ഉറക്കത്തിൽ ജോർജ് ജേക്കബ് സാറിന്റെ ശബ്ദം, 'എനിക്ക് ഗംഗാധരനെ കാണണം, വരില്ലേ !' അന്ന് ഉറങ്ങാനായില്ല
മൃതദേഹത്തില് റീത്ത് അര്പ്പിക്കാനോ അവസാനമായി കാണാനോ ഞാന് കഴിയുന്നതും പോകാറില്ല. ആ കാഴ്ച മനസ്സില് ആഴത്തില് പതിയും. അദ്ദേഹം ജീവിച്ചിരുന്ന സമയത്തെ ചിത്രങ്ങളെല്ലാം മനസ്സില് നിന്ന് മായും. എനിക്കാവശ്യം അദ്ദേഹം ജീവിച്ചിരുന്ന സമയത്തെ ചിത്രങ്ങളും അനുഭവങ്ങളുമാണ്. അദ്ദേഹം എന്നും എന്റെ മനസ്സില് ജീവിക്കണം ഒരിക്കലും മരിക്കാത്ത ഓര്മകളായി. 'ഒരു അര്ത്ഥത്തില് പറഞ്ഞാല് അത് നിന്റെ ഒരു സ്വാര്ത്ഥതയല്ലേ'. എന്റെ ഒരു ഉറ്റ സുഹൃത്ത് ഒരിക്കല് ചോദിച്ചു. ഞാന് ആണെന്നോ അല്ലെന്നോ പറഞ്ഞില്ല.
കോട്ടയം മെഡിക്കല് കോളേജിലെ കാര്ഡിയോളജി പ്രൊഫസര് ഡോക്ടര് ജോര്ജ് ജേക്കബ് അന്തരിച്ചു. രാവിലെ പത്രത്തിലെ വാര്ത്ത വായിച്ചു കൊണ്ടിരിക്കുന്നതിനിടയില്ത്തന്നെ എന്റെ സഹപാഠിയും സുഹൃത്തുമായ ജോര്ജിന്റെ ഫോണ് കോള് വന്നു. 'ഞാന് കോട്ടയത്ത് സാറിന്റെ വീട്ടിലേക്ക് പോകുന്നു. നീ വരുന്നില്ലല്ലോ, അല്ലേ?' 'ഇല്ല'. എന്റെ ഉത്തരം യാന്ത്രികമായിരുന്നു. ബുധനാഴ്ച വൈകീട്ട് 6 മണിക്ക് ശേഷം വീട്ടില്... വ്യാഴാഴ്ച ഉച്ചയ്ക്ക് മൂന്ന് മണിക്ക് പാമ്പാടിയിലെ പള്ളിയില്... പത്രവാര്ത്ത പൂര്ണമായി വായിക്കാന് മനസ്സ് അനുവദിക്കുന്നില്ലായിരുന്നു.
Content Highlights: oncologist dr vp gangadharan column remembering Dr. George Jacob, a beloved cardiologist