പുറത്തിറങ്ങിയ അന്നേ വൈറലായതാണ് അജ​ഗജാന്തരം എന്ന ചിത്രത്തിലെ ഒള്ളുള്ളേരു എന്ന ​ഗാനം. പരമ്പരാ​ഗതമായ നാടൻപാട്ടിനെ റീമിക്സ് ചെയ്താണ് ചിത്രത്തിൽ അവതരിപ്പിച്ചത്. ഇപ്പോഴിതാ അടുത്തകാലത്തൊന്നും ഒരു മലയാള​ഗാനത്തിനും എത്തിപ്പിടിക്കാനാവാത്ത നേട്ടം സ്വന്തമാക്കിയിരിക്കുകയാണ് 'ഒള്ളുള്ളേരു'. യൂട്യൂബിൽ 100 മില്ല്യൺ കാഴ്ചക്കാരെ സ്വന്തമാക്കിയിരിക്കുകയാണ് അജ​ഗജാന്തരത്തിലെ ഈ ​ഗാനം.

To advertise here,

മാവില ​ഗോത്രവിഭാ​ഗത്തിന്റെ പരമ്പരാ​ഗത നൃത്ത​ഗാനമാണ് 'അജ​ഗജാന്തര'ത്തിനുവേണ്ടി ജസ്റ്റിൻ വർ​ഗീസ് റീമിക്സ് ചെയ്തത്. നാടൻപാട്ട് കലാകാരികൂടിയായ പ്രസീത ചാലക്കുടിയാണ് ​ഗാനം ആലപിച്ചത്. പ്രസീതയുടെ ആലാപനമികവും ​ഗാനത്തിന്റെ താളാത്മകതയും ചേർന്ന് ​ഗാനത്തെ ജനപ്രിയമാക്കി. പുറത്തിറങ്ങി രണ്ട് വർഷമാകാറാവുമ്പോഴും 'ഒള്ളുള്ളേരു'വിന് ആരാധകർ ഏറെയാണ്.

നടൻ കിച്ചു ടെല്ലസിന്റെ തിരക്കഥയിൽ ടിനു പാപ്പച്ചൻ സംവിധാനം ചെയ്ത ചിത്രമാണ് അജ​ഗജാന്തരം. ഉത്സവപ്പറമ്പിലേയ്ക്ക്‌ ഒരു ആനയും പാപ്പാനും ഒപ്പം ഒരുകൂട്ടം യുവാക്കളും എത്തുന്നതും തുടർന്ന് അവിടെ നടക്കുന്ന സംഭവവികാസങ്ങളുമായിരുന്നു ചിത്രത്തിന്റെ പ്രമേയം. വിവാഹ വീട്ടിലെ ആഘോഷത്തിന്റെ ഭാഗമായുള്ള ​ഗാനമെന്ന നിലയിലാണ് ‘ഒള്ളുള്ളേരു’ സിനിമയിൽ അവതരിപ്പിച്ചത്. മറ്റുരണ്ടിടങ്ങളിൽ നടക്കുന്ന ആഘോഷവും ​ഗാനരം​ഗത്തിൽ കാണാം.

ആന്റണി വർഗീസ്, ചെമ്പൻ വിനോദ്, അർജുൻ അശോകൻ, കിച്ചു ടെല്ലസ്, ജാഫർ ഇടുക്കി, രാജേഷ് ശർമ, സുധി കോപ്പ, വിനീത് വിശ്വം, ലുക്മാൻ, ശ്രീരഞ്ജിനി തുടങ്ങിയവരായിരുന്നു അജഗജാന്തരത്തിലെ മറ്റ് അഭിനേതാക്കൾ.