ഇടങ്കൈ കൊണ്ടുള്ള ആ സെല്യൂട്ട് കാണുമ്പോൾ സങ്കടം വരുമായിരുന്നു | ജീവിതം എന്ന തീക്കടൽ - 12

താല്ബട്ടിലെ കാലാവധി കുറെ നീണ്ടതായിരുന്നു. നസീറാബാദ് പോലെ തന്നെ ഒരു സൗകര്യവും ഇല്ലാത്ത മിലിട്ടറി സ്റ്റേഷന്. ബാങ്കിനും മുതിര്ന്ന കുട്ടികള്ക്കുള്ള സ്കൂളിനും സൗകര്യമുള്ള മിലിറ്ററി ഹോസ്പിറ്റലിനും ഒക്കെയായി കുറഞ്ഞത് 25 കിലോമീറ്റര് ദൂരെയുള്ള ബബീനയില് പോകണം. ഇങ്ങ് തെക്കേ ഇന്ത്യയിലേക്കുള്ള വണ്ടികള് കയറണമെങ്കില് 50 കിലോമീറ്റര് എതിര്വശത്തുള്ള ഝാന്സിയിലേക്ക് പോകണം. എന്നാല് ഇന്ത്യയിലെ ആദ്യത്തെ ശതാബ്ദി എക്സ്പ്രസ്, ദിവസവും കാണാനുള്ള ഭാഗ്യവും നമുക്കുണ്ടായിരുന്നു.
നമ്മുടെ യൂണിറ്റിന്റെ തൊട്ടടുത്തുകൂടിയാണ് റെയില്വേ ലൈന് പോകുന്നത്. ആദ്യത്തെ ഇന്ത്യന് പ്രധാനമന്ത്രിയായിരുന്ന ജവഹര്ലാല് നെഹ്റുവിന്റെ നൂറാം ജന്മദിനാഘോഷത്തിന്റെ ഭാഗമായി അന്നത്തെ റെയില്വേമന്ത്രിയായിരുന്ന മാധവ റാവു സിന്ധ്യ ഡല്ഹിയില് നിന്നും അദ്ദേഹത്തിന്റെ നാടായ ഗ്വാളിയര് വരെയും പിന്നീട് അത് ഝാന്സി വഴി ഭോപ്പാല് വരെയും നീട്ടിയ ആദ്യത്തെ ശതാബ്ദി ട്രെയിന് ദിവസവും അതുവഴി കടന്നുപോകുന്നത് ഞങ്ങള് കൗതുകത്തോടെ നോക്കും. അതായിരുന്നു അന്നത്തെ ഏറ്റവും വേഗത കൂടിയ ട്രെയിന്.
Content Highlights: Lieutenant colonel Surendran M.K.'s Army memories