തിരുവനന്തപുരം: കെഎസ്ആർടിസിയുടെ ബസ് ശേഖരം നവീകരിക്കുന്നതിനും പൊതുഗതാഗത സൗകര്യങ്ങൾ കൂടുതൽ മെച്ചപ്പെടുത്തുന്നതിനുമായി എംഎൽഎ ഫണ്ട് വിനിയോഗിച്ച് പുതിയ ബസുകൾ വാങ്ങാൻ സർക്കാർ പ്രത്യേക അനുമതി നൽകി ഉത്തരവിറക്കി. നിലവിൽ പല റൂട്ടുകളിലും കാലാവധി കഴിഞ്ഞ ബസുകളാണ് സർവീസ് നടത്തുന്നത് എന്നത് വലിയ പ്രതിസന്ധി സൃഷ്ടിച്ചിരുന്നു. ഈ സാഹചര്യത്തിലാണ് പുതിയ ബസുകൾ വാങ്ങുന്നതിനായി എംഎൽഎ ഫണ്ട് വിനിയോഗിക്കാൻ അനുമതി നൽകിക്കൊണ്ട് ധനകാര്യ വകുപ്പ് കർശന വ്യവസ്ഥകളോടെ ഉത്തരവ് പുറപ്പെടുവിച്ചിരിക്കുന്നത്. 2026-27 സാമ്പത്തിക വർഷത്തെ നിയമസഭാ മണ്ഡല ആസ്തിവികസന പദ്ധതിയിൽ ഉൾപ്പെടുത്തി ഒരു എംഎൽഎക്ക് പരമാവധി മൂന്ന് ബസുകൾ വരെ വാങ്ങാനാണ് അനുമതി നൽകിയിരിക്കുന്നത്.
പുതിയ പദ്ധതി പ്രകാരം വാങ്ങുന്ന ബസുകളുടെ ഇരിപ്പിട ശേഷി, ബോഡി തരം, ഇന്ധന വിഭാഗം എന്നിവ കെഎസ്ആർടിസിയുമായി കൂടിയാലോചിച്ച ശേഷമായിരിക്കും അന്തിമമായി തീരുമാനിക്കുക. ഓരോ മണ്ഡലത്തിലും ബസുകൾ അനുവദിക്കുമ്പോൾ അവിടുത്തെ യാത്രക്കാരുടെയും സമീപ പ്രദേശങ്ങളുടെയും ആവശ്യങ്ങൾ കൃത്യമായി പരിഗണിച്ച് മാത്രമായിരിക്കും റൂട്ടുകൾ തയ്യാറാക്കുന്നത്. കൂടാതെ, നികുതികളും രജിസ്ട്രേഷൻ ചാർജുകളും ഉൾപ്പെടെ ബസുകളുടെ ആകെ ചെലവ് വ്യക്തമാക്കുന്ന വിവരങ്ങൾ അടങ്ങിയ പട്ടിക സെപ്റ്റംബർ 30-നകം എംഎൽഎമാർ കെഎസ്ആർടിസി എംഡിക്ക് കൈമാറണമെന്നും ഉത്തരവിൽ വ്യവസ്ഥ ചെയ്യുന്നുണ്ട്.
സംസ്ഥാനത്തെ 140 മണ്ഡലങ്ങളിൽ നിന്നായി പദ്ധതി പൂർത്തിയാകുന്നതോടെ ഏകദേശം 400-ഓളം പുതിയ ബസുകൾ കെഎസ്ആർടിസിയുടെ ഭാഗമായി മാറും. കെഎസ്ആർടിസിയുടെ പ്രതിസന്ധി പരിഹരിക്കാൻ ഈ നീക്കം ഒരു പരിധിവരെയെങ്കിലും സഹായിക്കുമെന്നാണ് വിലയിരുത്തപ്പെടുന്നത്. കാലാവധി കഴിഞ്ഞ പഴയ ബസുകൾക്ക് പകരം പുതിയവ എത്തുന്നതോടെ പൊതുഗതാഗത സൗകര്യങ്ങൾ കൂടുതൽ മെച്ചപ്പെടും.
Published: 27 Sept 2026, 10:39 am IST
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented