പ്രണയത്തിന് കയ്യില്
മരണമുണ്ടെങ്കില്
മരണത്തിന് കയ്യില്
പ്രണയവുമുണ്ടാം.
അതു കൊണ്ടാകാം നാം
അടുത്തതിന്നലെ:
മഴകള് രണ്ടിനു-
മിടയില് പൊന്വെയി-
ലുദിച്ച പോല്, ഒരു
ജഡത്തിനുള്ളിലെ
ത്തുടിപ്പു പോല്, വൈകി-
പ്പകലിലെത്തിയ
കിനാവിന് തുണ്ടുപോല്,
മരിച്ച ഭാഷത-
ന്നിരുട്ടില് ബാക്കിയായ്
തിളങ്ങും വാക്കു പോല്.
ഒരമ്പതു വര്ഷം
പിറകോട്ടോടി നാം
വരണ്ടു പോയൊരു
പുഴയില് നീന്തി നാം
മുടിഞ്ഞ കാട്ടിലെ-
മരം കയറി നാം,
ഇടിഞ്ഞ പര്വ്വത-
മുടിയിലേറി നാം
തളിരണിഞ്ഞു നാം
കിളികളായി നാം.
മനുഷ്യരിങ്ങിനെ:
പല കാലങ്ങളില്
കഴിയുവോര് ഒരേ-
സമയം, എത്രയോ
ഉടലണിയുവോര്,
ചിരിക്കും പോല് പൊട്ടി-
ക്കരയുവോര്, മിഴി
നിറയുവോളവും
ചിരിക്കുവോര്, പകല്
ഉറങ്ങുവോര്, രാവില്
ഉണര്ന്നിരിപ്പവര്,
മരണത്തിന് കണ്ണില്
പ്രണയം കാണുവോര്.
മനുഷ്യരിങ്ങിനെ.
Content Highlights: world poetry day 2023, pranayam maranam, satchidanandan, mathrubhumi
Published: 21 Mar 2023, 08:24 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented