എൺപതുകളിലും തൊണ്ണൂറുകളിലും ഇന്ത്യൻ കളർ ടെലിവിഷൻ വിപണിയിൽ വിപ്ലവം സൃഷ്ടിച്ച ബ്രാൻഡായിരുന്നു ഒനിഡ. 'അയൽക്കാരന്റെ അസൂയ, ഉടമയുടെ അഭിമാനം' (Neighbour's Envy, Owner's Pride) എന്ന ആ പഴയ പരസ്യവാചകം ഒരു തലമുറയുടെ ഗൃഹാതുരത്വമാണ്. ആഗോള ഇലക്ട്രോണിക്‌സ് ഭീമന്മാരുടെ കടന്നുകയറ്റത്തിൽ വിപണി വിഹിതം നഷ്ടപ്പെട്ട ഈ തദ്ദേശീയ ബ്രാൻഡ്, പഴയ പ്രതാപം വീണ്ടെടുക്കാനുള്ള ശ്രമത്തിലാണ്. ഗൃഹാതുരത്വത്തെ ആധുനിക ബിസിനസ് തന്ത്രങ്ങളുമായി കോർത്തിണക്കിക്കൊണ്ടുള്ള 'റീബൂട്ടിങിനാണ്' ഒനിഡ ഇപ്പോൾ തുടക്കമിടുന്നത്.

To advertise here,

ചെകുത്താന്റെ മടങ്ങിവരവ്

ഒനിഡയുടെ ഐതിഹാസികമായ 'ചെകുത്താൻ' (The Devil) വീണ്ടും വിപണിയിൽ അവതരിപ്പിക്കാനാണ് കമ്പനിയുടെ തീരുമാനം. ഇത് വെറുമൊരു വൈകാരികമായ നീക്കമല്ല, കൃത്യമായ വിപണി ഗവേഷണത്തിന്റെ ഫലമാണ്. കഴിഞ്ഞ മൂന്ന് മാസമായി രാജ്യവ്യാപകമായി കമ്പനി നടത്തിയ ഉപഭോക്തൃ ഗവേഷണത്തിൽ പഴയ തലമുറയ്‌ക്കൊപ്പം പുതിയ തലമുറയ്ക്കും ഈ ഐക്കണിനോട് വലിയ ആഭിമുഖ്യമുണ്ടെന്ന് കണ്ടെത്തിയിട്ടുണ്ട്. കാലഘട്ടത്തിനനുസരിച്ച് രൂപമാറ്റം വരുത്തി അവതരിപ്പിക്കാനാണ് കമ്പനി ലക്ഷ്യമിടുന്നത്. രൂപത്തിലും പ്രായത്തിലും വരുത്തേണ്ട മാറ്റങ്ങളെക്കുറിച്ച് ആഴത്തിലുള്ള വിശകലനങ്ങൾ നടന്നു വരികയാണ്.

തന്ത്രപരമായ മാറ്റം

കമ്പനിയുടെ ബിസിനസ് മോഡലിൽ വലിയൊരു മാറ്റമാണ് സിഇഒ ഗുഞ്ചൻ ശ്രീവാസ്തവയുടെ നേതൃത്വത്തിൽ നടക്കുന്നത്. ആദായം വർധിപ്പിക്കുന്നതിന്റെ ഭാഗമായി, മാർജിൻ കുറഞ്ഞ കരാർ നിർമാണ രീതിയിൽ നിന്ന് ഒനിഡ പൂർണമായും പിന്മാറുകയാണ്. ഇനി മുതൽ സ്വന്തം ബ്രാൻഡിലുള്ള ഉത്പന്നങ്ങളിൽ ശ്രദ്ധ കേന്ദ്രീകരിച്ച് വിപണിയിൽ സാന്നിധ്യം ശക്തമാക്കാനാണ് കമ്പനിയുടെ തീരുമാനം.

അഞ്ചു വർഷത്തിൽ അഞ്ചിരട്ടി വളർച്ച

വൻ സാമ്പത്തിക കുതിച്ചുചാട്ടമാണ് ഒനിഡ ലക്ഷ്യമിടുന്നത്. നടപ്പ് സാമ്പത്തിക വർഷത്തിൽ 660 കോടി രൂപ വരുമാനവും 74 കോടി രൂപയുടെ പ്രവർത്തന നഷ്ടവുമാണ് കമ്പനി രേഖപ്പെടുത്തിയത്. എന്നാൽ അടുത്ത അഞ്ച് വർഷത്തിനുള്ളിൽ വിറ്റുവരവ് അഞ്ചിരട്ടിയായി വർധിപ്പിക്കാനാണ് ഒനിഡ പദ്ധതിയിടുന്നത്. അടുത്ത 12 മുതൽ 24 മാസത്തിനുള്ളിൽ നഷ്ടമില്ലാത്ത അവസ്ഥ (ബ്രേക്ക്-ഈവൻ) കൈവരിക്കുക എന്നതിനാണ് ഇപ്പോൾ മുൻഗണന നൽകുന്നത്. ആഗോള ഭീമന്മാർ ആധിപത്യം പുലർത്തുന്ന വിപണിയിൽ തദ്ദേശീയമായ കരുത്തോടെ ലാഭക്ഷമതയിലേക്ക് തിരിച്ചെത്തുക എന്നത് വലിയൊരു വെല്ലുവിളിയാണെങ്കിലും കൃത്യമായ സാമ്പത്തിക ആസൂത്രണം ഇതിനായി കമ്പനി തയ്യാറാക്കിയിട്ടുണ്ട്.

വിതരണ ശൃംഖല

ഉത്പന്നങ്ങളുടെ ലഭ്യത ഉറപ്പാക്കാൻ വിതരണ ശൃംഖലയിൽ വൻ വിപുലീകരണമാണ് കമ്പനി നടത്തുന്നത്. നിലവിലുള്ള 4,000 വിതരണ കേന്ദ്രങ്ങൾ 8,000 ആക്കും. അടുത്ത മൂന്ന് വർഷത്തിനുള്ളിൽ ഫ്രാഞ്ചൈസി മാതൃകയിൽ 100 'ഒനിഡ എക്‌സ്‌ക്ലൂസീവ് ഔട്ട്ലെറ്റുകൾ' ആരംഭിക്കാനും ലക്ഷ്യമിടുന്നു. നിലവിൽ ബംഗാൾ വിപണിയിലാണ് ഒനിഡ പ്രധാനമായും ശ്രദ്ധ കേന്ദ്രീകരിക്കുന്നത്. മെട്രോ നഗരങ്ങൾക്കപ്പുറം ടയർ 2, ടയർ 3 നഗരങ്ങളിലേക്ക് വിപണി വ്യാപിപ്പിക്കുന്നത് വഴി കൂടുതൽ ഉപഭോക്താക്കളിലേക്ക് എത്താൻ കഴിയുമെന്ന് കമ്പനി പ്രതീക്ഷിക്കുന്നു.

ഉത്പന്ന വൈവിധ്യം

ടെലിവിഷൻ, എയർ കണ്ടീഷണർ, വാഷിങ് മെഷീൻ എന്നീ വിഭാഗങ്ങളിൽ വിപണി വിഹിതം ശക്തമാക്കുന്നതിനൊപ്പം സ്മാർട്ട് ഹോം സാങ്കേതികവിദ്യയിലേക്കും പുതിയ വീട്ടുപകരണങ്ങളിലേക്കും കമ്പനി കടക്കുകയാണ്. ഉത്പന്നങ്ങളുടെ ഗുണനിലവാരത്തിനൊപ്പം വിൽപ്പനാനന്തര സേവനത്തിന് വലിയ പ്രാധാന്യമാണ് ഒനിഡ നൽകുന്നത്. ഇതിനായി സർവീസ് പാർട്ണർമാർക്കും ടെക്‌നീഷ്യന്മാർക്കും പ്രത്യേക പരിശീലനം നൽകുന്നതിനൊപ്പം സ്‌പെയർ പാർട്‌സുകളുടെ ലഭ്യത ഉറപ്പാക്കാനുള്ള നൂതന സംവിധാനങ്ങളും കമ്പനി നടപ്പിലാക്കുന്നു.

'മേയ്ക്ക് ഇൻ ഇന്ത്യ' വികാരം ശക്തമാകുന്ന സമയത്ത് ഒനിഡയുടെ തിരിച്ചുവരവ് ശ്രദ്ധേയമാണ്. ഗൃഹാതുരത്വം ഉണർത്തുന്ന 'ചെകുത്താൻ' എന്ന ബ്രാൻഡ് ഐക്കണും പുതിയ കാലത്തെ സാങ്കേതിക വിദ്യയും ലാഭക്ഷമതയിലൂന്നിയുള്ള ബിസിനസ് തന്ത്രങ്ങളും ചേരുമ്പോൾ വിപണിയിൽ വലിയ ചലനങ്ങൾ സൃഷ്ടിക്കാൻ ഒനിഡയ്ക്ക് സാധിക്കുമോ എന്ന് കാലം തെളിയിക്കട്ടെ. തദ്ദേശീയ ബ്രാൻഡ് എന്ന നിലയിൽ ഒനിഡയുടെ ഈ പോരാട്ടം ഇന്ത്യൻ കൺസ്യൂമർ ഇലക്ട്രോണിക്‌സ് വിപണിയിൽ കടുത്ത മത്സരം സൃഷ്ടിക്കുമെന്ന കാര്യത്തിൽ സംശയമില്ല.