'ഞാനുണ്ടാകും ഒപ്പം'; പഞ്ചാബ് കിങ്‌സിലേക്കുള്ള മാറ്റത്തിനു പിന്നാലെ ഹാർദിക്

മുംബൈ: ഐപിഎല്ലിൽ പഞ്ചാബ് കിങ്‌സിലേക്കുള്ള മാറ്റത്തിനു പിന്നാലെ ഇന്ത്യൻ ഓൾറൗണ്ടർ ഹാർദിക് പാണ്ഡ്യ വലിയ ആവേശത്തിലാണ്. ശ്രേയസ് അയ്യരുടെ നേതൃത്വത്തിൽ പഞ്ചാബ് കിങ്‌സിനായി തന്റെ ഓൾറൗണ്ട് കഴിവുകൾ ഉപയോഗിച്ച് മികച്ച സംഭാവന നൽകാൻ കഴിയുമെന്ന് ഹാർദിക് പ്രതീക്ഷ പ്രകടിപ്പിച്ചു. തന്റെ ക്യാപ്റ്റൻ, പരിശീലകൻ റിക്കി പോണ്ടിങ്, കൂടാതെ മുഴുവൻ പഞ്ചാബ് ടീമിനും ഒപ്പം താനുണ്ടാകുമെന്ന് അദ്ദേഹം ഇൻസ്റ്റാഗ്രാമിൽ കുറിച്ചു.

പഞ്ചാബ് ക്യാപ്റ്റൻ ശ്രേയസ് അയ്യർ, പരിശീലകൻ റിക്കി പോണ്ടിങ്, പഞ്ചാബ് ടീം എന്നിവർക്ക് പിന്തുണ പ്രഖ്യാപിച്ചുകൊണ്ടാണ് ഹാർദിക് ഇൻസ്റ്റാഗ്രാമിൽ കുറിപ്പ് പങ്കുവെച്ചത്. 'സത് ശ്രീ അകാൽ, എന്റെ ക്യാപ്റ്റൻ ശ്രേയസ്, എന്റെ കോച്ച് റിക്കി, എന്റെ ടീം, മുഴുവൻ പഞ്ചാബ്, ഞാൻ നിങ്ങൾക്കൊപ്പമുണ്ട്' - താരം കുറിച്ചു.

മുംബൈ ഇന്ത്യൻസ് നായകനായിരുന്ന ഹാർദിക് പാണ്ഡ്യ ഇനി പഞ്ചാബ് കിങ്സിനായി കളത്തിലിറങ്ങും. പകരം ഇന്ത്യയുടെ മുൻനിര ഇടങ്കയ്യൻ ഫാസ്റ്റ് ബൗളറായ അർഷ്ദീപ് സിങ് മുംബൈ ഇന്ത്യൻസിലേക്ക് ചേക്കേറി. ഇക്കാര്യം ബുധനാഴ്ച ഐപിഎൽ തന്നെ ഔദ്യോഗികമായി പ്രഖ്യാപിച്ചു. ഐപിഎൽ ചരിത്രത്തിലെ ഏറ്റവും വലിയ ട്രേഡ് ഡീലാണിത്. 18 കോടി രൂപയ്ക്കാണ് ഹാർദിക് പാണ്ഡ്യയെ പഞ്ചാബ് കിങ്സ് സ്വന്തമാക്കിയത്. അർഷ്ദീപ് സിങ് അതേ തുകയായ 18 കോടി രൂപയ്ക്ക് മുംബൈ ഇന്ത്യൻസിന്റെ ഭാഗമാകും.

ഈ ട്രേഡോടെ മുംബൈ ഇന്ത്യൻസുമായുള്ള ഹാർദിക്കിന്റെ രണ്ടാം ഘട്ടത്തിനാണ് തിരശ്ശീല വീഴുന്നത്. 2015, 2017, 2019, 2020 സീസണുകളിൽ മുംബൈ കിരീടം നേടിയപ്പോൾ ഹാർദിക് ടീമിന്റെ ഭാഗമായിരുന്നു. 2022-ൽ ഗുജറാത്ത് ടൈറ്റൻസിലേക്ക് മാറിയ അദ്ദേഹം ടീമിനെ അരങ്ങേറ്റ സീസണിൽ തന്നെ കിരീടത്തിലേക്കും 2023-ൽ ഫൈനലിലേക്കും നയിച്ചു. തുടർന്ന് 2024-ൽ മുംബൈ ഇന്ത്യൻസിലേക്ക് തിരിച്ചെത്തി ക്യാപ്റ്റൻ സ്ഥാനം ഏറ്റെടുത്തു. ഐപിഎല്ലിൽ ആകെ 162 മത്സരങ്ങളിൽ നിന്ന് 2,955 റൺസും 82 വിക്കറ്റുകളും ഹാർദിക് നേടിയിട്ടുണ്ട്.