മാതൃഭൂമിയുടെ ശതാബ്ദി ആഘോഷങ്ങള്‍ക്ക് പത്രം പിറന്നുവീണ കോഴിക്കോടിന്റെ മണ്ണില്‍ നാളെ തുടക്കം. കോഴിക്കോട് സരോവരം മൈതാനത്തെ ട്രേഡ് സെന്ററില്‍ പ്രത്യേകം തയ്യാറാക്കിയ വേദിയില്‍ പ്രധാനമന്ത്രി നരേന്ദ്രമോദിയാണ് തത്സമയ ഓണ്‍ലൈന്‍ ഭാഷണത്തിലൂടെ ആഘോഷങ്ങള്‍ ഉദ്ഘാടനം ചെയ്യുക. മുഖ്യമന്ത്രി പിണറായി വിജയന്‍ ഓണ്‍ലൈനിലൂടെ മുഖ്യപ്രഭാഷണം നടത്തും. ശതാബ്ദി ആഘോഷാരംഭവേദിയില്‍ ദീപംകൊളുത്തി അനുഗ്രഹപ്രകാശം ചൊരിയാന്‍ മലയാളത്തിലെ 11 സാംസ്‌കാരികനായകരെത്തും.ശതാബ്ദിഫലകം ജ്ഞാനപീഠജേതാവ് എം.ടി. വാസുദേവന്‍ നായര്‍ അനാച്ഛാദനം ചെയ്യും.

To advertise here,

കേന്ദ്രമന്ത്രി വി. മുരളീധരന്‍, എം.പി.യും കോണ്‍ഗ്രസ് നേതാവുമായ രാഹുല്‍ ഗാന്ധി, പ്രതിപക്ഷനേതാവ് വി.ഡി. സതീശന്‍ (ഇരുവരും ഓണ്‍ലൈന്‍), മന്ത്രി പി.എ. മുഹമ്മദ് റിയാസ്, മേയര്‍ ബീനാ ഫിലിപ്പ്, എം.കെ. രാഘവന്‍ എം.പി., എളമരം കരീം എം.പി., മലയാള മനോരമ മാനേജിങ് എഡിറ്റര്‍ ജേക്കബ് മാത്യു, വാള്‍ട്ട് ഡിസ്നി കമ്പനി ഇന്ത്യ ആന്‍ഡ് സ്റ്റാര്‍ ഇന്ത്യ പ്രസിഡന്റ് കെ. മാധവന്‍ എന്നിവരുടെ വിശിഷ്ടസാന്നിധ്യമുണ്ടാവും.

മാതൃഭൂമി ചെയര്‍മാന്‍ ആന്‍ഡ് മാനേജിങ് എഡിറ്റര്‍ പി.വി. ചന്ദ്രന്‍ അധ്യക്ഷത വഹിക്കും. മാനേജിങ് ഡയറക്ടര്‍ എം.വി. ശ്രേയാംസ് കുമാര്‍ ആമുഖഭാഷണം നിര്‍വഹിക്കും. ജോയന്റ് മാനേജിങ് എഡിറ്റര്‍ പി.വി. നിധീഷ് സ്വാഗതം പറയും. ഡിജിറ്റല്‍ ബിസിനസ് ഡയറക്ടര്‍ മയൂര ശ്രേയാംസ് കുമാര്‍ നന്ദിപറയും.