെഷിനറികൾക്ക് 10 ശതമാനം മൂലധന സബ്സിഡി.
ഊർജ വിതരണം: 300 മെഗാവാട്ടിൽ കൂടുതൽ ശേഷിയുള്ള പദ്ധതികൾക്ക് നേരിട്ടുള്ള ഊർജ സംഭരണത്തിനായി ഡീംഡ് ഡിസ്ട്രിബ്യൂഷൻ ലൈസൻസുകൾ നൽകുന്നു.
റിലയൻസ് ഇൻഡസ്ട്രീസിന്റെ നിക്ഷേപം ആഗോള ഡാറ്റാ സെന്റർ ഭൂപടത്തിൽ വിശാഖപട്ടണത്തെ മുൻനിരയിൽ എത്തിക്കും. ഗൂഗിൾ ഉൾപ്പെടെയുള്ള മറ്റ് ആഗോള കമ്പനികളുടെ നിക്ഷേപത്തിനൊപ്പം റിലയൻസിന്റെ 1.5 ജിഗാവാട്ട് പദ്ധതി കൂടി വരുന്നതോടെ ആന്ധ്രാപ്രദേശ് ഇന്ത്യയുടെ ഡിജിറ്റൽ സാമ്പത്തിക മേഖലയുടെ പ്രധാന കേന്ദ്രമായി മാറും.
Content Highlights: Reliance to invest ₹1.6 lakh crore in a massive Visakhapatnam data center cluster., Project includes a 1.5 GW data center and a 9,000 MW-peak solar energy facility., Development planned in phases: Phase 1 by 2028 and Phase 2 by 2030., Strategic use of Andhra Pradesh's Data Center Policy 4.0 for GST and capital subsidies., Positioning Visakhapatnam as a global digital infrastructure hub.
Published: 28 Apr 2026, 10:56 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented