ഇലോൺ മസ്കിന്റെ ഉടമസ്ഥതയിലുള്ള ടെസ്‌ലയുടെ സൈബർട്രക്കിന് ഇന്ത്യയിൽ വലിയ ഫാൻസ് ഉണ്ടെങ്കിലും കമ്പനി ഔദ്യോഗികമായി ഈ വാഹനം രാജ്യത്ത് അവതരിപ്പിച്ചിട്ടില്ല. എന്നാൽ വിദേശത്തുനിന്ന് ഇറക്കുമതി ചെയ്ത ചില സൈബർട്രക്കുകൾ മുംബൈ നിരത്തുകളിൽ ഉൾപ്പെടെ മുൻപ് കണ്ടിരുന്നു. ഇപ്പോഴിതാ ഈ വാഹനവുമായി പ്രത്യക്ഷപ്പെട്ടിരിക്കുന്നത് സാക്ഷാൽ സഞ്ജയ് ദത്ത് ആണ്. അടുത്തിടെ മുംബൈയിൽ അദ്ദേഹം ടെസ്‌ല സൈബർട്രക്കിൽ വന്നിറങ്ങുന്ന ദൃശ്യങ്ങളാണ് പുറത്തുവന്നിരിക്കുന്നത്.

To advertise here,

 

താരം സഞ്ചരിച്ച ഈ വാഹനം ഇറക്കുമതി ചെയ്തതാണെന്നാണ് കരുതുന്നത്. സോഷ്യൽ മീഡിയയിൽ പങ്കുവെച്ച ദൃശ്യങ്ങളിൽ, ഇത് ദുബായ് വാഹനമാണെന്നാണ് സൂചന. കാർനെറ്റ് പെർമിറ്റ് വഴിയാണ് ഈ ഇലക്ട്രിക് വാഹനം രാജ്യത്തേക്ക് കൊണ്ടുവന്നിരിക്കാൻ സാധ്യത. ഇത് ആളുകൾക്ക് മറ്റ് രാജ്യങ്ങളിൽ നിന്നുള്ള വാഹനങ്ങൾ ഇന്ത്യയിൽ ആറ് മാസത്തേക്ക് നികുതി നൽകാതെ ഓടിക്കാൻ അനുമതി നൽകുന്നു.

വാഹനപ്രേമിയായ സഞ്ജയ് ദത്തിന് വലിയ എസ്‌യുവികളോട് പ്രത്യേക ഇഷ്ടമുണ്ട്. റേഞ്ച് റോവർ ഓട്ടോബയോഗ്രഫി, മെഴ്‌സിഡീസ്-മെയ്‌ബാക്ക് ജിഎൽഎസ് 600, ലാൻഡ് റോവർ ഡിഫൻഡർ, പഴയ തലമുറ റേഞ്ച് റോവർ തുടങ്ങിയ നിരവധി ലക്ഷ്വറി എസ്‌യുവികളും നടൻ്റെ കൈവശമുണ്ട്.

ലോങ് റേഞ്ച്, ഓൾ-വീൽ ഡ്രൈവ്, സൈബർബീസ്റ്റ് എന്നിങ്ങനെ മൂന്ന് വേരിയൻ്റുകളിൽ ടെസ്‌ല സൈബർട്രക്ക് ലഭ്യമാണ്. ഇവയിൽ, സൈബർബീസ്റ്റാണ് ഏറ്റവും ഉയർന്ന വേരിയന്റ്. ഇതിന് ഒറ്റ ചാർജിൽ ഏകദേശം 514 കിലോമീറ്റർ ഓടാൻ കഴിയും. 0-96 കിലോമീറ്റർ വരെ വേഗത കൈവരിക്കാൻ വേണ്ടത് 2.6 സെക്കൻ്റ് മാത്രമാണ്. 209 കിലോമീറ്റർ ആണ് പരമാവധി വേഗത. അതേസമയം, ലോങ് റേഞ്ച് വേരിയൻ്റിന് ഒറ്റ ചാർജിൽ 582 കിലോമീറ്റർ വരെയാണ് റേഞ്ച്.