ജോലിയിൽനിന്ന് നേരത്തേ വിരമിക്കുകയെന്ന ലക്ഷ്യത്തോടെ 32-ാം വയസ്സിൽ 1.05 കോടി രൂപയുടെ സമ്പാദ്യം കെട്ടിപ്പടുത്ത് ചെന്നൈ സ്വദേശിനി. പ്രതിമാസ വരുമാനമായ 1.20 ലക്ഷം രൂപയിൽ 86,000 രൂപയും നിക്ഷേപത്തിനായി നീക്കിവെച്ചാണ് ഇവർ ഈ നേട്ടം കൈവരിച്ചത്. അതായത് വരുമാനത്തിന്റെ 72 ശതമാനവും സമ്പാദ്യമായി മാറ്റിവെക്കുന്നു.

To advertise here,

മ്യൂച്വൽ ഫണ്ടുകളിൽ 60,000 രൂപയും ഇ.പി.എഫ്. ഉൾപ്പെടെയുള്ള പദ്ധതികളിൽ 26,000 രൂപയുമാണ് മാസംതോറും നിക്ഷേപിക്കുന്നത്. ബാക്കി 34,000 രൂപ മാത്രമാണ് ജീവിതച്ചെലവുകൾക്കായി ഉപയോഗിക്കുന്നത്. ചെന്നൈ പോലുള്ള വൻനഗരങ്ങളിലെ ഉയർന്ന വാടകയും മറ്റ് ചെലവുകളും കണക്കിലെടുക്കുമ്പോൾ കടുത്ത സാമ്പത്തിക അച്ചടക്കത്തോടെയാണ് ഇവരുടെ ജീവിതം.

പോർട്ട്‌ഫോളിയോ

 

തുക

ഓഹരി

₹38 ലക്ഷം

മ്യൂച്വൽ ഫണ്ട്

₹25 ലക്ഷം

പ്രൊവിഡന്റ് ഫണ്ട്

₹24 ലക്ഷം

സോവറിൻ ഗോൾഡ് ബോണ്ട്‌

(SGB)

₹11.7 ലക്ഷം

ബാങ്ക് സമ്പാദ്യം

₹6 ലക്ഷം

ആകെ നിക്ഷേപം

₹1.05 കോടി

  • മ്യൂച്വൽ ഫണ്ട്, ഓഹരി: 2019-ൽ നിക്ഷേപം ആരംഭിച്ചു. നേരിട്ടുള്ള ഓഹരി നിക്ഷേപത്തിന്റെ മൂല്യം മാത്രം നിലവിൽ 38 ലക്ഷം രൂപയാണ്.
  • സ്വർണം: സുരക്ഷിത നിക്ഷേപമെന്ന നിലയിൽ സോവറിൻ ഗോൾഡ് ബോണ്ടിൽ (SGB) 11.7 ലക്ഷം രൂപ വകയിരുത്തി.

40-42 വയസ്സിനുള്ളിൽ സാമ്പത്തിക സ്വാതന്ത്ര്യം നേടി ജോലിയിൽനിന്ന് വിരമിക്കുകയാണ് ഇവരുടെ ലക്ഷ്യം. സമ്പാദ്യത്തിന്റെ 60 ശതമാനവും ഓഹരി വിപണി കേന്ദ്രീകരിച്ചുള്ളതായതിനാൽ ഉയർന്ന ആദായത്തോടൊപ്പം നഷ്ടസാധ്യതയുമുണ്ട്. 2019 മുതൽ ഓഹരി, സ്വർണ വിപണിയിലുണ്ടായ മുന്നേറ്റവും കോമ്പൗണ്ടിങ്ങിന്റെ മാജിക്കും വേഗത്തിലാക്കി.

അതേസമയം, വരുമാനത്തിന്റെ മുക്കാൽ ഭാഗവും നിക്ഷേപിച്ചാൽ ചെന്നൈയിൽ 34,000 രൂപയ്ക്ക് എങ്ങനെ ജീവിക്കാൻ സാധിക്കുമെന്ന ചോദ്യവും സോഷ്യൽ മീഡിയയിൽ പലരും ഉന്നയിച്ചു. ഭാവിയിലെ പണപ്പെരുപ്പം കണക്കിലെടുക്കുമ്പോൾ വിരമിച്ചതിന് ശേഷമുള്ള ജീവിതത്തിന് ഈ തുക മതിയാകുമോയെന്ന കാര്യത്തിൽ സാമ്പത്തിക വിദഗ്ധർക്കിടയിലും അഭിപ്രായവ്യത്യാസമുണ്ട്.

നിരീക്ഷണങ്ങൾ

പോർട്ട്‌ഫോളിയോയുടെ 60 ശതമാനവും നേരിട്ടുള്ള ഓഹരികളിലും ഓഹരി അധിഷ്ഠിത മ്യൂച്വൽ ഫണ്ടുകളിലുമാണ് നിക്ഷേപിച്ചിട്ടുള്ളത്. സ്വർണം, പി.എഫ്., ബാങ്ക് നിക്ഷേപം എന്നിവയിലാണ് ബാക്കി 40 ശതമാനം. ചെറുപ്പക്കാർക്ക് ഉയർന്ന നഷ്ടസാധ്യതയും ഉയർന്ന ആദായവും നൽകുന്ന രീതി തന്നെയാണ് അനുയോജ്യം. ഗോൾഡ് ബോണ്ട് നിക്ഷേപത്തിൽനിന്നുള്ള അപ്രതീക്ഷിത നേട്ടം പോർട്ട്‌ഫോളിയോ മൂല്യം ഉയർത്താൻ സഹായിച്ചു.

വഴികാട്ടിയത് 'കോമ്പൗണ്ടിങ്'

2019-ലാണ് പ്രത്യേക ലക്ഷ്യത്തോടെ ഇവർ നിക്ഷേപം ആരംഭിക്കുന്നത്. ആറുവർഷംകൊണ്ട് ഒരു കോടി രൂപയെന്ന നാഴികക്കല്ല് പിന്നിടാൻ 'കോമ്പൗണ്ടിങ്ങിന്റെ' (കൂട്ടുപലിശയുടെ നേട്ടം) മാജിക് തന്നെയാണ് സഹായിച്ചത്. 2019-2024 കാലയളവിൽ ഓഹരി, സ്വർണ വിപണികളിലുണ്ടായ കുതിച്ചുചാട്ടവും സ്ഥിരതയുള്ള നിക്ഷേപ ശൈലിയും നേട്ടം വേഗത്തിലാക്കി.

വിമർശനങ്ങളും ആശങ്കകളും

യുവതിയുടെ നിക്ഷേപ കണക്കുകൾ സോഷ്യൽ മീഡിയയിൽ വലിയ സംവാദങ്ങൾക്കാണ് വഴിതുറന്നത്. വരുമാനത്തിന്റെ മുക്കാൽ ഭാഗവും നിക്ഷേപത്തിനായി മാറ്റി വെച്ചാൽ ചെന്നൈ പോലുള്ള വൻനഗരത്തിൽ എങ്ങനെ ജീവിക്കാനാകുമെന്നാണ് ഭൂരിഭാഗം പേരും ചോദിക്കുന്നത്. വാടക, യാത്ര, ചികിത്സ, മറ്റ് അപ്രതീക്ഷിത ചെലവുകൾ എന്നിവയ്ക്ക് 34,000 രൂപ തികയില്ലെന്ന് വിമർശകർ ചൂണ്ടിക്കാട്ടുന്നു.

32-ാം വയസ്സിൽ 1.05 കോടി രൂപയുടെ സമ്പാദ്യമുണ്ടാക്കിയത് നേട്ടമാണെങ്കിലും, ഭാവിയിലെ പണപ്പെരുപ്പം കണക്കിലെടുക്കുമ്പോൾ 40-ാം വയസ്സിലെ വിരമിക്കലിന് ഈ തുക പര്യാപ്തമാകുമോ എന്ന് സംശയിക്കുന്നവരുമുണ്ട്. മാത്രവുമല്ല, സമ്പാദ്യം മാത്രം ലക്ഷ്യമിട്ട് നിലവിലെ സന്തോഷങ്ങൾ മാറ്റിവെക്കേണ്ടതുണ്ടോ എന്ന ചോദ്യവും പലരും ഉന്നയിക്കുന്നു.