മനാമ: എണ്ണ കേന്ദ്രങ്ങൾക്കും സുപ്രധാന അടിസ്ഥാന സൗകര്യങ്ങൾക്കും നേരെയുണ്ടാകുന്ന ആവർത്തിച്ചുള്ള ഭീകരാക്രമണങ്ങളുടെ പശ്ചാത്തലത്തിൽ സൗദി അറേബ്യയ്ക്ക് ഐക്യദാർഢ്യവും പിന്തുണയും പ്രഖ്യാപിച്ച് ബഹ്റൈൻ. ഇറാഖി പ്രദേശത്തുനിന്ന് പ്രവർത്തിക്കുന്ന ഇറാൻ പിന്തുണയുള്ള സായുധ സംഘങ്ങളാണ് ഈ ആക്രമണങ്ങൾക്ക് പിന്നിലെന്നും ഇതിനെതിരെ സൗദി അറേബ്യ സ്വീകരിച്ച നിയമപരമായ നടപടികളെ അംഗീകരിക്കുന്നുവെന്നും ബഹ്റൈൻ വ്യക്തമാക്കി.

To advertise here,

ഐക്യരാഷ്ട്രസഭയുടെ ചാർട്ടറിലെ ആർട്ടിക്കിൾ 51, അന്താരാഷ്ട്ര നിയമം, സുരക്ഷാ കൗൺസിൽ പ്രമേയം 2817 എന്നിവ പ്രകാരം സ്വയം പ്രതിരോധത്തിനും ആക്രമണങ്ങൾ തടയുന്നതിനുമുള്ള സൗദിയുടെ അവകാശം ഈ നടപടികളിലൂടെ വ്യക്തമാകുന്നുവെന്ന് മന്ത്രാലയം അറിയിച്ചു.

സൗദി അറേബ്യയുടെ സുരക്ഷ, പരമാധികാരം, പ്രാദേശിക സമഗ്രത എന്നിവ സംരക്ഷിക്കുന്നതിനായി സ്വീകരിക്കുന്ന എല്ലാ നിയമപരമായ നടപടികൾക്കും ബഹ്റൈന്റെ പൂർണ്ണ പിന്തുണയുണ്ടാകും. യുണൈറ്റഡ് സ്റ്റേറ്റ്‌സ് സെൻട്രൽ കമാൻഡുമായി ഏകോപിപ്പിച്ച് ഇറാഖിനുള്ളിലെ നിർദിഷ്ട ലക്ഷ്യങ്ങളോട് പ്രതികരിക്കാനുള്ള അവകാശം ഇതിൽ ഉൾപ്പെടുന്നു. സംഘർഷങ്ങൾ ലഘൂകരിക്കുന്നതിനും സമാധാനപരമായ പരിഹാരങ്ങൾക്കും സൗദി നേതൃത്വം നൽകുന്ന മുൻഗണനയെ ബഹ്റൈൻ വിദേശകാര്യ മന്ത്രാലയം പ്രശംസിച്ചു. സൗദി അറേബ്യയുടെ വ്യോമ പ്രതിരോധ സേനയുടെ കാര്യക്ഷമതയെയും സന്നദ്ധതയെയും മന്ത്രാലയം അഭിനന്ദിച്ചു.

ഗൾഫ് സഹകരണ കൗൺസിൽ (ജിസിസി) അംഗരാജ്യങ്ങൾക്കൊപ്പം സൗദിയെ പിന്തുണയ്ക്കുന്നതിൽ ബഹ്റൈനും ഉറച്ചുനിൽക്കുന്നു. ജിസിസിയുടെ സംയുക്ത പ്രതിരോധ കരാറിന് കീഴിൽ സൗദിയുടെ സുരക്ഷയും സ്ഥിരതയും മേഖലയുടെ സുരക്ഷയിൽനിന്ന് വേർതിരിക്കാനാവില്ലെന്ന് ബഹ്റൈൻ വ്യക്തമാക്കി.

മേഖലയിലെ രാജ്യങ്ങൾക്കെതിരായ ഇത്തരം ഭീകരാക്രമണങ്ങൾ അവസാനിപ്പിക്കാൻ ഇറാനെയും പ്രതിനിധികളെയും നിർബന്ധിതരാക്കാൻ അന്താരാഷ്ട്ര സമൂഹവും ഐക്യരാഷ്ട്രസഭ സുരക്ഷാ കൗൺസിലും നടപടി സ്വീകരിക്കണമെന്ന് ബഹ്റൈൻ ആവശ്യപ്പെട്ടു.

അയൽ രാജ്യങ്ങൾക്കെതിരെ ആക്രമണം നടത്താൻ സ്വന്തം പ്രദേശം ഉപയോഗിക്കുന്നത് തടയാനും, എല്ലാ ആയുധങ്ങളും ഭരണകൂടത്തിന്റെ നിയന്ത്രണത്തിന് കീഴിലാക്കാനും ഇറാഖ് സർക്കാരിനോട് ബഹ്റൈൻ അഭ്യർഥിച്ചു. അന്താരാഷ്ട്ര നിയമങ്ങൾ പാലിച്ച് നിയമവിരുദ്ധ മിലിഷ്യകളെ ഇല്ലാതാക്കുന്നത് പ്രാദേശികവും അന്താരാഷ്ട്രപരവുമായ സമാധാനം ശക്തിപ്പെടുത്താൻ സഹായിക്കുമെന്നും ബഹ്റൈൻ ചൂണ്ടിക്കാട്ടി.