നാട്ടില് കിടന്നുറങ്ങുന്ന വീട്ടുകാരും കൂട്ടുകാരും ഇതെന്തറിയുന്നു! | ജീവിതം എന്ന തീക്കടൽ | ആത്മകഥ 16

മൂന്നാഴ്ചത്തെ അവധി കഴിഞ്ഞ് പുതിയ യൂണിറ്റിലേക്കുള്ള പുറപ്പാടായി. എവിടേക്കാണ് പോകേണ്ടത് എന്ന് പോലും കൃത്യമായി അറിയില്ല. ഓഫീസര് ട്രെയിനിങ്ങ് അക്കാദമിയില് നിന്നും കിട്ടിയ ഉത്തരവ് പ്രകാരം ജമ്മുവിലെ 'ട്രാന്സിറ്റ് ക്യാമ്പിലാണ്' റിപ്പോര്ട്ട് ചെയ്യേണ്ടത്. അവിടെനിന്നും യൂണിറ്റ് ഉള്ള സ്ഥലത്തേക്ക് അയക്കും. ഇതിനിടയില് രണ്ട് സ്റ്റീല് പെട്ടികളുടെ ഉടമസ്ഥനായെങ്കിലും ഒന്ന് വീട്ടില് തന്നെ വിട്ട് ഒരു പെട്ടിയും മറ്റ് സാധനങ്ങളുമായി ജമ്മുവിലേക്കുള്ള വണ്ടി കയറി. കമ്മീഷന്ഡ് ഓഫീസര് ആയത് കാരണം ഇനിയങ്ങോട്ട് എ.സി. കോച്ചിലാണ് യാത്രചെയ്യാനുള്ള അധികാരം. ഇന്ഫന്ററിയുടെ ഒരു 'ജാക്ക് റൈഫിള്സ്' റെജിമെന്റിലേക്കാണ് പോകേണ്ടത്. ജമ്മു ആന്ഡ് കശ്മീര് എന്നതിന്റെ ചുരുക്കപേരാണ് ജാക്ക്.
ഇന്ത്യന് ആര്മിയില് ഓരോ സ്ഥാനിയക്കാര് മാത്രം ഉള്ക്കൊള്ളുന്ന മദ്രാസ്, സിഖ്, ജാട്ട്, കുമയോണ്, ഗഡുവാള്, രാജപ്പൂത്ത്, ഗൂര്ഖ, ആസാമീസ് തുടങ്ങി പല റെജിമെന്റുകള് ഉണ്ട്. അങ്ങനെയുള്ള റെജിമെന്റ്കളില് ഒന്നാണിത്. ജമ്മു കശ്മീറിലെ ആര്മി ട്രാന്സിറ്റ് ക്യാമ്പില് റിപ്പോര്ട്ട് ചെയ്തു. ജമ്മുവിന് മുകളില് യൂണിറ്റുകള് ഉള്ള, എന്റെ കൂടെ ഓഫീസര് ആയ മറ്റ് ചിലര് കൂടി അന്ന് അവിടെ റിപ്പോര്ട്ട് ചെയ്തിട്ടുണ്ട്. അവിടെനിന്നും വിദൂരങ്ങളിലുള്ള യൂണിറ്റുകളിലേക്ക് ആര്മി ട്രക്കുകള് കോണ്വോയ് ആയിട്ടാണ് പോവുക. സിവില് ഡ്രസ് മാറി ആര്മി യൂണിഫോം ധരിച്ചു. ഓഫീസര് ട്രെയിനിങ്ങ് അക്കാദമിയില് കമ്മീഷന് എടുത്ത ദിവസം കുറച്ച് സമയം യൂണിഫോം ധരിച്ചിരുന്നു എന്നല്ലാതെ പിന്നീട് ഓഫീസര് യൂണിഫോം ധരിക്കുന്നത് ഇപ്പോഴാണ്. പലഭാഗങ്ങളില് നിന്നുമുള്ള ജവാന്മാര്, അവരുടെ സല്യൂട്ടുകള്. ആ ജീവിതവുമായി പൊരുത്തപ്പെട്ട് വരുന്നതേയുള്ളൂ. കഴിഞ്ഞ പതിനാറ് വര്ഷമായി ഞങ്ങള് സല്യൂട്ട് നല്കിയിരുന്ന സുബേദാര് മേജര് റാങ്കിലുള്ളവരെ കണ്ടപ്പോള് പെട്ടെന്ന് വലതു കൈ ഉയരാന് ശ്രമിച്ചെങ്കിലും അവരുടെ സല്യൂട്ട് ഇങ്ങോട്ട് കിട്ടിയപ്പോഴാണ് അതിനു മറുപടി സല്യൂട്ട് നല്കിയാണ് ചെയ്യാന് ആരംഭിച്ച ഒരു തെറ്റ് തിരുത്തിയത്. എത്രമാത്രം സ്വയം അഭിമാനം തോന്നിയ നിമിഷമാണ് അത് എന്ന് പറയേണ്ടതില്ലല്ലോ.
Content Highlights: Lieutenant Colonel Surendran M.K. writes days in Leh Ladakh