ആറ്റിങ്ങല്‍: പോത്തന്‍കോട് സുധീഷ് വധക്കേസിലെ പ്രതികളെ മൂന്നുദിവസത്തേക്ക് പോലീസ് കസ്റ്റഡിയില്‍വിട്ടു. ആറ്റിങ്ങല്‍ ജുഡീഷ്യല്‍ ഒന്നാംക്ലാസ് മജിസ്ട്രേറ്റ് കോടതി (ഒന്ന്)യില്‍ അന്വേഷണോദ്യോഗസ്ഥനായ പോത്തന്‍കോട് സി.ഐ. കെ.ശ്യാം സമര്‍പ്പിച്ച അപേക്ഷയെത്തുടര്‍ന്നാണ് ബുധനാഴ്ച ഉച്ചയോടെ പ്രതികളെ കസ്റ്റഡിയില്‍ വിട്ടത്.
മങ്കാട്ടുമൂല എസ്.എസ്.ഭവനില്‍ സുധീഷ് ഉണ്ണി (മങ്കാട്ടുമൂല ഉണ്ണി-29), രണ്ടാംപ്രതി ചിറയിന്‍കീഴ് അഴൂര്‍ ഭഗവതീക്ഷേത്രത്തിനു സമീപം വിളയില്‍വീട്ടില്‍ രാജേഷ് (ഒട്ടകം രാജേഷ്-36), മൂന്നാംപ്രതി കുടുവൂര്‍ ഊരുക്കോണം ലക്ഷംവീട് കോളനിയില്‍ ശ്യാംകുമാര്‍ (29), ചിറയിന്‍കീഴ് ശാസ്തവട്ടം മാര്‍ത്താണ്ഡംകുഴി സുധീഷ് ഭവനില്‍ നിധീഷ് (27), ശാസ്തവട്ടം സീനഭവനില്‍ നന്ദീഷ് (ശ്രീക്കുട്ടന്‍-23), കണിയാപുരം മണക്കാട്ടുവിളാകം പറമ്പില്‍വീട്ടില്‍ രഞ്ജിത് (പ്രസാദ്-28),
തോന്നയ്ക്കല്‍ കുഴിന്തോപ്പില്‍വീട്ടില്‍ ജിഷ്ണു (ഉണ്ണി-22), കോരാണി വൈ.എം.എ. ജങ്ഷന്‍ വിഷ്ണുഭവനില്‍ സൂരജ് (വിഷ്ണു-23), മുദാക്കല്‍ ചെമ്പൂര് കുളക്കോട് പുത്തന്‍വീട്ടില്‍ സച്ചിന്‍ (24), കുടവൂര്‍ കട്ടിയാട് കല്ലുവെട്ടാന്‍കുഴിവീട്ടില്‍ അരുണ്‍ (23), പിരപ്പന്‍കോട് തൈക്കാട് മുളങ്കുന്ന് ലക്ഷംവീട് കോളനിയില്‍ ശ്രീനാഥ് (നന്ദു-21) എന്നിവരാണ് റിമാന്‍ഡിലുള്ളത്.
കസ്റ്റഡിയില്‍ വാങ്ങിയ പ്രതികളെ വലിയകുന്ന് താലൂക്കാശുപത്രിയില്‍ വൈദ്യപരിശോധനയ്ക്കു വിധേയമാക്കിയശേഷം പോത്തന്‍കോട് പോലീസ് സ്റ്റേഷനിലെത്തിച്ചു.
തെളിവെടുപ്പുകള്‍ക്കും ചോദ്യം ചെയ്യലിനുംശേഷം 24ന് വൈകീട്ട് പ്രതികളെ കോടതിയില്‍ ഹാജരാക്കണം.
പ്രതികളെ സംഭവസ്ഥലത്തെത്തിച്ചു തെളിവെടുത്തു
ആറ്റിങ്ങല്‍: പോത്തന്‍കോട് സുധീഷ് വധക്കേസിലെ 11 പ്രതികളെയും സംഭവസ്ഥലത്തെത്തിച്ച് പോലീസ് തെളിവെടുപ്പു നടത്തി. ബുധനാഴ്ച വൈകീട്ട് നാലുമണിയോടെയാണ് സി.ഐ. കെ.ശ്യാം, എസ്.ഐ. വിനോദ് വിക്രമാദിത്യന്‍ എന്നിവരുടെ നേതൃത്വത്തിലുള്ള പോലീസ് സംഘം പ്രതികളെ സ്ഥലത്തെത്തിച്ചത്. ജങ്ഷനില്‍ പോലീസ് വാഹനം നിര്‍ത്തി പ്രതികളെ പുറത്തിറക്കിയശേഷം കൊലപാതകം നടന്ന വീട്ടിലേക്ക് കൊണ്ടുപോയി. കൊലപാതകം നടന്നദിവസം വീടിനുള്ളില്‍ നടന്ന സംഭവങ്ങള്‍ പ്രതികള്‍ പോലീസിനു വിവരിച്ചുകൊടുത്തു. തുടര്‍ന്ന് മുറിച്ചെടുത്ത കാല് വലിച്ചെറിഞ്ഞ സ്ഥലത്തും പ്രതികളെ എത്തിച്ചു. അരമണിക്കൂറോളം സമയം തെളിവെടുപ്പ് നടത്തിയശേഷം പ്രതികളുമായി പോലീസ് മടങ്ങിപ്പോയി.
നിര്‍വികാരരായി പ്രതികള്‍
പോത്തന്‍കോട്: സുധീഷ് വധക്കേസിലെ പ്രതികളെ കനത്ത സുരക്ഷയിലാണ് പോലീസ് തെളിവെടുപ്പിനെത്തിച്ചത്. തെളിവെടുപ്പിന് ഇവരെ കല്ലൂരില്‍ കൊണ്ടുവരുന്നതറിഞ്ഞ് നാട്ടുകാര്‍ പ്രദേശത്ത് തടിച്ചുകൂടിയിരുന്നു.
കല്ലൂര്‍ ജങ്ഷനിലും കൊലപാതകം നടന്ന വീടിന്റെ പരിസരത്തും ജനക്കൂട്ടമെത്തി. കല്ലൂര്‍ ജങ്ഷനില്‍ നിര്‍ത്തിയ പോലീസ് വാഹനത്തില്‍നിന്ന് വിലങ്ങണിഞ്ഞ് പുറത്തിറങ്ങിയ പ്രതികള്‍ നിര്‍വികാരതയോടെ പോലീസുകാര്‍ക്കൊപ്പം മുന്നോട്ടുനീങ്ങി. ക്രൂരമായ കൊലപാതകം നടത്തിയവര്‍ മുന്നിലൂടെ കടന്നുപോയപ്പോഴും നാട്ടുകാരുടെ ഭാഗത്തുനിന്നു പ്രതികരണമൊന്നുമുണ്ടായില്ല. സമാധാനപരമായി തെളിവെടുപ്പ് നടത്താന്‍ ഇത് പോലീസിനെ സഹായിച്ചു.
കല്ലൂര്‍ പാണന്‍വിളയില്‍ സജീവിന്റെ വീടിനുള്ളിലിട്ടാണ് 11ന് ഉച്ചയ്ക്ക് പ്രതികള്‍ സുധീഷിനെ വെട്ടിക്കൊലപ്പെടുത്തിയത്. അന്നുമുതല്‍ ഈ വീട്ടില്‍ ആള്‍ത്താമസമില്ല. സജീവും കുടുംബവും ബന്ധുവീട്ടിലാണ് കഴിയുന്നത്.
സുധീഷിനെ കൊലപ്പെടുത്താനായി വന്ന വഴിയും സുധീഷിനെ കണ്ടുമുട്ടിയശേഷം നടത്തിയ ആക്രമണരീതികളും പ്രതികള്‍ പോലീസിനോടു വിവരിച്ചു. ഉദ്യോഗസ്ഥരുടെ ചോദ്യങ്ങള്‍ക്ക് തെല്ലും കൂസലില്ലാതെയായിരുന്നു പ്രതികളുടെ മറുപടി. വീടിനുള്ളില്‍ സുധീഷിനെ വെട്ടിവീഴ്ത്തിയ സ്ഥലം പ്രതികള്‍ പോലീസിന് കാണിച്ചുകൊടുത്തു.
സുധീഷിനെ അന്വേഷിച്ചെത്തുമ്പോള്‍ പ്രതികള്‍ പ്രദേശത്തെ മൂന്ന് വീടുകളില്‍ കയറി ജനാലകള്‍ തല്ലിപ്പൊളിക്കുകയും വീട്ടുകാരെ ഭീഷണിപ്പെടുത്തുകയും ചെയ്തിരുന്നു. ഈ വീടുകളിലേക്ക് പ്രതികളെ കൊണ്ടുപോയില്ല. തെളിവെടുപ്പ് പൂര്‍ത്തിയാക്കി മടങ്ങുമ്പോഴും പ്രതികള്‍ക്ക് യാതൊരു ഭാവഭേദവുമുണ്ടായിരുന്നില്ല.
പുറത്തുവരാനുള്ളത് ഗൂഢാലോചന; വാഹനങ്ങള്‍ കണ്ടെത്തണം
ആറ്റിങ്ങല്‍: പോത്തന്‍കോട് സുധീഷ് വധക്കേസിലെ പ്രതികളെ മൂന്നുദിവസത്തേക്ക് കസ്റ്റഡിയില്‍ ലഭിച്ച പോലീസിന് ചോദ്യം ചെയ്യലിലൂടെ പുറത്തുകൊണ്ടുവരാനുള്ളത് നിരവധി കാര്യങ്ങള്‍. കേസിലെ ഗൂഢാലോചന പുറത്തുകൊണ്ടുവരണം, കുറ്റകൃത്യത്തില്‍ നേരിട്ടോ അല്ലാതെയോ കൂടുതലാളുകള്‍ പങ്കെടുത്തിട്ടുണ്ടോയെന്നറിയണം, ഗൂഢാലോചനയില്‍ പങ്കെടുത്തവരെയും പ്രതികളെ ഒളിവില്‍ക്കഴിയാനും രക്ഷപ്പെടാനും സഹായിച്ചവരെയും കണ്ടെത്തണം.
ആക്രമണത്തിനായി സംഭവസ്ഥലത്തെത്താനും രക്ഷപ്പെടാനും ഉപയോഗിച്ച വാഹനങ്ങള്‍ കണ്ടെത്തണം, കൂടുതല്‍ ആയുധങ്ങള്‍ ഉപയോഗിച്ചിട്ടുണ്ടെങ്കില്‍ അവ പിടിച്ചെടുക്കണം, കുറ്റകൃത്യത്തെക്കുറിച്ചും അതിലേക്ക് നയിച്ച കാരണങ്ങളെക്കുറിച്ചും വ്യക്തതവരുത്തേണ്ടതുണ്ട്.
പ്രതികളെ ഒറ്റയ്ക്കൊറ്റയ്ക്കും കൂട്ടായും ചോദ്യം ചെയ്ത് കേസില്‍ വ്യക്തതവരുത്തുമെന്നും ആവശ്യമായ എല്ലാ തെളിവുകളും ശേഖരിക്കുമെന്നും പോലീസ് പറഞ്ഞു. ഒരു ഓട്ടോറിക്ഷയിലും രണ്ട് ബൈക്കുകളിലുമായാണ് പ്രതികള്‍ ആക്രമണത്തിനെത്തിയത്.
ഇതില്‍ ഓട്ടോറിക്ഷ പോലീസ് പിടിച്ചെടുത്തിട്ടുണ്ട്. ബൈക്കുകള്‍ കണ്ടെത്തേണ്ടതുണ്ട്. കോടതി അനുവദിച്ചിട്ടുള്ള സമയത്തിനുള്ളില്‍ നടപടികള്‍ പൂര്‍ത്തിയാക്കാനാണ് ശ്രമമെന്ന് പോലീസ് പറഞ്ഞു.
'ഒന്നും ചെയ്യല്ലേ...സുധീഷ് കരഞ്ഞപേക്ഷിച്ചു'
പോത്തന്‍കോട്: ആയുധങ്ങളുമായി അടുക്കലെത്തുമ്പോള്‍ സുധീഷ് കാലില്‍വീണ് ഒന്നുംചെയ്യല്ലേയെന്നു കരഞ്ഞപേക്ഷിച്ചുവെന്ന് പ്രതികള്‍ പോലീസിന് മൊഴിനല്‍കി. തിരിച്ച് ഒരുതരത്തിലും ഉപദ്രവിക്കില്ലെന്നും വെറുതേവിടണമെന്നും സുധീഷ് പ്രതികളോട് അപേക്ഷിച്ചു. -പോലീസ് പറഞ്ഞു.
കല്ലൂര്‍ പാണന്‍വിളയിലെ വീട്ടില്‍ സുധീഷ് ഉണ്ടെന്നറിഞ്ഞുതന്നെയാണ് ഇവിടേക്കെത്തിയത്. ഓടിച്ച് വീട്ടില്‍ കയറ്റുകയായിരുന്നില്ലെന്നും പ്രതികള്‍ മൊഴിനല്‍കി. മറ്റുള്ളവരുടെ മൊഴികളുമായി ചേര്‍ത്ത് വെച്ച് ഇവ പരിശോധിക്കേണ്ടതുണ്ടെന്ന് പോലീസ് പറഞ്ഞു. സുധീഷ് കൊല്ലപ്പെട്ട വീടിന്റെ ഉടമയായ സജീവും ഭാര്യയും പോലീസില്‍ മൊഴി നല്‍കി മടങ്ങുമ്പോള്‍ ഭീഷണിയുണ്ടായി. ബൈക്കിലെത്തിയ സംഘം ഭീഷണിപ്പെടുത്തിയതായി ഇവര്‍ പോലീസിനെ അറിയിച്ചിട്ടുണ്ട്. എന്നാല്‍ പരാതി നല്‍കിയിട്ടില്ല. ഇതു സംബന്ധിച്ചും അന്വേഷണം നടത്തുമെന്ന് പോലീസ് പറഞ്ഞു.
Content Highlights : Pothencode Murder Case Investigation
Published: 23 Dec 2021, 06:43 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented