'കെ.സിക്ക് രാജ്യസഭാംഗത്വം ഉപയോഗിച്ച് ആലപ്പുഴയെ സഹായിക്കാം, BJP പൊതുസ്വത്ത് അപകടത്തിലാക്കുന്നു'

2019-ലെ തിരഞ്ഞെടുപ്പില്‍ വിജയിച്ച എ.എം ആരിഫിനെ പ്രവര്‍ത്തകര്‍ തോളിലേറ്റി ആഹ്ലാദം പ്രകടിപ്പിക്കുന്നു

ഷാനിമോൾ ഉസ്മാൻ മത്സരിച്ചതിനാലാണ് ആലപ്പുഴ മണ്ഡലം കൈവിട്ടതെന്നാണ് കോൺ​ഗ്രസിന്റെ വാദം. ഇത്തവണ മണ്ഡലം കെ.സി വേണു​ഗോപാലിലൂടെ തിരിച്ചുപിടിക്കാനാണ് അവരുടെ ലക്ഷ്യം

കോൺഗ്രസിന് അങ്ങനെ പറയാനുള്ള അവകാശമുണ്ട്. അക്കാര്യത്തിൽ അവരെ കുറ്റപ്പെടുത്താൻ ഞാനില്ല. പക്ഷേ നടക്കില്ല എന്ന് മാത്രമേയുള്ളൂ. 2019-ലും കെ.സി വേണുഗോപാലിനോട് മത്സരിക്കാൻ തന്നെയായിരുന്നു എന്റെ തീരുമാനം.  അദ്ദേഹം അന്ന് പറഞ്ഞിരുന്നത് കേന്ദ്രത്തിൽ വലിയ ഉത്തരവാദിത്വങ്ങളുണ്ടെന്നാണ്. അന്ന് ഉണ്ടായിരുന്നതിനേക്കാൾ ഉത്തരവാദിത്വം ഇന്ന് അദ്ദേഹത്തിന് ഡൽഹിയിലുണ്ട്. കെ.സിയേക്കാൾ പ്രഗത്ഭയായ ഗൗരിയമ്മയോട് മത്സരിച്ചാണ്  2006-ൽ ജയിച്ചത്. ഗൗരിയമ്മയെപ്പോലെയൊരു പ്രമുഖ സ്ഥാനാർഥിയൊന്നുമല്ലല്ലോ കെ.സി വേണുഗോപാൽ. ഇതൊന്നും കേൾക്കുമ്പോൾ ഞാൻ പേടിക്കുന്നില്ല. പ്രഗത്ഭരോട് മത്സരിക്കണമെന്ന് കേൾക്കുമ്പോൾ സന്തോഷമേയുള്ളൂ. 

അനിൽ കെ. ആന്റണി മുതൽ പത്മജാ വേണു​ഗോപാൽ വരെയുള്ളവർ ബി.ജെ.പിയിലെത്തിക്കഴിഞ്ഞു. ഇന്നത്തെ കോൺ​ഗ്രസ് നാളത്തെ ബി.ജെ.പി എന്നാണോ.

അടിസ്ഥാനമായി ബി.ജെ.പിയുടെ നയങ്ങളെയും രാഷ്ട്രീയത്തെയും നേരിടുന്നതിനു പകരം അവരുമായി സന്ധി ചെയ്യുന്ന നയങ്ങൾ സ്വീകരിക്കുന്നത് തെറ്റാണ്. അവർക്ക് ഇങ്ങനെ രൂപപരിണാമം സംഭവിച്ചുകൊണ്ടിരിക്കുകയാണ്. അതിനായി കുറേപേർ കച്ചകെട്ടി ഇതിന്റെ ഉത്തരവാദിത്വം ഏറ്റെടുത്തിട്ടുണ്ട്. തീർച്ചയായും കേരളത്തിലെ വോട്ടർമാർ ഇത് തിരിച്ചറിയുന്നുണ്ട്. കഴിഞ്ഞ അഞ്ച് വർഷത്തെ അനുഭവം പരിശോധിച്ചാൽ തന്നെ ഒരു നാഥനില്ലാത്ത കളരിയായിരുന്നു കോൺഗ്രസ്. ആരുണ്ടായിരുന്നു നയിക്കാൻ. കോൺഗ്രസുകാർക്ക് പല കാര്യങ്ങളിലും പല അഭിപ്രായങ്ങളായിരുന്നു. 

കെ.സി വേണുഗോപാൽ ഡൽഹിയിൽ പോയി കപിൽ സിബലിനെപ്പോലെയുള്ള പ്രമുഖരെ ചാടിച്ചു. ഇനി ആരെയൊക്കെ ചാടിക്കുമെന്ന് കണ്ടറിയാം. അദ്ദേഹം പാർലമെന്റംഗമാണ്. അവിടെ നിന്നുകൊണ്ട് ആലപ്പുഴയിലെ കാര്യങ്ങളിൽ ഇടപെട്ടുകൊണ്ടിരിക്കുകയാണെന്നാണ്  അവകാശപ്പെടുന്നത്. ഇനിയും ആ ജോലി തന്നെ ചെയ്യാലോ. ഇത്രയും ജോലിത്തിരക്കിനിടയിൽ നിന്നുകൊണ്ട് ഇടപെടുന്നതിനേക്കാൾ നല്ലത് രാജ്യസഭാംഗത്വം ഉപയോഗിച്ചുകൊണ്ട് ആലപ്പുഴയെ സഹായിക്കുന്നതല്ലേ കുറച്ചുകൂടെ നല്ലത്.

സംസ്ഥാനത്തിന്റെ ശബ്ദം യു.ഡി.എഫ് എംപിമാർ ഡൽഹിയിൽ ഉന്നയിച്ചില്ലെന്ന ആരോപണം ഇടതുപക്ഷത്തിനുണ്ട്.

പാർലമെന്റിൽ വന്നിട്ടും സഹപ്രവർത്തകരായ കോൺഗ്രസ് അംഗങ്ങൾ കുറ്റം പറഞ്ഞത് പിണറായിയെയായിരുന്നു. മോദി സർക്കാരിന്റെ നയങ്ങളെ ആയിരുന്നു അവർ എതിർക്കേണ്ടിയിരുന്നത്. എന്നാൽ, പാർലമെന്റിലും അവർ എതിർത്തത് പിണറായി സർക്കാറിന്റെ നയങ്ങളെയായിരുന്നു. അവർ കേരളത്തിന്റെ പ്രതിപക്ഷത്തെപ്പോലെയാണ് പെരുമാറിയത്. എന്റെ പ്രസംഗങ്ങൾ പരിശോധിച്ചാൽ കേരളത്തിന്റെ അവകാശങ്ങൾക്കുവേണ്ടി ശബ്ദം ഉയർത്തിയതായി കാണാനാകും. 

പ്രതിപക്ഷ കക്ഷികൾ ഒറ്റക്കെട്ടായി തിരഞ്ഞെടുപ്പിനെ നേരിടുമെന്നതായിരുന്നു 'ഇന്ത്യ' സഖ്യം രൂപീകരിച്ചിരുന്ന കാലത്തെ മുദ്രാവാക്യം. എന്നാൽ, മുന്നോട്ടുള്ള യാത്രയിൽ സങ്കുചിതമായ കക്ഷിതാത്പര്യങ്ങൾ തുറന്നുകാണപ്പെട്ടു. സഖ്യത്തിലെ പ്രധാനികളായ കോൺ​ഗ്രസും പ്രതിരോധത്തിലാണ്.

ഇന്ത്യാ സഖ്യത്തിന്റെ നേതൃത്വം ആരും കോൺഗ്രസിനെ എൽപ്പിച്ചിട്ടില്ല. കോൺഗ്രസിനു പോലും അത്തരമൊരു അവകാശവാദമില്ല. തങ്ങൾക്ക് ആ നേതൃത്വം വേണ്ടെന്ന് കോൺഗ്രസ് വ്യക്തമാക്കിയതാണ്. പ്രതിപക്ഷ നേതൃസ്ഥാനം പോലും ഇന്ന് അവർക്കില്ല. 52 സീറ്റുകൾ മാത്രമാണ് കഴിഞ്ഞ തവണ കോൺ​ഗ്രസ് നേടിയത്. ഇത്രയും സീറ്റുകൾ ഇപ്രാവശ്യം ലഭിക്കുമോ എന്നതും സംശയമാണ്.

നോട്ടുനിരോധനം, പൗരത്വം തുടങ്ങി ജനങ്ങളെ നേരിട്ട് ബാധിക്കുന്ന വിഷയങ്ങൾ ധാരാളമായിരുന്നു 2019-ൽ. ഭരണപക്ഷത്തിനെതിരായ നിലപാടുകൾ ജനങ്ങളിലേക്കെത്തിക്കാൻ പ്രതിപക്ഷത്തിന് കഴിയുന്നില്ലേ.

അന്ന് ഇത്തരം വിഷയത്തിനിടയിലും സത്യപാൽ മാലിക് വെളിപ്പെടുത്തിയ ചില സംഭവങ്ങളുണ്ടായല്ലോ. കശ്മീരിലെ പുൽവാമ ആക്രമണം ആളിക്കത്തിച്ച് ദേശീയവികാരമാക്കി മാറ്റിയത്. ഇതിന്റെ പിന്നിലെ വസ്തുത ഇപ്പോൾ അദ്ദേഹം പുറത്തുവിട്ടു. ഈ രീതിയിലുള്ള ചില വിഷയങ്ങളിൽ നിന്നും കാര്യങ്ങൾ ഷിഫ്റ്റ് ചെയ്യപ്പെട്ടു. അത് ഇത്തവണയുമുണ്ടാകും. രാമക്ഷേത്ര നിർമാണം സർക്കാരുമായി യാതൊരു ബന്ധവുമില്ലാത്ത കാര്യമാണ്. കോടതിവിധി വന്നു. രണ്ട് കൂട്ടർക്കുമായി ഭൂമി വീതിച്ച് നൽകി വസ്തുതർക്കം പരിഹരിച്ചു. ക്ഷേത്ര ട്രസ്റ്റ് അവിടെ ക്ഷേത്രം നിർമിച്ചു. അവിടുത്തെ പൂജാരിമാരെ മാറ്റി പൂജാവിധികളൊന്നും വലുതായിട്ട് അറിയാത്ത ഒരാൾ കയറി പൂജകൾ ചെയ്തു. ഇക്കാര്യത്തിലെ ക്രെഡിറ്റ് എങ്ങിനെയാണ് സർക്കാരിന് വരിക. പക്ഷേ, അത് സർക്കാരിന്റേതാക്കി മാറ്റാൻ ശ്രമിക്കുകയാണ്.

തലസ്ഥാനത്ത് കർഷകർ സമരത്തിലാണ്. മോദി ​ഗ്യാരണ്ടിയിൽ വിശ്വസിക്കുമോ ജനങ്ങൾ.

തൊഴിലവസരം, കൃഷിക്കാരുടെ പ്രശ്‌നങ്ങൾ പരിഹരിക്കുക, ഗ്യാസിന്റേയും പെട്രോളിന്റെയും വില കുറയ്ക്കുക ഇത്തരത്തിലുള്ള ഗ്യാരണ്ടികളാണ് ഉണ്ടാവേണ്ടത്‌

ഒരു ത്രികോണ മത്സരത്തിനുള്ള എന്തെങ്കിലും സാധ്യതയുണ്ടോ ആലപ്പുഴയിൽ. 2014-ൽ വെറും 40,000 വോട്ടുകളുള്ള BJP 2019-ൽ സ്വന്തമാക്കിയത് 1,80,000 വോട്ടുകളാണ്. ശോഭാ സുരേന്ദ്രനെ പോലെയൊരു പ്രമുഖ എത്തുന്നത് വോട്ടർമാരെ സ്വാധീനിക്കുമോ

കഴിഞ്ഞ പ്രാവശ്യം ചില ഘടകങ്ങൾ ഉപയോഗപ്പെടുത്തിയതുകൊണ്ട് അവർക്ക് ചില വോട്ടുകൾ ലഭിച്ചിരുന്നു. അത്തരമൊരു സാഹചര്യം നിലവിലില്ല. ശോഭാ സുരേന്ദ്രനെ പോലെ ഒരു നേതാവെത്തിയാലും ആലപ്പുഴയിൽ ഒന്നും ചെയ്യാൻ കഴിയില്ല. പുന്നപ്ര വയലാറിന്റെ നാടല്ലേ. പെട്ടെന്ന് കയറി വർഗീയതയെ പിന്താങ്ങാനുള്ള ഒരു സാധ്യതയും ഞാൻ കാണുന്നില്ല.

തൃശ്ശൂരും തിരുവനന്തപുരവുമാണ് ബി.ജെ.പി തങ്ങളുടെ എ ക്ലാസ് മണ്ഡലങ്ങളായി കരുതുന്നത്. ഇത്തവണ അവർ അക്കൗണ്ട് തുറക്കാൻ എന്തെങ്കിലും സാധ്യതയുണ്ടോ.

ബി.ജെ.പി ഇത്തവണ സംസ്ഥാനത്ത് അക്കൗണ്ട് തുറക്കാൻ ഒരു വിദൂര സാധ്യതപോലുമില്ല. അവർക്ക് എ ക്ലാസ് മണ്ഡലങ്ങൾ എന്നൊക്കെ പ്രൊജക്ട് ചെയ്യാം. പക്ഷേ, പ്രയോജനം ഒന്നും ഉണ്ടാകാൻ പോകുന്നില്ല. 

താങ്കൾക്കെതിരെ പല രീതിയിലുള്ള ആരോപണങ്ങൾ ഉയർന്നുവന്നിരുന്നു. സാമൂഹ്യമാധ്യമങ്ങളിൽ വിദ്വേഷപ്രചാരണങ്ങൾ പോലുമുണ്ടായി.
‌
സംഘപരിവാർ കുറേ കാലമായി ഞാൻ പറഞ്ഞ ഒരു പ്രസംഗത്തിൽ നിന്നും ഒരു കാര്യം മാത്രം അടർത്തിയെടുത്ത് പ്രചരിപ്പിക്കുന്നു. സർക്കാറിനെ സംബന്ധിച്ചിടത്തോളം സ്ത്രീകളെ ശബരിമലയിൽ കയറ്റണമെന്ന് ഒരു നിർബന്ധബുദ്ധിയും ഇല്ലായിരുന്നു. അങ്ങനെ എന്തെങ്കിലും ഉദ്ദേശമുണ്ടായിരുന്നെങ്കിൽ സി.പി.എമ്മിന്റെ സംസ്ഥാനസെക്രട്ടറി വിളിച്ച് പറഞ്ഞാൽ എന്തുമാത്രം സ്ത്രീകൾ വരുമായിരുന്നു. ആരെയെങ്കിലും അവിടെ വന്നോ. വരുത്താൻ ശ്രമിച്ചോ. വിശ്വാസികളുടെ താത്പര്യം സംരക്ഷിക്കാനല്ലേ പാർട്ടി ശ്രമിച്ചത്. ഇതാണ് ഞാൻ പറഞ്ഞത്. എന്നാൽ, അതിൽ നിന്നും പാർട്ടി സെക്രട്ടറി പറഞ്ഞാൽ ലക്ഷക്കണക്കിന് യുവതീയുവാക്കൾ അവിടെ വരുമെന്ന് ഞാൻ പറഞ്ഞു എന്ന രീതിയിലായിരുന്നു പ്രചരണം. 

ഇത്തരം ശ്രമങ്ങൾ സംഘപരിവാർ നടത്തട്ടെ. ഇത് എന്നെക്കുറിച്ച് മാത്രമല്ല. മുസ്ലിം നാമധാരികളായിട്ടുള്ളവരെ എല്ലാവർക്കെതിരെയും സംഘപരിവാർ ഇത്തരം പ്രചരണങ്ങൾ അഴിച്ചുവിടുന്നു. സി.പി.എം നേതാവ് എളമരം കരീം പൊതുവിഷയത്തിൽ ഒരു അഭിപ്രായം പറഞ്ഞതിന് അദ്ദേഹത്തെ ഒരായിരം ചീത്ത സംഘപരിവാർ വിളിച്ചിട്ടുണ്ട്. എന്നുകരുതി എളമരം കരീം മുസ്ലീം തീവ്രവാദിയാണെന്ന് പറ‍ഞ്ഞാൽ ആരെങ്കിലും വിശ്വസിക്കുമോ.

ഇക്കാര്യങ്ങൾ ആലപ്പുഴയിലെ ജനങ്ങൾ തിരിച്ചറിയും. ഞാൻ ജനിച്ച് വളർന്നത് ആലപ്പുഴയിലാണ്. ഇത്ര കാലമായി എന്നെ അറിയുന്നവരാണ് ഇവിടുത്തെ ജനങ്ങളാണ്. എല്ലാ മതങ്ങളെയും വിശ്വസിക്കുകയും ബഹുമാനിക്കുകയും ആദരിക്കുകയും ചെയ്യുന്ന വ്യക്തിയാണ് ഞാൻ. അവിവടെയെല്ലാം പരസ്പര മതസൗഹാർദത്തിന്റെ കാര്യമാണ് സംസാരിക്കാറുള്ളത്.