കല്പറ്റ : തന്റെ ജീവിതവുമായി തിരശ്ശീലയിലും തിളങ്ങിയിട്ടുണ്ട് ചെറുവയൽ രാമൻ.

To advertise here,

കർണാടകയിൽനിന്നുള്ള ഡോക്യുമെന്ററി ചലച്ചിത്ര സംവിധായകയായ സുനന്ദാഭട്ട് 2012-ൽ പുറത്തിറക്കിയ ‘നിങ്ങൾ അരണയെ കണ്ടോ’ എന്ന ഡോക്യുമെന്ററിയിലെ ഒരുഭാഗം ചെറുവയൽ രാമനെ കുറിച്ചായിരുന്നു. പരിസ്ഥിതിവ്യതിയാനങ്ങളെയും പരമ്പരാഗത അറിവുകളെയും ആദിവാസി പുരാവൃത്തങ്ങളെയും കോർത്തിണക്കിയുള്ള ഡോക്യുമെന്ററിയിൽ രാമന്റെ കൃഷിജീവിതവും ഉൾപ്പെട്ടു. ചെറുവയൽ രാമൻ ആദ്യമായി തിരശ്ശീലയിൽ എത്തുന്നതും ഈ ഡോക്യുമെന്ററിയിലൂടെയാണ്. ദേശീയ ചലച്ചിത്ര പുരസ്കാരജേതാവായ വയനാട് സ്വദേശി അനീസ് കെ. മാപ്പിള ആദ്യമായൊരുക്കിയ ‘വിതപ്പാട്’ എന്ന ഡോക്യുമെന്ററിയിലും ചെറുവയൽ രാമൻ കേന്ദ്രകഥാപാത്രമായി. കൃഷിയും ആചാരവും ചേർത്തൊരുക്കിയ വിതപ്പാട് വിവിധ പുരസ്കാരങ്ങൾ സ്വന്തമാക്കി. വിവിധ ചലച്ചിത്രമേളകളിലും ശ്രദ്ധിക്കപ്പെടുകയും ചെയ്തു.

2021-ൽ ചാനൽ ന്യൂസ് ഏഷ്യ (സി.എൻ.എ.) പുറത്തിറക്കിയ ‘റൈസ് ടു ഫീഡ് ദ വേൾഡ്’ എന്ന ഡോക്യുമെന്ററിയിലൂടെ അദ്ദേഹം ആഗോളശ്രദ്ധ നേടി.

പ്രിയ തൂവശ്ശേരിയാണ് സംവിധായക. നെൽക്കൃഷിയെക്കുറിച്ചുള്ള അറിവുപകരാൻ അതിർവരമ്പുകൾ നിശ്ചിയിക്കാത്ത വ്യക്തിയായിരുന്നു ചെറുവയൽ രാമനെന്ന് അനീസ് കെ. മാപ്പിള പറഞ്ഞു. വിത്തിന്റെ കൈമാറ്റം എന്നാൽ ഭക്ഷ്യസുരക്ഷയുടെ കൈമാറ്റമെന്ന് അദ്ദേഹം തിരശ്ശീലയിലും പറഞ്ഞുവെച്ചാണ് മടങ്ങുന്നത്.