പിതാവിന് കാൻസർ, മക്കൾക്ക് പകരുമെന്ന് ഭയന്ന് മാതാപിതാക്കളെ ഉപേക്ഷിച്ച മകൻ | Doctor's Diary

സ്നേഹഭവൻ. പേരുപോലെതന്നെ ഏറെ സ്നേഹത്തോടെ വലിയ ഉത്തരവാദിത്തങ്ങൾ ഏറ്റെടുത്ത് നടത്തുന്ന സ്ഥാപനം. വാർധക്യത്തിൽ ആരോരും നോക്കാൻ ഇല്ലാതെ ജീവിക്കുന്ന പലർക്കും ഒരു അത്താണിയായിരുന്നു സ്നേഹഭവൻ. വെറുമൊരു വൃദ്ധസദനം എന്ന് സ്നേഹഭവനെ വിളിക്കാനാവില്ല. തെരുവിൽ അലയുന്നതിനിടയിലാണ് പലരും സ്നേഹഭവനിൽ എത്തിച്ചേരുന്നത്. ചിലരെ മക്കൾ തന്നെ അവിടെ കൊണ്ടുവിടുന്നതായിരുന്നു. ചിലരെ നാട്ടുകാരും അധികൃതരും കൊണ്ടുവിടുന്നതും. ചിലരാകട്ടെ സ്വന്തം ഇഷ്ടപ്രകാരം അവിടെ എത്തിച്ചേർന്നവർ.

വരുന്നവർക്കെല്ലാം സുരക്ഷിതമായ ഒരിടം, അതായിരുന്നു സ്നേഹഭവൻ. നല്ല ഭക്ഷണവും മരുന്നുകളും സംരക്ഷണവും സ്നേഹഭവന്റെ പ്രത്യേകതയായിരുന്നു. സ്‌നേഹഭവൻ എന്നുപറയുമ്പോൾ ആദ്യം ഓടിയെത്തുന്ന മുഖം അന്ന സിസ്റ്ററുടേതാണ്. അവിടത്തെ എല്ലാകാര്യങ്ങളും  ഓടിനടന്നു ചെയ്തിരുന്നയാൾ. സിസ്റ്റർ കർശനക്കാരിയാണ്. എല്ലായിടത്തുമെത്തും,. എല്ലാ കാര്യങ്ങളിലും നല്ല ശ്രദ്ധ. അതുകൊണ്ടുതന്നെ സിസ്റ്ററെ എല്ലാവർക്കും കുറച്ചു പേടിയുമാണ്. അന്ന സിസ്റ്റർ വിളിച്ചിട്ടാണ് ആദ്യമായി സ്നേഹഭവനിലേക്ക് പോകുന്നത്. അവർ സംഘടിപ്പിച്ച ഒരു കാൻസർ ബോധവത്കരണ ക്ലാസ് എടുക്കാൻ പോയപ്പോഴാണ് അവിടുത്തെ അന്തേവാസികളെ ആദ്യമായി പരിചയപ്പെടുന്നത്. ക്ലാസ് എല്ലാവരും നല്ല ശ്രദ്ധയോടെയാണ് കേട്ടത്. പക്ഷേ അവർക്ക് കൂടുതൽ വേണ്ടത് സംസാരിക്കാനും അവരുടെ കഥകൾ കേൾക്കാനും ഒരാളെയാണെന്ന് പതിയെ തിരിച്ചറിഞ്ഞു.

Content Highlights: dr deepthi about common cancer myths and misconceptions