ലോകമെമ്പാടും ഇന്ത്യൻ ക്രിക്കറ്റിന് വലിയ ആരാധക പിന്തുണയാണുള്ളത്. ഇന്ത്യ ഉൾപ്പെടുന്ന ഏതൊരു ക്രിക്കറ്റ് പരമ്പരയും പണം വാരിത്തരുകയും ചെയ്യും. എന്നാൽ ആ പണം ഇന്ത്യയ്ക്ക് മാത്രം അവകാശപ്പെട്ടതാണ്. ഈ വരുമാന മാതൃകയെ വിമർശിച്ച് വെസ്റ്റിൻഡീസ് ക്രിക്കറ്റ് ബോർഡ് സി.ഇ.ഒ ക്രിസ് ഡെറിങ് രംഗത്തെത്തി.

To advertise here,

രണ്ട് രാജ്യങ്ങൾ തമ്മിൽ പരമ്പര കളിക്കുമ്പോൾ വരുമാനം മുഴുവൻ ആതിഥേയ രാജ്യത്തിന് ലഭിക്കുന്നതിനെയാണ് ക്രിസ് ഡെറിങ് വിമർശിച്ചത്. ഇന്ത്യയും വെസ്റ്റിൻഡീസും തമ്മിൽ ഇപ്പോൾ നടന്നുകൊണ്ടിരിക്കുന്ന പരമ്പരയെ അദ്ദേഹം ഇതിന് ഉദാഹരണമായി ചൂണ്ടിക്കാണിച്ചു. ഈ പരമ്പരയിൽ പ്രതീക്ഷിക്കുന്ന 285 കോടി രൂപ വരുമാനത്തിൽ നിന്ന് തന്റെ രാജ്യത്തിന് ഒന്നും ലഭിക്കില്ലെന്ന് അദ്ദേഹം ചൂണ്ടിക്കാണിച്ചു.

വിസ്ഡന്റെ 'ദി സ്‌കൂപ്പ്' എന്ന പരിപാടിയിൽ സംസാരിക്കവെ, 1997-ൽ അംഗീകരിച്ച ഈ മാതൃകയാണ് കരീബിയൻ മേഖലയിൽ ക്രിക്കറ്റിന്റെ തകർച്ചയ്ക്ക് അടിത്തറയിട്ടതെന്ന് ഡെറിങ് വ്യക്തമാക്കി. ശക്തമായ ഒരു ക്രിക്കറ്റ് ശക്തിയായിരുന്ന വെസ്റ്റിൻഡീസ് എല്ലാ ഫോർമാറ്റുകളിലും പിന്നോട്ട് പോയിരിക്കുകയാണ്. ശമ്പളവുമായി ബന്ധപ്പെട്ട് കളിക്കാരുടെ അസംതൃപ്തിയും തുടർച്ചയായ സാമ്പത്തിക പ്രതിസന്ധികളും വെസ്റ്റിൻഡീസ് ക്രിക്കറ്റ് നേരിട്ടിട്ടുണ്ട്. തുടർച്ചയായ സാമ്പത്തിക ബുദ്ധിമുട്ടുകൾ കാരണം കളിക്കാരുടെ ശമ്പളം വെട്ടിക്കുറയ്ക്കാനും കരാറുകൾ ചുരുക്കാനും ബോർഡ് അടുത്തിടെ നിർബന്ധിതമായി.

'1997ലെ തീരുമാനം തികച്ചും അനീതിപരമായിരുന്നു. ഐ.സി.സി അംഗരാജ്യങ്ങൾ ഒന്നിനെതിരെ ഒൻപത് വോട്ടുകൾക്കാണ് ഞങ്ങളെ തോൽപ്പിച്ചത്. വെസ്റ്റിൻഡീസ് ക്രിക്കറ്റിന്റെ പ്രധാന വരുമാന സ്രോതസ്സ് ഇല്ലാതാക്കുന്നതിലൂടെ ഈ തീരുമാനം അതിന്റെ അന്ത്യം കുറിച്ചു എന്ന് അന്ന് ഞാൻ പറഞ്ഞിരുന്നു,' ഡെറിങ് പറഞ്ഞു.

'അതായത്, ഒന്നര ബില്യൺ ജനസംഖ്യയുള്ള ഇന്ത്യയിൽ നിന്ന് ലഭിക്കുന്ന വരുമാനം ഇന്ത്യയ്ക്ക് നിലനിർത്താം. അതേസമയം വെസ്റ്റിൻഡീസിന് ഏകദേശം 100,000 ജനസംഖ്യയുള്ള ആന്റിഗ്വയിലോ അല്ലെങ്കിൽ ഏകദേശം 30,000 ജനസംഖ്യയുള്ള സെന്റ് കിറ്റ്‌സിലോ മത്സരം നടത്തുമ്പോൾ ലഭിക്കുന്ന ചെറിയ വരുമാനം മാത്രമേ ഉണ്ടാകൂ'-അദ്ദേഹം വിശദീകരിച്ചു.

മുൻ വെസ്റ്റിൻഡീസ് ക്രിക്കറ്റ് പ്രസിഡന്റ് ഡേവ് കാമറൂണും സമീപകാല മാധ്യമ ചർച്ചകളിൽ സമാനമായ അഭിപ്രായങ്ങൾ പ്രകടിപ്പിച്ചിട്ടുണ്ട്. വരുമാന പങ്കിടൽ മാതൃക നിരാശാജനകമാണെന്നാണ് അദ്ദേഹം പറഞ്ഞത്. മൊത്തം ഐ.സി.സി വരുമാനത്തിന്റെ ഏകദേശം അഞ്ച് ശതമാനമാണ് വെസ്റ്റിൻഡീസിന് ലഭിക്കുന്നത്. അതേസമയം വലിയ വിപണിയും ഉയർന്ന വരുമാനവും കാരണം ഇന്ത്യയ്ക്ക് ഏറ്റവും വലിയ വിഹിതമായ 38 ശതമാനത്തിന് മുകളിലാണ് ലഭിക്കുന്നത്.