വിജയ് സേതുപതി- പുരി ജഗന്നാഥ് പാന്‍ ഇന്ത്യന്‍ ചിത്രത്തില്‍ തബു

തമിഴ് സൂപ്പര്‍താരം വിജയ് സേതുപതിയെ നായകനാക്കി സൂപ്പര്‍ ഹിറ്റ് തെലുങ്ക് സംവിധായകന്‍ പുരി ജഗന്നാഥ് ഒരുക്കുന്ന ചിത്രത്തില്‍ ബോളിവുഡ് താരം തബുവും പ്രധാന വേഷത്തിലെത്തുന്നു. പാന്‍ ഇന്ത്യന്‍ ചിത്രമായി ഒരുക്കുന്ന ഈ പ്രൊജക്റ്റ് നിര്‍മിക്കുന്നത് പുരി കണക്റ്റിന്റെ ബാനറില്‍ പുരി ജഗന്നാഥും ചാര്‍മി കൗറും ചേര്‍ന്നാണ്.

തെലുങ്ക് പുതുവര്‍ഷമായ ഉഗാദിയോടനുബന്ധിച്ചാണ് ഈ ചിത്രത്തിന്റെ ഔദ്യോഗിക പ്രഖ്യാപനം ദിവസങ്ങള്‍ക്ക് മുമ്പ് നടത്തിയത്. ചിത്രത്തിന്റെ കഥയില്‍ ആകൃഷ്ടയായ തബു, വളരെ പെട്ടെന്നാണ് ഇതിന്റെ ഭാഗമാകാനുള്ള തീരുമാനം എടുത്തത്.

ഈ വമ്പന്‍ പ്രോജക്റ്റിനെ കൂടുതല്‍ ആവേശകരമാക്കുന്നത്, പുരി ജഗന്നാഥ് രചിച്ച വ്യത്യസ്തമായ തിരക്കഥയില്‍  വിജയ് സേതുപതിയെ ഇതുവരെ കാണാത്ത വേഷത്തില്‍ അവതരിപ്പിക്കുന്നു എന്നതാണ്. മുമ്പ് ആരും കണ്ടിട്ടില്ലാത്ത വിജയ് സേതുപതിയുടെ ഒരു വശം തുറന്നുകാട്ടാന്‍ ഒരുങ്ങുകയാണ് ഈ ചിത്രത്തിലൂടെ സംവിധായകന്‍. വളരെ ശക്തമായ കഥയും കഥാപാത്രങ്ങളുമാണ് ഇതിലൂടെ സംവിധായകന്‍ അവതരിപ്പിക്കുക.

ജൂണിലാണ്  ചിത്രത്തിന്റെ റെഗുലര്‍ ചിത്രീകരണം ആരംഭിക്കുന്നത്. തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളില്‍ ഒരു മള്‍ട്ടി- ലാംഗ്വേജ് റിലീസായാണ് ചിത്രം ഒരുക്കുന്നത്. രചന, സംവിധാനം: പുരി ജഗന്നാഥ്, നിര്‍മാതാക്കള്‍: പുരി ജഗന്നാഥ്, ചാര്‍മി കൗര്‍, ബാനര്‍: പുരി കണക്ട്‌സ്, സിഇഒ: വിഷു റെഡ്ഡി, മാര്‍ക്കറ്റിങ്: ഹാഷ്ടാഗ് മീഡിയ, പിആര്‍ഒ: ശബരി.