എമ്പുരാൻ എന്ന ചിത്രത്തിലെ ​പശ്ചാത്തല സം​ഗീതവുമായി ബന്ധപ്പെട്ട് സം​ഗീത സംവിധായകൻ ദീപക് ദേവിനെതിരെ വിമർശിച്ചയാൾക്ക് മറുപടിയുമായി ​ഗോപി സുന്ദർ. ​ഗോപി സുന്ദർ പങ്കുവെച്ച ഒരു പോസ്റ്റിന് വന്ന കമന്റിനാണ് അദ്ദേഹം ചുട്ടമറുപടി നൽകിയത്. ദീപക് ദേവ് അതി​ഗംഭീര സം​ഗീതജ്ഞനാണെന്നും ​ഗോപി സുന്ദർ പറഞ്ഞു.

To advertise here,

എമ്പുരാൻ എന്ന സിനിമ പുറത്തിറങ്ങിയപ്പോൾ ഉയർന്ന വിമർശനങ്ങളിലൊന്ന് പശ്ചാത്തലസം​ഗീതം പ്രതീക്ഷയ്ക്കൊത്ത് ഉയർന്നില്ല എന്നതായിരുന്നു. ചിത്രവുമായി ബന്ധപ്പെട്ട രാഷ്ട്രീയ വിവാദങ്ങൾ ചൂടുപിടിച്ച് നിൽക്കവേ ​ഗോപി സുന്ദറിന്റെ ഫെയ്സ്ബുക്ക് അക്കൗണ്ടിൽ മറ്റൊരു ചർച്ച നടക്കുകയായിരുന്നു. ​താൻ ഈണമിട്ട ചില പ്രശസ്ത സിനിമകളിലെ ശ്രദ്ധേയമായ പശ്ചാത്തലസം​ഗീതത്തിന്റെ യൂട്യൂബ് ലിങ്കുകൾ ​ഗോപിസുന്ദർ തുടർച്ചയായി ഫെയ്സ്ബുക്കിൽ പോസ്റ്റ് ചെയ്തതാണ് അതിന് കാരണം.

ബി​ഗ് ബി, സാ​ഗർ ഏലിയാസ് ജാക്കി, ചാർലി, എബ്രഹാമിന്റെ സന്തതികൾ, പുലിമുരുകൻ എന്നിവയുടെ പശ്ചാത്തലസം​ഗീതമായിരുന്നു ​ഗോപി സുന്ദർ ഷെയർ ചെയ്തത്. ഇതോടെ ദീപക് ദേവ് എമ്പുരാനിൽ ചെയ്തതും ​ഗോപി സുന്ദർ ചെയ്തതുമായ പശ്ചാത്തലസം​ഗീതങ്ങൾ താരതമ്യപ്പെടുത്തി ചർച്ചകളുയർന്നു. ഇതിൽ സാ​ഗർ ഏലിയാസ് ജാക്കിയിലെ ബിജിഎമ്മിന് വന്ന കമന്റുകളിലൊന്ന് "ദേ ഇങ്ങനെ വേണം സാധനം ഇറക്കി വിടാൻ, അല്ലാതെ കുറേ അലറിച്ച മാത്രം പോരാ" എന്നായിരുന്നു. 

ഈ കമന്റിന് ​ഗോപി സുന്ദർ നൽകിയ മറുപടിയാണ് ഇപ്പോൾ ശ്രദ്ധ നേടിയിരിക്കുന്നത്. "സുഹൃത്തേ, എന്റെ സഹോദരൻ ദീപക് അതി​ഗംഭീര സം​ഗീതജ്ഞനാണ്. അദ്ദേഹത്തേപ്പോലൊരു പ്രതിഭയെ ഇങ്ങനെ വിലയിരുത്തരുത്." ​ഗോപി സുന്ദറിന്റെ വാക്കുകൾ ഇങ്ങനെയായിരുന്നു. ​എന്തായാലും ഗോപി സുന്ദറിന്റെ സോഷ്യൽ മീഡിയാ അക്കൗണ്ടിലെ ചർച്ച വീണ്ടും കൊഴുത്തിരിക്കുകയാണ്.