ലണ്ടൻ: ഇംഗ്ലണ്ട് ടെസ്റ്റ് ടീമിന്റെ ബാറ്റിങ് പരിശീലകനാകാനുള്ള ക്ഷണം നിരസിച്ചുകൊണ്ട് മുൻ ഓസ്ട്രേലിയൻ താരം മൈക്കൽ ഹസ്സി ക്രിക്കറ്റ് ഓസ്ട്രേലിയയിൽ പാർട്ട് ടൈം കൺസൾട്ടന്റായി ചുമതലയേൽക്കുന്നു. അടുത്ത വർഷം നടക്കാനിരിക്കുന്ന ആഷസ് പരമ്പരയ്ക്ക് മുന്നോടിയായി ഓസ്ട്രേലിയയ്ക്ക് വലിയൊരു ആത്മവിശ്വാസമാണ് ഈ തീരുമാനം. അതേസമയം, പുതിയൊരു ബാറ്റിങ് പരിശീലകനെ കണ്ടെത്താൻ ഇംഗ്ലണ്ട് ടെസ്റ്റ് ടീം മുഖ്യ പരിശീലകനായ സ്റ്റീഫൻ ഫ്‌ളെമിങ്ങിന് ഇത് വലിയ വെല്ലുവിളിയാകുകയും ചെയ്യും.

To advertise here,

ഫ്രാഞ്ചൈസി ക്രിക്കറ്റിലെ തന്റെ മറ്റ് കരാറുകളും, ദ ഹണ്ട്രഡ് ടൂർണമെന്റും, കമന്ററി ഉൾപ്പെടെയുള്ള മാധ്യമരംഗത്തെ മറ്റ് തിരക്കുകളുമായി ഒത്തുപോകാൻ ക്രിക്കറ്റ് ഓസ്ട്രേലിയയിലെ പാർട്ട് ടൈം കൺസൾട്ടന്റ് റോൾ സഹായിക്കുമെന്നതിനാലാണ് ഹസ്സി ഇംഗ്ലണ്ടിന്റെ ഓഫർ വേണ്ടെന്നുവെച്ചതെന്ന് ദി ഗാർഡിയൻ റിപ്പോർട്ട് ചെയ്തു. ഐപിഎല്ലിൽ ചെന്നൈ സൂപ്പർ കിങ്‌സിന്റെ ബാറ്റിങ് പരിശീലകനായും ദ ഹണ്ട്രഡിൽ വെൽഷ് ഫയർ ടീമിന്റെ മുഖ്യ പരിശീലകനായും അദ്ദേഹം പ്രവർത്തിക്കുന്നുണ്ട്. ഇതിനു പുറമെ ഫോക്‌സ് സ്‌പോർട്‌സിലെ കമന്ററി, ക്രിക്കറ്റ് പണ്ഡിറ്റ് ചുമതലകളും ഹസ്സിക്കുണ്ട്.

കഴിഞ്ഞ മാസം സ്റ്റീഫൻ ഫ്‌ളെമിങ്ങുമായി ഹസ്സി ചർച്ചകൾ നടത്തിയിരുന്നു എങ്കിലും ഓസ്ട്രേലിയൻ റോളിൽ തുടരാൻ അദ്ദേഹം തീരുമാനിക്കുകയായിരുന്നു. മുൻപ് സിഎസ്‌കെയിൽ കളിക്കാരനായും പിന്നീട് കോച്ചിങ് സ്റ്റാഫായും ഫ്‌ളെമിങ്ങുമായി 18 വർഷത്തെ ദീർഘകാല ബന്ധം ഹസ്സിക്കുണ്ട്. മുൻപ് 2022-ൽ ടി20 ലോകകപ്പ് നേടിയ ഇംഗ്ലണ്ട് ടീമിന്റെ പാർട്ട് ടൈം കൺസൾട്ടന്റായും അദ്ദേഹം പ്രവർത്തിച്ചിട്ടുണ്ട്.

ഹസ്സിയുടെ പിന്മാറ്റം ഫ്‌ളെമിങ്ങിന് തിരിച്ചടിയായെങ്കിലും, നിലവിൽ പാകിസ്താനെതിരായ ടെസ്റ്റ് പരമ്പരയിൽ താത്കാലിക ബാറ്റിങ് കോച്ചായി മികച്ച രീതിയിൽ പ്രവർത്തിക്കുന്ന മുൻ ഇംഗ്ലണ്ട് താരം മാർക്കസ് ട്രെസ്‌കോത്തിക്കിനെ ഇംഗ്ലണ്ടിന് ഈ സ്ഥാനത്തേക്ക് സ്ഥിരമായി പരിഗണിക്കാൻ സാധിക്കും.

അന്താരാഷ്ട്ര ക്രിക്കറ്റിൽ വലിയ അനുഭവസമ്പത്തുള്ള ഹസ്സിയുടെ സാന്നിധ്യം വരാനിരിക്കുന്ന ആഷസിൽ ഓസ്ട്രേലിയയ്ക്ക് കരുത്താകും. ഓസ്ട്രേലിയക്കായി 79 ടെസ്റ്റുകളിലും, 185 ഏകദിനങ്ങളിലും, 38 ടി20 മത്സരങ്ങളിലും കളിച്ചിട്ടുള്ള ഈ ഇടംകൈയ്യൻ ബാറ്റർ 51.52 ശരാശരിയിൽ 6,235 ടെസ്റ്റ് റൺസ് നേടിയിട്ടുണ്ട്. 2007-ൽ ലോകകപ്പ് കിരീടം നേടാൻ രാജ്യത്തെ സഹായിച്ച ഹസ്സി 2013-ലാണ് വിരമിച്ചത്. 2027 ജൂൺ 18-ന് പെർത്തിലാണ് ആഷസ് പരമ്പരയ്ക്ക് തുടക്കമാകുന്നത്.