മക്ക: ഈ വർഷത്തെ ഹജ്ജിനായി മിനയിലെ ആറ് റസിഡൻഷ്യൽ ടവറുകളിലെ ആഭ്യന്തര തീർഥാടകർക്കുള്ള റിസർവേഷൻ ഇതിനകം പൂർത്തിയായി. റിസർവേഷൻ പൂർത്തിയായകാര്യം നുസുക് ആപ്ലിക്കേഷൻ വഴി ഹജ്ജ്, ഉംറ മന്ത്രാലയം അറിയിച്ചു. 'ടവർ പാക്കേജുകളിൽ റിസർവേഷനായി നിലവിൽ സീറ്റുകളൊന്നും ലഭ്യമല്ല. സാധുവായ റസിഡൻസി പെർമിറ്റുള്ള സൗദികളും പ്രവാസികളും ഉൾപ്പെടെയുള്ള ആഭ്യന്തര തീർഥാടകർക്ക് നിലവിൽ 1-ഉം 2-ഉം പാക്കേജുകൾ മാത്രമേ ലഭ്യമാകൂ.' മന്ത്രാലയം പറഞ്ഞു.

To advertise here,

പാക്കേജുകൾ തിരഞ്ഞെടുത്ത് സീറ്റ് റിസർവേഷൻ പ്രക്രിയ ആരംഭിക്കുന്നത് ഉൾപ്പെടുന്ന ആഭ്യന്തര തീർഥാടക രജിസ്‌ട്രേഷൻ നടപടിക്രമങ്ങളുടെ രണ്ടാം ഘട്ടം മാർച്ച് 4-നാണ് മന്ത്രാലയം ആരംഭിച്ചത്. ആദ്യ ഘട്ടത്തിൽ ഡാറ്റ രജിസ്റ്റർ ചെയ്ത പൗരന്മാർക്കും പ്രവാസികൾക്കും സദ്ദാദ് സംവിധാനം വഴി ഫീസ് അടച്ചുകൊണ്ട് ഇപ്പോൾ നുസുക് ആപ്ലിക്കേഷൻ അല്ലെങ്കിൽ വെബ്സൈറ്റ് വഴി പാക്കേജുകൾ തിരഞ്ഞെടുത്ത് ബുക്ക് ചെയ്യാവുന്നതാണ്. നേരത്തെ ഫെബ്രുവരി 23-ന് (റമദാൻ 6), ആഭ്യന്തര തീർഥാടകർക്കുള്ള പ്രാരംഭ ഡാറ്റ രജിസ്‌ട്രേഷൻ ഘട്ടം മന്ത്രാലയം ആരംഭിച്ചു.

അപേക്ഷകർക്ക് പാക്കേജുകൾ പരിശോധിച്ച് അവയിൽ നിന്ന് ഏറ്റവും അനുയോജ്യമായ പാക്കേജ് തിരഞ്ഞെടുത്ത് ബുക്കിങ് ഇൻവോയ്സ് നൽകാമെന്നും തുടർന്ന് 'സദ്ദാദ്' സംവിധാനം വഴി പണമടയ്ക്കാമെന്നും മന്ത്രാലയം വിശദീകരിച്ചു. ഇരിപ്പിടങ്ങൾ ക്രമീകരിക്കുന്നതിനും അവസരങ്ങളിലേക്ക് തുല്യമായ പ്രവേശനം ഉറപ്പാക്കുന്നതിനും ലക്ഷ്യമിട്ടുള്ള സമഗ്രമായ ഡിജിറ്റൽ പ്രക്രിയയുടെ ഭാഗമാണിത്.

പാക്കേജ് ബുക്ക് ചെയ്തതിന് ശേഷമുള്ള പണമടയ്ക്കൽ സമയപരിധി 72 മണിക്കൂറാണെന്നും ഈ സമയപരിധി മെയ് 14-ന് സമാനമായ ദുൽഖഅദ് 27 വരെ സാധുതയുള്ളതാണെന്നും തുടർന്ന് മെയ് 15 മുതൽ പണമടയ്ക്കാനുള്ള സമയപരിധി 6 മണിക്കൂറായി കുറയ്ക്കുമെന്നും മന്ത്രാലയം വ്യക്തമാക്കി. സാധ്യമായ ഏറ്റവും കൂടുതൽ ഗുണഭോക്താക്കൾക്ക് ബുക്കിംഗ് നടത്താനുള്ള അവസരം ഉറപ്പാക്കാനാണിത്. നിർദ്ദിഷ്ട സമയപരിധിക്കുള്ളിൽ പണമടക്കാൻ പരാജയപ്പെട്ടാൽ ബുക്കിംഗുകൾ സ്വയമേവ റദ്ദാക്കപ്പെടും.