ലോകമെമ്പാടും ആരാധകരുള്ള ഹോളിവുഡ് താരങ്ങളാണ് ടോം ക്രൂസും നിക്കോൾ കിഡ്മാനും. സിനിമകളും പുരസ്‌കാരവേദികളും റെഡ് കാർപ്പറ്റ് ആഘോഷങ്ങളുമെല്ലാം നിറഞ്ഞ ജീവിതമാണ് ഇരുവരുടേതും. എന്നാൽ ഈ താരകുടുംബത്തിൽ വളർന്ന മക്കൾ തിരഞ്ഞെടുത്തത് മാതാപിതാക്കളുടേതിൽനിന്ന് വ്യത്യസ്തമായ വഴികളാണ്. ടോം ക്രൂസിന്റെയും മുൻഭാര്യ നിക്കോൾ കിഡ്മാന്റെയും മക്കളായ കോണർ ക്രൂസും ബെല്ല കിഡ്മാൻ ക്രൂസും സിനിമയുടെ വെള്ളിവെളിച്ചത്തിൽനിന്ന് അകന്നുനിൽക്കാനാണ് താൽപര്യപ്പെടുന്നത്. കോണർ മീൻപിടിത്തത്തിലും ഗോൾഫിലും സംഗീതത്തിലും സന്തോഷം കണ്ടെത്തുമ്പോൾ ബെല്ല മേക്കപ്പിലും ഫാഷനിലും ചിത്രകലയിലുമാണ് ശ്രദ്ധ കേന്ദ്രീകരിച്ചിരിക്കുന്നത്.

To advertise here,

സിനിമയിൽ അഭിനയിച്ചു, പിന്നീട് മറ്റൊരു ജീവിതത്തിലേക്ക്

1995 ജനുവരിയിൽ ഫ്‌ളോറിഡയിൽ ജനിച്ച കോണറിനെ ടോം ക്രൂസും നിക്കോൾ കിഡ്മാനും ദത്തെടുക്കുകയായിരുന്നു. മാതാപിതാക്കളുടെ പാത പിന്തുടർന്ന് സിനിമയിലും കോണർ ഭാഗ്യം പരീക്ഷിച്ചിരുന്നു. 2008-ൽ പുറത്തിറങ്ങിയ സെവൻ പൗണ്ട്‌സ് എന്ന ചിത്രത്തിലും 2012-ലെ റെഡ് ഡോൺ എന്ന ചിത്രത്തിലും കോണർ അഭിനയിച്ചു. എന്നാൽ സിനിമയിൽ കരിയർ തുടരാൻ അദ്ദേഹം തീരുമാനിച്ചില്ല. പകരം സംഗീതനിർമാണത്തിലേക്കും ഡിജെയിങ്ങിലേക്കുമാണ് കോണർ ശ്രദ്ധ തിരിച്ചത്. സ്വന്തം പേരിന്റെ ആദ്യാക്ഷരങ്ങൾ ഉപയോഗിച്ച് 'ഡിജെ സി-സ്‌ക്വയേർഡ്' എന്ന പേരിലും അദ്ദേഹം പ്രവർത്തിച്ചു. ഇപ്പോൾ 31 വയസ്സുള്ള കോണർ ഫ്‌ളോറിഡയിലെ ക്ലിയർവാട്ടറിലാണ് താമസിക്കുന്നത്. ടോം ക്രൂസിന് ദീർഘകാലമായി ബന്ധമുള്ള ചർച്ച് ഓഫ് സയന്റോളജിയുടെ അന്താരാഷ്ട്ര ആസ്ഥാനവും ഇവിടെയാണ്.

മീൻപിടിത്തവും ഗോൾഫും ഇഷ്ടവിനോദങ്ങൾ

സിനിമാതാരങ്ങളുടെ മക്കൾ സമൂഹമാധ്യമങ്ങളിൽ സജീവമാകുന്നതും പൊതുപരിപാടികളിൽ പ്രത്യക്ഷപ്പെടുന്നതും പതിവാണ്. എന്നാൽ കോണർ അത്തരത്തിലുള്ള പൊതുശ്രദ്ധയിൽനിന്ന് പൊതുവേ മാറിനിൽക്കുകയാണ്. ആഴക്കടലിലെ മീൻപിടിത്തമാണ് അദ്ദേഹത്തിന്റെ പ്രധാന താൽപര്യങ്ങളിലൊന്ന്. ഗോൾഫ് കളിക്കുന്നതും സുഹൃത്തുക്കൾക്കൊപ്പം സമയം ചെലവഴിക്കുന്നതും ഭക്ഷണം പാകം ചെയ്യുന്നതുമെല്ലാം കോണറിന്റെ ഇഷ്ടവിനോദങ്ങളാണ്. മുൻപ് പീപ്പിൾ മാസികയോട് സംസാരിച്ച കോണറിനെ അടുത്തറിയുന്ന ഒരാൾ, അദ്ദേഹത്തിന്റെ ജീവിതത്തിൽ ആഴക്കടൽ മീൻപിടിത്തത്തിന് വലിയ സ്ഥാനമുണ്ടെന്ന് പറഞ്ഞിരുന്നു. ധാരാളം സുഹൃത്തുക്കളുള്ള കോണർ ലളിതമായ ജീവിതമാണ് നയിക്കുന്നതെന്നും ആ വ്യക്തി വിശദീകരിച്ചിരുന്നു. സമൂഹമാധ്യമങ്ങളിലും കോണർ വളരെ അപൂർവമായാണ് ചിത്രങ്ങൾ പങ്കുവയ്ക്കാറുള്ളത്. 2022 ഓഗസ്റ്റിൽ മീൻപിടിത്തയാത്രയുടെ വീഡിയോ പങ്കുവച്ചതിനുശേഷം 2023 ഏപ്രിലിലാണ് അദ്ദേഹം വീണ്ടും ഇൻസ്റ്റഗ്രാമിൽ പ്രത്യക്ഷപ്പെട്ടത്. സുഹൃത്തിനൊപ്പം ഗോൾഫ് കളിക്കുന്ന ചിത്രമായിരുന്നു അന്ന് പങ്കുവച്ചത്.2025 ജനുവരിയിലും ഗോൾഫ് കോഴ്‌സിൽനിന്നുള്ള സെൽഫി കോണർ പോസ്റ്റ് ചെയ്തിരുന്നു. സഹോദരി ബെല്ലയ്‌ക്കൊപ്പമുള്ള കുട്ടിക്കാല ചിത്രവും അദ്ദേഹം പങ്കുവച്ചിട്ടുണ്ട്. പൊതുശ്രദ്ധയിൽനിന്ന് അകന്നുനിൽക്കുമ്പോഴും പിതാവ് ടോം ക്രൂസിനൊപ്പം ചില കായികമത്സരങ്ങൾ കാണാൻ കോണർ എത്തിയിട്ടുണ്ട്.

ബെല്ല മേക്കപ്പ് ആർട്ടിസ്റ്റിൽനിന്ന് ഫാഷൻ ഡിസൈനറിലേക്ക്

കോണറിനെപ്പോലെ സഹോദരി ബെല്ലയും മാതാപിതാക്കളുടെ അഭിനയജീവിതം പിന്തുടർന്നില്ല. മേക്കപ്പ്, ഫാഷൻ, കല എന്നിവയോടാണ് ബെല്ലയ്ക്ക് കൂടുതൽ താൽപര്യം.ടോം ക്രൂസിനൊപ്പം ബെവർലി ഹിൽസിലാണ് ബെല്ല വളർന്നത്. സയന്റോളജി വിശ്വാസരീതിയുമായി ബന്ധപ്പെട്ട സാഹചര്യത്തിലായിരുന്നു അവരുടെ വളർച്ചയെന്നും റിപ്പോർട്ടിൽ പറയുന്നു.ലണ്ടനിലെ ഡെൽമാർ അക്കാദമി ഓഫ് മേക്കപ്പ് ആൻഡ് ഹെയറിലാണ് ബെല്ല പഠിച്ചത്. പഠനം പൂർത്തിയാക്കിയശേഷം മേക്കപ്പ് ആർട്ടിസ്റ്റായും ജോലി ചെയ്തു.പിന്നീട് ഫാഷൻ ഡിസൈനിങ്ങിലേക്കും കടന്നു. ടോം ക്രൂസിന്റെ മുൻഭാര്യ കെയ്റ്റി ഹോംസുമായി ബന്ധപ്പെട്ടിരുന്ന ഹോംസ് ആൻഡ് യാങ് എന്ന ആഡംബര ഫാഷൻ ബ്രാൻഡിൽ പ്രവർത്തിച്ചതാണ് ഈ രംഗത്തേക്കുള്ള ബെല്ലയുടെ ആദ്യ ചുവടുവയ്പുകളിലൊന്ന്. ഈ ബ്രാൻഡ് പിന്നീട് പ്രവർത്തനം അവസാനിപ്പിച്ചു.2018-ൽ, 25 വയസ്സുള്ളപ്പോൾ, സ്വന്തം ടി-ഷർട്ട് ബ്രാൻഡും ബെല്ല ആരംഭിച്ചു. ഇപ്പോൾ ചിത്രകലയിലും ബെല്ല സജീവമാണ്. സ്വന്തം കലാസൃഷ്ടികൾ ഇൻസ്റ്റഗ്രാമിലൂടെ പങ്കുവയ്ക്കുന്നതിനൊപ്പം അവയുടെ പ്രിന്റുകൾ വെബ്‌സൈറ്റിലൂടെ വിൽക്കുകയും ചെയ്യുന്നുണ്ട്.

ടോം ക്രൂസിന്റെയും നിക്കോൾ കിഡ്മാന്റെയും കുടുംബജീവിതം

1990-ലാണ് ടോം ക്രൂസും നിക്കോൾ കിഡ്മാനും വിവാഹിതരായത്. ഹോളിവുഡിലെ ഏറെ ശ്രദ്ധിക്കപ്പെട്ട താരദമ്പതികളായിരുന്നു ഇരുവരും. എന്നാൽ 2001-ൽ ഇവർ വേർപിരിഞ്ഞു. വിവാഹജീവിതത്തിനിടെ ആദ്യം ബെല്ലയെയും പിന്നീട് കോണറിനെയും ദമ്പതികൾ ദത്തെടുത്തു. പിന്നീട് കെയ്റ്റി ഹോംസുമായുള്ള ബന്ധത്തിൽ ടോം ക്രൂസിന് സൂരി എന്ന മകൾ ജനിച്ചു. നിക്കോൾ കിഡ്മാൻ കീത്ത് അർബനുമായുള്ള ബന്ധത്തിൽ സൺഡേ റോസ്, ഫെയ്ത്ത് എന്നീ രണ്ട് പെൺമക്കളുമുണ്ട്. ഹോളിവുഡിലെ ഏറ്റവും പ്രശസ്തരായ താരങ്ങളുടെ മക്കളാണെങ്കിലും ആ പ്രശസ്തിയെ സ്വന്തം കരിയറിന്റെ അടിത്തറയാക്കാൻ കോണറും ബെല്ലയും ശ്രമിച്ചിട്ടില്ല.