തീജ്വാലയില്നിന്ന് പിറന്ന ഫൂലന് ദേവിയും ഝാന്സി റാണിയും | ജീവിതം എന്ന തീക്കടൽ |ആത്മകഥ 11

യാത്രയയക്കാന് കുറേപേര് റെയില്വേ സ്റ്റേഷനില് വന്നിരുന്നു. അവര് തന്നെ സാധനങ്ങളൊക്കെ ട്രെയിനിനകത്ത് എടുത്തുവെച്ചു. ബെഡ്ഡ് റോളും സ്യൂട്ട്കേസും സീറ്റിന് അടിയിലായി സൂക്ഷിച്ചു. സ്റ്റീല് ബോക്സ് ശൗചാലയത്തിനും വാതിലിനും അടുത്തായി വെച്ചു. ട്രെയിന് പുക തുപ്പി മുന്നോട്ട് നീങ്ങിത്തുടങ്ങി. കൊണ്ടുവിടാന് വന്നവരൊക്കെ കണ്ണില് നിന്നും മറയുന്നതുവരെ ട്രെയിനിന്റെ വാതിലിനടുത്ത് വന്ന് അവരോട് കൈവീശി കാണിച്ചു. ലങ്കറില് കാത്തിരിക്കുന്ന ആട്ടിറച്ചിയും ചപ്പാത്തിയും ലക്ഷ്യമാക്കി അവരും, റെയില്വേ ടൈം ടേബിളില് മാത്രം കണ്ട ഒരു സ്ഥലം ലക്ഷ്യമാക്കി ഞാനും യാത്ര തുടര്ന്നു.
'പട്ടാളത്തിലെ ബന്ധം റെയില്വേ സ്റ്റേഷന് വരെ മാത്രം' എന്ന ഒരു ചൊല്ല് നമ്മുടെ ഇടയില് ഉണ്ട്. ഇതുവരെ തമാശയായി മാത്രം എടുത്തിരുന്ന ആ വാചകത്തിന്റെ അര്ഥം ഇന്ന് സ്വയം ഉള്ക്കൊള്ളുകയാണ്. ആര്മിയില് ചേര്ന്നതിനുശേഷം ഉള്ള ഒറ്റയ്ക്കുള്ള ആദ്യത്തെ യാത്രയാണ്. ബി.എ. ഒന്നാം വര്ഷത്തെ പരീക്ഷയ്ക്ക് വേണ്ടുന്ന ബുക്കുകള് ഒക്കെ കയ്യിലുണ്ട്. ക്യാമ്പിനുള്ളിലെ ബഹളത്തില് നിന്നും സീനിയര്മാരുടെ കല്പനകളില് നിന്നും സ്വാതന്ത്ര്യം കിട്ടിയ ആദ്യദിവസം. സമയം കളയാതെ സൂട്ട്കേസില് നിന്നും പുസ്തകം എടുത്ത് അമേരിക്കന് ഹിസ്റ്ററി പഠിക്കാന് തുടങ്ങി. ഓരോ സ്റ്റേഷനില് എത്തുമ്പോഴും കണ്ണുകള് അറിയാതെ വാതിലിനടുത്തു വെച്ച പെട്ടിയിലേക്ക് പോകും. കറുത്ത പെയിന്റ് അടിച്ച പെട്ടിയിലെ വെളുത്ത അക്ഷരത്തില് എഴുതിവെച്ച നമ്പറും റാങ്കും പേരും എന്നെ നോക്കി ചിരിച്ചുകൊണ്ട് പറയും 'പേടിക്കേണ്ട, ഞങ്ങളും നിങ്ങളുടെ പെട്ടിയും സുരക്ഷിതരാണ് ഭയപ്പെടാതെ പഠിച്ചോളൂ.'
Content Highlights: Lieutenant Colonel Surendran M.K. writes about Phoolan Devi and Jhansi Rani in autobiography