ഇന്ത്യന്‍ ആര്‍മിയുടെ ഏറ്റവും പഴക്കമേറിയ റെജിമെന്റില്‍; ഇനി കുറച്ചുകാലം റഷ്യന്‍ ടാങ്കിനോടൊപ്പം

#ലെഫ്റ്റനന്റ് കേണല്‍ സുരേന്ദ്രന്‍ എം.കെ.(റിട്ട.)
പ്രതീകാത്മക ചിത്രം| ANI
പ്രതീകാത്മക ചിത്രം| ANI

ഏഷ്യയിലെ ഏറ്റവും വലിയ ആര്‍മി ബേസുകളില്‍ ഒന്ന് എന്ന് പറഞ്ഞത് ഇപ്പോഴാണ് ശരിക്കും മനസ്സിലായത്. പത്താന്‍കോട്ടിലേക്കുള്ള പ്രധാന റോഡിന്റെ ഒരു വശത്തായി വലിയ ഒരു കവാടം. ഗേറ്റിനകത്തേക്ക് കടക്കാനുള്ള ആര്‍മി വണ്ടികളുടെ ഒരു നിര, അതുപോലെ മറ്റ് ആവശ്യങ്ങള്‍ക്കായി പുറത്തേക്ക് പോകുന്ന വണ്ടികളുടെ മറ്റൊരു നിര. ചുവന്ന തൊപ്പിയിട്ട ആര്‍മിയുടെ പോലീസ് വിഭാഗം ഗേറ്റില്‍ കാവല്‍ നില്‍പ്പുണ്ട്. പോകുന്നതും വരുന്നതുമായ എല്ലാ വണ്ടികളുടെയും കൃത്രിമായ കണക്കെടുക്കുന്നുണ്ട്. വിശദവിവരങ്ങള്‍ എഴുതിയതിനു ശേഷം എന്റെ ജിപ്‌സിയും ഉള്ളിലേക്ക് കടന്നു. പുറത്തേതിനേക്കാളും വിശാലമായ 'മാല്‍ റോഡ്'. പല സിറ്റികളിലും മഹാത്മാഗാന്ധിജിയുടെ പേരിലുള്ള എം.ജി. റോഡ് പോലെ തന്നെയാണ് ആര്‍മി കണ്‍ടോണ്‍മെന്റുകളിലെ മാല്‍ റോഡുകള്‍. പതിനേഴാം നൂറ്റാണ്ടുകളില്‍ ഉല്ലാസ നടത്തങ്ങള്‍ക്കായി ഉപയോഗിച്ചിരുന്ന 'പ്രൊമെനേഡ്' റോഡുകള്‍ പിന്നീട് അത് സൈനികരുടെ താമസസ്ഥലവുമായി ബന്ധപ്പെട്ട് 'മാരീഡ് അക്കമഡേഷന്‍ ആന്‍ഡ് ലിവിങ് ലൈന്‍ റോഡ്' എന്ന പേരിന്റെ ചുരുക്കമായ മാല്‍ റോഡ് എന്ന് അറിയപ്പെടുകയായിരുന്നു.

മാല്‍ റോഡില്‍ നിന്നും ഓരോ യൂണിറ്റിലേക്കുമുള്ള ചെറിയ റോഡുകളും യൂണിറ്റുകളുടെ പേരും നമ്പറും എഴുതിയ ഗേറ്റുകളും കണ്ടു. അതിലൊന്ന് എന്നെ സ്വീകരിക്കാന്‍ കാത്തിരിക്കുകയായിരുന്നു. സാങ്കേതിക യോഗ്യതയുള്ള ഒരു പോസ്റ്റ് ആണ് ക്വാര്‍ട്ടര്‍ മാസ്റ്റര്‍ എന്ന് പറയുന്നത്. ഞങ്ങള്‍ എണ്ണത്തില്‍ കുറവായതുകൊണ്ട് ട്രെയിനിങ് സെന്ററുകളില്‍ സ്ഥിരമായി ആരെങ്കിലും ഉണ്ടാകാറുണ്ടെങ്കിലും യൂണിറ്റുകളില്‍ വല്ലപ്പോഴുമൊക്കെയേ പോസ്റ്റ് ചെയ്യുകയുള്ളൂ. അതുകൊണ്ടുതന്നെ ഒരു ക്വാര്‍ട്ടര്‍ മാസ്റ്റര്‍ പുതിയ ഒരു യൂണിറ്റിലേക്ക് പോകുമ്പോള്‍ പൊതുവേ നല്ല ഒരു സ്വീകരണമാണ് കിട്ടുക.

Content Highlights: Lieutenant Colonel Surendran M.K.'s Indian army life

Continue reading