പശ്ചിമഘട്ട മലനിരകള്‍ ഒരുക്കിയ ദൃശ്യവിസ്മയം. വര്‍ഷം മുഴുവന്‍ മഞ്ഞും മഴയുമായൊരിടം. നിമിഷനേരങ്ങള്‍ കൊണ്ട് മുഖഭാവങ്ങള്‍ മാറിമറിയുന്ന മലയോരം. അതാണ് പൊന്മുടി.

To advertise here,

തിരുവനന്തപുരം ടൗണില്‍ നിന്ന് പൊന്മുടിയിലേക്ക് അറുപത് കിലോമീറ്ററോളം കണക്കാക്കാം. മീന്‍മുട്ടിയിലെ ചെക്ക് പോസ്റ്റ് കടന്നുവേണം കാനനയാത്രയിലെ കാല്പനികാനുഭവത്തിലേക്ക് കടക്കുന്നത്. 

22 ഹെയര്‍പിന്‍ വളവുകളുണ്ട് പൊന്മുടിയുടെ ഉയരങ്ങളിലേക്കെത്താന്‍. മഞ്ഞിന്റെ പൊന്‍കണങ്ങളാണ് വഴിയുടെ പച്ചപ്പിന് പശ്ചാത്തലമാകുന്നത്. ഹരിതശിഖരങ്ങളില്‍ തൂവെള്ള പുതപ്പുകണക്കേ മഞ്ഞുമൂടുന്നു. യാത്രയുടെ വഴികളിലേക്ക് ആകാശം വന്നിറങ്ങുകയാണോ എന്ന് തോന്നും ഈ മഞ്ഞുകാണുമ്പോള്‍.

മഞ്ഞും വെയിലും മഴയുമൊക്കെയായി മാറിക്കൊണ്ടിരിക്കുന്ന കാലാവസ്ഥയാണ് പൊന്മുടിയില്‍. സമുദ്രനിരപ്പില്‍ നിന്ന് 1100 മീറ്റര്‍ ഉയരെയാണ് പൊന്മുടി സ്ഥിതി ചെയ്യുന്നത്. പൊന്മുടി ഇക്കോ ടൂറിസത്തെ സൂചിപ്പിക്കുന്ന ബോര്‍ഡുകളാണ് യാത്രക്കാരെ വരവേല്‍ക്കുന്നത്. വരയാടുകളേക്കുറിച്ചും ഒരുപാട് പറയാനുണ്ട് പൊന്മുടിക്ക്.

placeholder
തെന്മല ഡാം | ഫോട്ടോ: മാതൃഭൂമി ന്യൂസ്

ട്രെക്കിങ്ങിനായുള്ള അവസരവും ഇവിടെയുണ്ട്. ആദ്യം വ്യൂപോയിന്റിലേക്ക് നീങ്ങാം. വാച്ച് ടവറിലേക്കെത്താന്‍ വിശാലമായ പച്ചക്കുന്ന് കയറണം. ചുറ്റും മഞ്ഞാണ്, ആകാശത്തെ തൊട്ടുരുമ്മുന്ന മഞ്ഞ്. പുല്‍മേട്ടിലൂടെ സൂക്ഷിച്ച് മുകളിലേക്ക് കയറാം. വാച്ച് ടവറില്‍ കയറിയാല്‍ കാണാം താഴെ മഞ്ഞുമറച്ച താഴ് വാരം. പൊന്മുടിയുടെ സൗന്ദര്യത്തിന് അലങ്കാരമാവുകയാണ് ഈ ഹിമവലയം.

ഈ തൂമഞ്ഞ് കൊതിച്ചുതന്നെയാണ് ഓരോ സഞ്ചാരിയും ഇവിടെയെത്തുന്നത്. ഉയരങ്ങള്‍ കണ്ട് തിരിച്ചിറങ്ങുമ്പോള്‍ മഞ്ഞ് വിടപറയുന്നതും കാണാം.

മാതൃഭൂമി ന്യൂസില്‍ സംപ്രേഷണം ചെയ്യുന്ന മാതൃഭൂമി യാത്രയ്ക്ക് വേണ്ടി ട്രാവല്‍ ജേണലിസ്റ്റ് റോബി ദാസ് നടത്തിയ പൊന്മുടി യാത്രയില്‍ നിന്ന്. യാത്രയുടെ പൂര്‍ണമായ വീഡിയോ കാണാം

Content Highlights: Ponmudi, Ponmudi Eco Tourism, Ponmudi Dam, Kerala Tourism, Roby Das, Mathrubhumi Yathra