കാസർകോട്: ആലപ്പുഴ-കണ്ണൂർ എക്സിക്യൂട്ടീവ് എക്സ്പ്രസ് (16307/16308) കാസർകോട്ടേക്ക് നീട്ടിയേക്കുമെന്ന്‌ സൂചന. മുൻപ് ഇതേക്കുറിച്ച് ആലോചന നടന്നിരുന്നെങ്കിലും യാഥാർഥ്യമായിരുന്നില്ല. സമയക്രമവും എന്നുമുതലാണ് നീട്ടുന്നതെന്ന കാര്യവുമൊന്നും പുറത്തുവന്നിട്ടില്ല. തീവണ്ടി നീട്ടുന്നത് കണ്ണൂരിനു വടക്കോട്ടുള്ള യാത്രക്കാർക്ക് പ്രയോജനപ്പെടുമെങ്കിലും രാത്രി വൈകി ഇവിടെയെത്തുന്നതും പുലർച്ചെ വളരെ നേരത്തേ പുറപ്പെടുന്നതും അസൗകര്യമാണ്.

To advertise here,

വൈകിട്ട് 3.50-ന് ആലപ്പുഴയിൽനിന്ന്‌ പുറപ്പെടുന്ന വണ്ടി 12.30-നാണ് കണ്ണൂരിലെത്തുന്നത്. കണ്ണൂരിൽനിന്ന്‌ പുലർച്ചെ 5.10-ന് പുറപ്പെട്ട് ഉച്ചയ്ക്ക് 1.30-ന് ആലപ്പുഴയിലുമെത്തും. തിരുവനന്തപുരം-മംഗളൂരു വന്ദേഭാരത് എക്സ്പ്രസിനെ കടത്തിവിടാനായി വഴിയിൽ പിടിച്ചിടുന്നതിനാൽ മിക്ക ദിവസങ്ങളിലും വണ്ടി കണ്ണൂരിലെത്തുന്നത് വൈകിയാണ്. അതേപോലെ എറണാകുളം-കണ്ണൂർ ഇന്റർസിറ്റി എക്സ്പ്രസുമായി റേക്ക് പങ്കിട്ടാണ് എക്സിക്യൂട്ടീവ് എക്സ്പ്രസ് സർവീസ് നടത്തുന്നത്. കാസർകോട്ടേക്ക് നീട്ടിയാൽ ഇക്കാര്യത്തിലും ക്രമീകരണം വേണ്ടിവരും.

സൗകര്യം പാലക്കാട്-കണ്ണൂർ എക്സ്പ്രസ് നീട്ടുന്നത്

ആലപ്പുഴ എക്സിക്യൂട്ടീവിനെ അപേക്ഷിച്ച് പാലക്കാട്-കണ്ണൂർ എക്സ്പ്രസ് (പ്രധാനമായും കോയമ്പത്തൂർ-കണ്ണൂർ ലിങ്ക് സർവീസ്) കാസർകോട്ടേക്ക് നീട്ടുന്നതാണ് കണ്ണൂരിന്‌ വടക്കോട്ടുള്ള യാത്രക്കാർക്ക് കൂടുതൽ പ്രയോജനപ്പെടുക.

16611 പാലക്കാട് - കണ്ണൂർ എക്സ്പ്രസ്: ദിവസവും ഉച്ചകഴിഞ്ഞ് 1.50-ന് പാലക്കാട്ടുനിന്ന് പുറപ്പെട്ട് രാത്രി 7.25-ന് കണ്ണൂരിലെത്തും.

16607 കണ്ണൂർ-കോയമ്പത്തൂർ എക്സ്പ്രസ്: രാവിലെ ആറിന് കണ്ണൂരിൽനിന്ന് പുറപ്പെട്ട് 1.45-ന് കോയമ്പത്തൂർ ജങ്ഷനിലെത്തും.

കണ്ണൂർ-കോയമ്പത്തൂർ എക്സ്പ്രസ് നീട്ടുകയാണെങ്കിൽ കാസർകോട്ടെത്തുന്ന സമയവും തിരികെ പുറപ്പെടുന്ന സമയവും യാത്രക്കാർക്ക് കൂടുതൽ സൗകര്യപ്രദമാണ്. രാത്രി 7.25-ന് കണ്ണൂരിലെത്തുന്ന വണ്ടി കാസർകോട്ടേക്ക് നീട്ടിയാൽ ഗുണമാകും. അതേപോലെ പുലർച്ചെ തിരിച്ച് ഷൊറണൂർ ഭാഗത്തേക്കും.

തിരുവനന്തപുരം-കാസർകോട് വന്ദേഭാരത് എക്സ്പ്രസിനായി വെള്ളം നിറയ്ക്കാനും ക്ലീനിങ്ങിനുമുള്ള സൗകര്യം കാസർകോട് റെയിൽവേ സ്റ്റേഷനിലെ മൂന്നാം പ്ലാറ്റ്ഫോമിൽ ഒരുക്കിയിട്ടുണ്ട്. ഉച്ചയ്ക്ക് 1.20-ന് കാസർകോട്ടത്തുന്ന വന്ദേഭാരത് എക്സ്പ്രസ് 2.30-ന് മടങ്ങും. ഇതിനുശേഷം ഈ പ്ലാറ്റ്ഫോമിലേക്ക് മറ്റു വണ്ടികളൊന്നും എത്താറില്ല. അതേപോലെ കാസർകോട്ടെ ബേ ലൈനിലും വണ്ടികളുണ്ടാകാറില്ല. അതിനാൽ തീവണ്ടികൾ ഇവിടേക്ക് നീട്ടിയാൽ ഇവിടങ്ങളിൽ തടസ്സങ്ങളൊന്നുമില്ലാതെ നിർത്തിയിടാനാകും.