ഇനി എത്രപേരെ കുരുതി കൊടുക്കണം..?

ദേശീയപാതയിൽ അപകടക്കെണിയായി വാഹന പാർക്കിങ്

പയ്യന്നൂർ : പ്രവൃത്തി പൂർത്തിയാകുന്ന ദേശീയപാത 66-ൽ ലോറികളടക്കമുള്ള വാഹനങ്ങൾ രാത്രി നിർത്തിയിടുന്നത് വൻ അപകടമുണ്ടാക്കുന്നു. മുന്നറിയിപ്പു ബോർഡോ ഇൻഡിക്കേറ്ററോ വെക്കാതെയാണ് സർവീസ് റോഡിലടക്കം ലോറികൾ നിർത്തിയിടുന്നത്. വെള്ളൂർ പാൽത്തേര, കോത്തായിമുക്ക്, എടാട്ട്, കുപ്പം, ചാല ഉൾപ്പെടെ ദേശീയപാത- സർവീസ് റോഡിലേക്കുള്ള വഴികളിലാണ് (എൻട്രി, എക്സിറ്റ്) വണ്ടികൾ പലതും നിർത്തുന്നത്. അടുത്തെത്തിയാൽ മാത്രമേ വാഹനങ്ങളെ കാണൂ.

ദേശീയപാതയിൽ നിർത്തിയിട്ട ലോറിയിൽ വാഹനം ഇടിച്ച് കണ്ടോത്ത് സ്വദേശിയായ യുവാവ് ഗുരുതരാവസ്ഥയിൽ ചികിത്സയിലാണ്. പടന്നക്കാട്ട് നിർത്തിയിട്ട ലോറിക്ക് പിറകിൽ ബൈക്കിടിച്ച് കഴിഞ്ഞദിവസം രണ്ടുയുവാക്കൾ മരിച്ചിരുന്നു.

​ട്രക്ക് ലേ-ബേ വരുന്നു

ദീർഘദൂര യാത്രചെയ്യുന്ന ട്രക്ക് ഡ്രൈവർമാർക്ക് വിശ്രമിക്കാൻ ദേശീയപാതയ്ക്കരികിൽ ട്രക്ക് ലേ-ബേ നിർമിച്ചുതുടങ്ങി. കാലിക്കടവിലും പരിയാരത്തുമാണ് നിലവിൽ ട്രക്ക് ലേ-ബേ വരുന്നത്. ഇത് വന്നാൽ അനധികൃത പാർക്കിങ് ഒഴിവാകും. പരിയാരത്ത് 20 ട്രക്കുകൾ പാർക്ക് ചെയ്യാനുള്ള ടെർമിനൽ നിർമാണം തുടങ്ങി. കാലിക്കടവിൽ പഴയ ദേശീയപാതയ്ക്കരികെയുള്ള സ്ഥലത്താണ് ലേ-ബേ വരുന്നത്. ഇതിന്റെ രൂപരേഖ തയ്യാറായി. ട്രക്ക് പാർക്കിങ്, ഡ്രൈവർമാരുടെ വിശ്രമമുറി, ശൗചാലയം ഉൾപ്പെടെ ഉണ്ടാകും. കണ്ണൂർ ചാല ഭാഗത്ത് ഇതിനുള്ള സ്ഥലം അന്വേഷിക്കുകയാണ്.

ദേശീയപാതകളിൽ 40-60 കിലോമീറ്റർ ഇടവിട്ട് വഴിയോര സൗകര്യങ്ങൾ (വേ സൈഡ് അമിനിറ്റീസ്-ഡബ്ല്യു.എസ്.എ.) വേണമെന്നാണ് ദേശീയപാതാ അതോറിറ്റിയുടെ നിർദേശം. എന്നാൽ പലയിടത്തും സ്ഥലം കിട്ടാത്തത് തിരിച്ചടിയാണ്. പൊതുമേഖലയിലെ സ്ഥലങ്ങളും പഴയ ദേശീയപാതയിൽ ബാക്കിയായ ചില സ്ഥലങ്ങളുമാണ് ഇപ്പോൾ ട്രക്ക് ലേ-ബേക്ക് പരിഗണിക്കുന്നത്.

​അപകട ഇരുട്ട്

വാഹനങ്ങൾക്കായി തുറന്നുകൊടുത്ത ദേശീയപാതയിൽ ഭൂരിഭാഗം സ്ഥലത്തും വെളിച്ചമില്ല. ഉയരവിളക്ക് സ്ഥാപിച്ചിട്ടും കണക്ഷൻ നൽകാത്തതാണ് കാരണം. പഴയ ദേശീയപാതയിലെ വിളക്കുകൾ കെ.എസ്.ഇ.ബി. ദുരേക്ക് മാറ്റിക്കഴിഞ്ഞു. അതിനാൽ പുതിയ പാത പൂർണ ഇരുട്ടിലാണ്.

​നിയമലംഘനം തടഞ്ഞേ പറ്റു

​കോത്തായിമുക്കിൽ ദീർഘദൂര ലോറികൾ വെക്കുന്നത് പൊതുശല്യമായിക്കഴിഞ്ഞു. ഭക്ഷണാവശിഷ്ടം ഇടുന്നതും മലമൂത്രവിസർജനം ഉൾപ്പെടെ ദേശീയപാതയോരത്താണ് പലരും ചെയ്യുന്നത്. പുതിയങ്കാവ് പരിസരത്ത് അർധരാത്രി മീൻവെള്ളം ഒഴുക്കിവിട്ട രണ്ടുലോറികളെ നാട്ടുകാർ പോലീസിൽ ഏൽപ്പിച്ചിരുന്നു. രണ്ട്‌ ലോറിഡ്രൈവർമാരിൽനിന്ന്‌ 10,000 രൂപ വീതം പിഴ ഈടാക്കി.