കളമൊരുങ്ങുന്നത്‌ ഡീൻ-ജോയ്സ് ഹാട്രിക് പോരാട്ടം; ഇക്കുറിയും ചാഞ്ചാടുമോ ഇടുക്കിയുടെ മനം?

PT Thomas

 ഗാഡ്ഗിൽ കമ്മിറ്റി റിപ്പോർട്ട് വലിയ വിവാദങ്ങൾക്ക് വഴിവെച്ചിരുന്നു. ഒരുവർഷത്തോളം നീണ്ടുനിന്ന പഠനങ്ങൾക്ക് ശേഷം 2011 സെപ്റ്റംബറിൽ ആണ് ഗാഡ്ഗിൽ കമ്മിറ്റി റിപ്പോർട്ട് സമർപ്പിക്കപ്പെട്ടത്. പശ്ചിമഘട്ടം ഉൾപെടുന്ന ആറ് സംസ്ഥാനങ്ങളിൽ 14 അംഗ വിദഗ്ധ സംഘം തെളിവെടുപ്പ് നടത്തി. പരിസ്ഥിതിസംഘടനകളും ശാസ്ത്രസാങ്കേതിക കൂട്ടായ്മകളും വിവിധ മേഖലകളിലെ വിദഗ്ധരുമായും ചർച്ച നടത്തിയാണ് ഗാഡ്ഗിലും സംഘവും റിപ്പോർട്ട് തയ്യാറാക്കിയത്. ഓരോ പ്രദേശത്തെയും ജൈവസവിശേഷതകൾ, ഉയരം, ചരിവ്, പ്രകൃതിക്ഷോഭ സാധ്യത, മുതലായവ കണക്കിലെടുത്ത് എന്തൊക്കെ പ്രവൃത്തികൾ ചെയ്യാം, എന്തൊക്കെ ഒഴിവാക്കാം എന്ന റിപ്പോർട്ടിലെ നിർദേശങ്ങൾ ഇടുക്കി ജില്ലയിൽ വ്യാപക പ്രചരണങ്ങൾക്കും പ്രതിഷേധങ്ങൾക്ക് വഴി തുറന്നു. പശ്ചിമഘട്ട പ്രദേശത്ത് ഭൂവിനിയോ​ഗത്തിൽ നിയന്ത്രണം കൊണ്ടുവരികയായിരുന്നു കമ്മിറ്റിയുടെ ആശയം.

പ്രദേശവാസികളുടെ പൂർണ പങ്കാളിത്തത്തോടെ സുസ്ഥിരവികസനമാണ് കമ്മിറ്റി വിഭാവനം ചെയ്തത്. ഇത് സാമൂഹിക സാമ്പത്തിക ഭാവിക്ക് തുരങ്കംവയ്ക്കുമെന്നായിരുന്നു പ്രതിഷേധക്കാരുടെ വാദം. റിപ്പോർട്ടിനെ അനുകൂലിക്കുകയും ചർച്ച ചെയ്യപ്പെടണമെന്ന് നിലപാടെടുത്തതുമാണ്  പി.ടി. തോമസിനെതിരെ പ്രതിഷേധം ഉയരാൻ കാരണം. കത്തോലിക്കാ സഭ പൂർണമായും പി.ടി. തോമസിനെതിരായി. ശവഘോഷയാത്ര നടത്തി പ്രതീകാത്മകമായി പി.ടി. തോമസിനെ സംസ്കരിക്കുന്നതുൾപ്പെടെ ജില്ല കണ്ട ഏറ്റവും വലിയ പ്രക്ഷോഭങ്ങൾക്കായിരുന്നു നാട് സാക്ഷ്യം വഹിച്ചത്. അതോടെ 2014-ലെ ലോക്​സഭ തിരഞ്ഞെടുപ്പിൽ സിറ്റിങ് എം.പിമാരിൽ അന്ന് പി.ടി. തോമസ് ഒഴികെ എല്ലാവർക്കും കോൺഗ്രസ് സീറ്റ് നൽകിയപ്പോൾ നിലപാടിൽ വെള്ളംചേർക്കാത്ത പി.ടിക്ക് മാത്രം സീറ്റ് നിഷേധിച്ചു.

ഹൈറേഞ്ച് സംരക്ഷണ സമിതിയും ജോയ്​സ് ജോർജിന്റെ സ്ഥാനാർഥി പ്രഖ്യാപനവും

ഇടുക്കിയിലെ മലയോര മേഖലയിലെ ഭൂപ്രശ്നങ്ങൾ പരിഹരിക്കാൻ സമരസംഘടനയായി 2007 മുതൽ പ്രവർത്തനം ആരംഭിച്ച കർഷക പ്രസ്ഥാനമായിരുന്നു ഹൈറേഞ്ച് സംരക്ഷണസമിതി.  കാഞ്ഞിരപ്പള്ളി, ഇടുക്കി രൂപത മെത്രാൻമാരും യാക്കോബായ, മാർത്തോമാ, സി.എസ്.ഐ. ക്രിസ്ത്യൻ സഭകളും എസ്.എൻ.ഡി.പി., എൻ.എസ്.എസ്. സംഘടനകളും മുസ്ലീം മത പണ്ഡിതരും ഇമാമുമാരും സാമൂഹൃ രാഷ്ട്രീയ പ്രവർത്തകരും നേതാക്കളും ചേർന്നാണ് സമിതിയുടെ പ്രവർത്തനങ്ങൾക്ക് നേതൃത്വം നൽകിയത്. ജനറൽ കൺവീനറായി സെബാസ്റ്റ്യൻ കൊച്ചുപുരക്കലിനെ തിരഞ്ഞെടുത്തു. കേന്ദ്ര- സ്ഥംസ്ഥാന സർക്കാരുകളുടെ അനുമതിയോടെ ഉപാധികളോടെ ലഭിച്ച പട്ടയം കൈമാറ്റം ചെയ്യാനോ കരം പിടിക്കാനോ സാധിക്കാതെയിരുന്ന സാഹചര്യത്തിൽ സമിതി പൊതുസമൂഹത്തിൽനിന്ന് പണം പിരിച്ച് അഡ്വ. ജോയ്​സ് ജോർജിനെ ലീഗൽ അഡ്വൈസറായി നിയമിച്ച് സുപ്രീം കോടതിയിൽ കേസ് നടത്തുകയും ഭൂമി കൈമാറ്റം ചെയ്യാൻ അനുവാദം വാങ്ങിയെടുക്കുകയും ചെയ്തിരുന്നു. 

മാധവ് ​ഗാഡ്ഗിൽ റിപ്പോർട്ടിൽ സ്വീകരിച്ച നിലപാടാണ് സമിതിയെ പൊതുശ്രദ്ധയിലേക്ക് കൊണ്ടുവരുന്നത്. റിപ്പോർട്ടിലെ വിശദാംശങ്ങൾ പൊതുസമൂഹത്തിൽ ചർച്ചയാക്കി പ്രതിരോധം തീർത്തത് ഹൈറേഞ്ച് സംരക്ഷണ സമിതിയായിരുന്നു. സമിതി ആരംഭിച്ച കാലംമുതൽ നിയമ ഉപദേഷ്ടാവായും നയ രൂപീകരണത്തിൽ സുപ്രധാന പങ്കുവഹിച്ചും നേതൃത്വം നൽകിയിരുന്ന ആളാണ് അഡ്വ. ജോയ്​സ് ജോർജ്. ജീല്ലയിൽ രണ്ടു ദിവസം ഹർത്താൽ പ്രഖ്യാപിച്ച് സമിതിയുടെ നേതൃത്വത്തിൽ തെരുവുസമരം നടത്തി. ഇടുക്കി രൂപത മെത്രാനായിരുന്ന മാത്യു ആനിക്കുഴികാട്ടിലായിരുന്നു സമിതിയെ ഏറ്റവും അധികം പിന്തുണച്ചത്.  2014-ലെ ലോക്​സഭാ തിരഞ്ഞെടുപ്പിലും ഇത് പ്രതിഫലിച്ചു. സമിതിയുടെ നേതൃത്വത്തിൽ ലീഗൽ അഡ്വൈസർ അഡ്വ.ജോയ്​സ് ജോർജിനെ സ്ഥാനാർഥിയായി പ്രഖ്യാപിക്കുകയായിരുന്നു. ഇടതുപക്ഷം പിന്തുണയും  നൽകി.  പി.ടിയുടെ ശിഷ്യനും അന്നത്തെ യൂത്ത് കോൺഗ്രസ് സംസ്ഥാന പ്രസിഡന്റുമായിരുന്ന അഡ്വ. ഡീൻ കുര്യാക്കോസായിരുന്നു യു.ഡി.എഫ്. സ്ഥാനാർഥി.  

Joice George

കസ്തൂരിരം​ഗൻ - ​ഗാഡ്​ഗിൽ റിപ്പോർട്ടുകളിൽ കോൺ​ഗ്രസിനും പി.ടിക്കുമെതിരെ ശക്തമായ പ്രതിരോധം തീർത്തത് ഇടുക്കി രൂപതയായിരുന്നു. ഇടുക്കി രൂപത മെത്രാനായിരുന്ന മാത്യു ആനിക്കുഴികാട്ടിലിന്റെ പ്രത്യക്ഷ എതിർപ്പ് വലിയ രീതിയിൽ കോൺ​ഗ്രസിന് വെല്ലുവിളിയുയർത്തി. വോട്ട് ചോദിക്കുന്നതിനായി അരമനയിലെത്തിയ ഡീൻ കുര്യാക്കോസിന് നേരെ കോൺ​ഗ്രസുകാരെ വിശ്വസിക്കാൻ കൊള്ളില്ലെന്ന് പറഞ്ഞ് ബിഷപ്പ് എതിർത്തുനിന്നതോടെ തിരഞ്ഞെടുപ്പ് കോൺ​ഗ്രസിന് ​ബാലികേറാമലയായി മാറി. സമരത്തീയിൽ ജ്വലിച്ചു നിന്ന ജില്ലയിൽനിന്നു അഡ്വ.ജോയ്​സ് ജോർജ് വിജയിച്ചു. 70.75% പോളിങ് രേഖപ്പെടുത്തിയ തിരഞ്ഞെടുപ്പിൽ 50542 വോട്ടുകൾക്കായിരുന്നു ജയം.

ഡീൻ - ജോയ്​സ് രണ്ടാം അങ്കം

തുടരെയുള്ള സർക്കാരിൻറെ വാഗ്ദാന ലംഘനങ്ങളും നീതി നിഷേധങ്ങളും ചൂണ്ടിക്കാട്ടിയാണ് പാർലമെൻറ് തിരഞ്ഞെടുപ്പിൽ ഇടതുപക്ഷത്തിന്റെ പിന്തുണയോടെ ജോയ്​സ് ജോർജ് സ്ഥാനാർഥിയായി മത്സരിച്ച് വിജയിച്ചത്. എന്നാൽ, ജില്ലാ നേരിട്ട ഭൂപ്രശ്നങ്ങളിൽ വേണ്ടവിധം ഇടപ്പെടാനോ പരി​ഹാരം കണ്ടെത്താനും കഴിഞ്ഞില്ലെന്ന വിലയിരുത്തലാണ് പൊതുവേയുണ്ടായത്. 

2019-ലെ ലോക്​സഭാ തിരഞ്ഞെടുപ്പിലും ഇടുക്കിയിൽ പോരാട്ടം ഡീൻ കുര്യാക്കോസും ജോയ്​സ്  ജോർജും തമ്മിലായിരുന്നു. സ്വതന്ത്ര സ്ഥാനാർഥിയിൽനിന്നു എൽ.ഡി.എഫ്. സ്വതന്ത്രനായിട്ടായിരുന്നു ജോയ്​സ് തിരഞ്ഞെടുപ്പ് കളത്തിലിറങ്ങിയത്. എന്നാൽ, രണ്ടാം തവണ ജോയ്​സ് മണ്ഡലത്തിൽ വ്യക്തമായ ആധിപത്യം സ്ഥാപിക്കാൻ കഴിയാത്ത സാഹചര്യമായിരുന്നു ഉണ്ടായിരുന്നത്. മാർ മാത്യു ആനിക്കുഴിക്കാട്ടിൽ വിരമിച്ചതോടെ ക്രൈസ്തവ സമൂഹത്തിന്റെയും സംഘടനകളുടെയും പിന്തുണയിലും മാറ്റം വന്നു. സമിതി കൺവീനർ സെബാസ്റ്റ്യൻ കൊച്ചുപുരക്കലിനെ മറ്റു ചുമതലകൾ നൽകി സ്ഥലം മാറ്റിയതും സമിതിയുടെ പ്രവർത്തനങ്ങളെ ബാധിച്ചു. സമിതി അപ്രസക്തമാകുന്ന സാഹചര്യങ്ങളാണ് പിന്നീട് ഉണ്ടായത്. 2019-ലെ തിരഞ്ഞെടുപ്പിൽ മണ്ഡലത്തിൽ ജോയ്​സിന് പരാജയം ഏറ്റുവാങ്ങേണ്ടി വന്നു. കൊട്ടക്കാമ്പൂർ ഭൂമി വിഷയവും ജോയ്സ് ജോർജിനെതിരായി. 1,71,053 വോട്ടുകളുടെ ചരിത്ര ഭൂരിപക്ഷത്തിലായിരുന്നു ഡീൻ കുര്യാക്കോസിന്റെ വിജയം. 19 സീറ്റുമായി യു.ഡി.എഫ്. നേട്ടം കൊയ്ത തിരഞ്ഞെടുപ്പിൽ രാഹുൽ ഗാന്ധിക്ക് വയനാട്ടിൽ ലഭിച്ച ഭൂരിപക്ഷം കഴിഞ്ഞാൽ കഴിഞ്ഞ തവണ കേരളത്തില്‍ ഏറ്റവും ഉയർന്ന ഭൂരിപക്ഷം നേടിയ കോണ്‍ഗ്രസ് എം.പി. എം.പി. ഡീനായിരുന്നു.

മൂന്നാം അങ്കത്തിന് കച്ച മുറുക്കുമ്പോൾ 

പോരാട്ടം ഹാട്രിക്കിലേക്കെത്തുമ്പോൾ  ഭൂപ്രശ്നങ്ങളും മനുഷ്യ വന്യജീവി സംഘർഷങ്ങളും കാർഷിക മേഖലയിലെ വില തകർച്ചയുമാണ് മണ്ഡലത്തിലെ പ്രധാന വിഷയങ്ങൾ. കാട്ടാന ആക്രമണത്തിൽ മൂന്നാറിൽ യുവാവ് കൊല്ലപ്പെട്ടത് 27-നാണ്. 28-ന് യു.ഡി.എഫും എൽ.ഡി.എഫും മൂന്നാറിൽ ഹർത്താൽ പ്രഖ്യാപിക്കുന്നു. ഡീൻ കുര്യാക്കോസ് നിരാഹാര സമരത്തിലേക്ക് നീങ്ങുന്നു. ബി.ജെ.പി. ​ധർണ നടത്തുന്നു. വിഷയത്തിൽ  പരസ്പരം പഴിചാരുന്നതല്ലാതെ ശാശ്വത പരിഹാരം കാണുന്നതിന് യാതൊരുവിധ നടപടികളും ഉണ്ടാകുന്നില്ലെന്നതാണ് യാഥാർഥ്യം. കടുവയുടെയും മറ്റു വന്യമ‍ൃ​ഗങ്ങളുടെയും അക്രമണത്തിൽ കുറവൊന്നുമുണ്ടായിട്ടില്ല. നിരവധി വളർത്തുമൃ​ഗങ്ങൾ കൊല്ലപ്പെടുകയും കൃഷിയിടങ്ങൾ നശിക്കുകയും ചെയ്തു. വിവിധ മേഖലകളിൽ വനംവകുപ്പ് അധികൃതർക്കെതിരെയുള്ള ജനരോക്ഷം ശക്തമാകുകയാണ്. 

അരിക്കൊമ്പനെ ഇടുക്കി, ചിന്നക്കനാലിൽനിന്ന് ലോറിയിൽ കയറ്റി കൊണ്ടുപോകുന്നു.

കാർഷിക മേഖലയിലെ വിലത്തകർച്ചയാണ് ജില്ലയിലെ മറ്റൊരു പ്രതിസന്ധി. വളം, കീടനാശിനി, തൊഴിലാളികളുടെ വേതനം എല്ലാം ഉയരുമ്പോഴും ഉത്പന്നങ്ങളുടെ വില ഇടിയുന്നത് കർഷകരെ തളർത്തുകയാണ്. ചിലവ് കൂടുകയും വരവ് ഇടിയുകയും ചെയ്യുന്നത് കർഷകർക്ക് മുന്നിൽ ചോദ്യചിഹ്നമാകുകയാണ്. മുന്നോട്ട് കാർഷിക മേഖല ഉപജീവനമാർ​ഗമായി കൊണ്ടുപോകാൻകഴിയില്ലെന്ന തിരിച്ചറിവിൽ ക‍ൃഷി പാടെ ഉപേക്ഷിച്ചു പേകേണ്ട ​ഗതികേടിലാണ് മിക്ക കർഷകരും. ഏലം, കാപ്പി, കുരുമുളക് കർഷകരും ഒപ്പം പച്ചക്കറി കർഷകരും ഒരേ വെല്ലുവിളിയാണ് നേരിടുന്നത്. റബറിന്റെ താങ്ങുവിലയിൽ 10 രൂപ കൂട്ടിയെങ്കിലും കർഷകരുടെ പ്രതിസന്ധി പരിഹരിക്കാൻ ഇതുകൊണ്ട് മാത്രം കഴിയില്ല. ഇടുക്കിയിൽ പട്ടയമേളയിലൂടെ കൂടുതൽ പേർക്ക് ഭൂമിയുടെ അവകാശം നൽകിയത് ഗുണം ചെയ്യുമെന്ന കണക്കുകൂട്ടലിലാണ് സി.പി.എമ്മെങ്കിലും മനുഷ്യ വന്യജീവി സംഘർഷം, ഭൂപ്രശ്നങ്ങൾ, കാർഷിക മേഖലയിലെ പ്രശ്നങ്ങൾ ലോക്​സഭാ തിരഞ്ഞെടുപ്പിലും പ്രതിഫലിച്ചേക്കും.

ആരോ​ഗ്യമേഖലയിലെ പ്രശ്നങ്ങളും തിരഞ്ഞെടുപ്പിൽ അലയടിക്കും. സർക്കാർ ആശുപത്രികളുടെ മുഖച്ഛായ മാറിയതായി അവകാശപ്പെടുമ്പോഴും ഡോക്ടർമാരുടെ കുറവും മരുന്ന് ക്ഷാമവും സ്ഥിരം പ്രശ്നങ്ങളാണ്. ഇടുക്കി മെഡിക്കൽ കോളേജിൽ മതിയായ സൗകര്യങ്ങൾ ഇല്ലെന്നാരോപിച്ച് വിദ്യാർഥികൾ പ്രതിഷേധിച്ചതും കഴിഞ്ഞ ദിവസങ്ങളിലാണ്. നഴ്സിങ് കോളേജ് ആരംഭിക്കുന്നതിന് അനുമതി ലഭിച്ചെങ്കിലും മതിയായ സൗകര്യങ്ങളൊരുക്കി കുറ്റമറ്റ രീതിയിൽ പ്രവർത്തനം ആരംഭിക്കാൻ കഴിയുമോ എന്നതും ഒരു ചോദ്യമാണ്.

idukki medical college

ക്ഷേമ പെൻഷൻ കുടിശ്ശികയുമായി ബന്ധപ്പെട്ട് സംസ്ഥാനത്ത്  പ്രതിഷേധം ഇരമ്പിയപ്പോൾ അതിന് ആക്കം കൂട്ടിയത് ഇടുക്കി അടിമാലിയിലെ മറിയക്കുട്ടിയുടെ സമരമാർ​ഗമായിരുന്നു. ക്ഷേമ പെൻഷൻ മുടങ്ങിയതിൽ പ്രതിഷേധിച്ച് അടിമാലി ടൗണിൽ പിച്ചച്ചട്ടിയെടുത്ത് ഭിക്ഷ യാചിച്ചതോടെയാണ് അവർ ശ്രദ്ധാകേന്ദ്രമാകുന്നത്. മറിയക്കുട്ടിയുടെ കമ്യൂണിസ്റ്റ് വിരുദ്ധ നിലപാടും മറിയക്കുട്ടിയ്ക്കെതിരായ  വ്യാജ ആരോപണങ്ങളും ചർച്ച വിഷയമായിരുന്നു.

ജില്ലയിൽ വികസനത്തിന്റെ മുഖ്യ ചർച്ച വിഷയം മികച്ച റോഡുകൾ തന്നെയാണ്. കേന്ദ്രവും കേരളവും ഇതിന് അവകാശവാദമുന്നയിക്കാറുമുണ്ട്. ദേശീയപാതാ നവീകരണത്തിന് ഇരുകൂട്ടരുടെയും ഇടപ്പെടൽ ഉണ്ടെന്നിരിക്കെ തിരഞ്ഞെടുപ്പ് ആയുധമായി റോഡുകളുടെ വികസനവും ഉൾപ്പെടും. 

കേരള കോൺ​ഗ്രസ് മാണി വിഭാ​ഗം ഇടത്തോട്ട് ചാഞ്ഞ ശേഷമുള്ള തിരഞ്ഞെടുപ്പ് മന്ത്രി റോഷിയുടെ മണ്ഡലത്തിലെ പിന്തുണയും അനുകൂല ഘടകമായി എല്‍.ഡി.എഫ്. കരുതുന്നു. ഈഴവർ കൂടുതലുള്ള മണ്ഡലമെന്ന നിലയിൽ ബി.ഡി.ജെ.എസും ഒരു ശക്തിയാണ്. എൻ.ഡി.എ. സ്ഥാനാർഥിയായി ബി.ഡി.ജെ.എസ്. പ്രതിനിധി തന്നെയാകും ഉണ്ടാവുക. കേരള കോണ്‍ഗ്രസ് എമ്മിന് ഇത് അഭിമാനപോരാട്ടമാണ്. പി.ജെ. ജോസഫിനാകട്ടെ ജോസ് പക്ഷം മുന്നണി മാറിയത് ഇടുക്കിയില്‍ ഏശിയിട്ടില്ല എന്ന് തെളിയിക്കേണ്ട ബാധ്യതയും

ഭൂരിപക്ഷം കുറഞ്ഞേക്കാം എന്നാലും ജയമുറപ്പെന്ന് യു.ഡി.എഫ്. അവകാശപ്പെടുമ്പോള്‍ ഇത്തവണ കാര്യങ്ങള്‍ അനുകൂലമാണെന്നും മണ്ഡലം തിരിച്ചുപിടിക്കുമെന്നും ഇടത് ക്യാമ്പ് ആത്മവിശ്വാസം പ്രകടിപ്പിക്കുന്നു. ഇടുക്കിയില്‍ കരുത്ത് തെളിയിക്കാനും നിര്‍ണായകവോട്ട് വിഹിതവുമായി സ്വാധീനം വര്‍ധിപ്പിക്കാന്‍ എന്‍.ഡി.എ. ക്യാമ്പും സജീവമാണ്‌.