തിരുവനന്തപുരം: കോവളം ലൈറ്റ്ഹൗസ് ബീച്ചിന് സമീപമുള്ള കടയിൽ നിന്ന് മൂന്ന് ലക്ഷം രൂപ വിലമതിക്കുന്ന നിരോധിത പുകയില ഉൽപ്പന്നങ്ങൾ എക്സൈസ് പിടികൂടി. രഹസ്യ വിവരത്തെ തുടർന്ന് ബുധനാഴ്ച രാത്രി 9.30-ഓടെ നടത്തിയ പരിശോധനയിലാണ് 100 കിലോയോളം തൂക്കം വരുന്ന ഈ ഉൽപ്പന്നങ്ങൾ കണ്ടെടുത്തത്.

To advertise here,

വിഴിഞ്ഞം ടൗൺഷിപ്പ് സ്വദേശിയായ ഹബീബ് (50) എന്നയാളുടെ ഉടമസ്ഥതയിലുള്ള സ്വകാര്യ കടയിലാണ് പുകയില ഉൽപ്പന്നങ്ങൾ സൂക്ഷിച്ചിരുന്നത്. വിനോദസഞ്ചാര മേഖലയിലെ തിരക്ക് മുതലെടുത്ത് കുറഞ്ഞ വിലയ്ക്ക് വാങ്ങുന്ന ഇത്തരം ഉൽപ്പന്നങ്ങൾ മൂന്ന് മുതൽ നാലിരട്ടി വരെ വിലയ്ക്കാണ് ഇയാൾ വിറ്റിരുന്നതെന്ന് അന്വേഷണത്തിൽ വ്യക്തമായി.

പുകയില ഉൽപ്പന്നങ്ങൾക്ക് പുറമെ, യാതൊരുവിധ രേഖകളുമില്ലാതെ എത്തിച്ച വിദേശ സിഗററ്റുകളും ഈ കടയിൽ വിൽക്കുന്നുണ്ടെന്ന് എക്സൈസ് ഇൻസ്പെക്ടർ ജെ.എസ്. പ്രശാന്ത് അറിയിച്ചു. നികുതി വെട്ടിപ്പ് ഉൾപ്പെടെയുള്ള കാര്യങ്ങൾ പരിശോധിക്കുന്നതിനായി ഈ വിവരം ജി.എസ്.ടി (GST) വിഭാഗത്തിന് കൈമാറിയിട്ടുണ്ട്. എക്സൈസ് നെയ്യാറ്റിൻകര റേഞ്ച് ഇൻസ്പെക്ടർ ജെ.എസ്. പ്രശാന്തിന്റെ നേതൃത്വത്തിൽ ബി. പ്രസന്നൻ, ജി. അനീഷ്, അൽത്താഫ്, ലാൽകൃഷ്ണ എന്നിവരടങ്ങുന്ന സംഘമാണ് പരിശോധനയ്ക്കും അറസ്റ്റിനും നേതൃത്വം നൽകിയത്.